Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 20: Nairubo ni Dina

Estoria 20: Nairubo ni Dina

MAKITKITAM no asino ti sarsarungkaran ni Dina? Napanna kinita ti sumagmamano kadagiti babbalasang idiay daga ti Canaan. Maragsakanto ngata ni Jacob nga amana iti daytoy?

Ni Dina binisitana dagiti babbai a Canaanita

Madi ni Abraham a mangasawa ni Isaac ti babai manipud Canaan, saan kadi? Uray met ni Isaac saanna kayat a mangasawa ni anakna a Jacob ti babai a taga Canaan. Ammom kadi no apay?

Ngamin ta dagitoy a tattao idiay Canaan agdaydayawda iti ulbod a didiosen. Saanda a nasayaat a tattao a pakiasawaan, wenno agbalin a nadekket a gagayyem. Ngarud saanto a maragsakan ni Jacob a ti balasangna makigaygayyem kadagitoy babbai a taga Canaan.

Apagpag-isu la unay, nairubo ni Dina. Makitkitam kadi dayta lalaki a Canaanita iti retrato? Siquem ti naganna. Maysa nga aldaw, innala ni Siquem ni Dina ket pinilitna a makikaidda kenkuana. Dakes daytoy, ta dagiti laeng agassawa a lallaki ken babbai ti rebbeng nga agkaidda.

Makapungtot unay dagiti kakabsat a lallaki ni Dina. Dua kadakuada, ni Simeon ken Levi ti napan idiay siudad ket kinellaatda dagiti lallaki. Isuda ken dagiti kakabsatda ti nangpapatay ken ni Siquem ken amin dagiti dadduma a lallaki. Makapungtot unay ni Jacob ta inaramid dagiti annakna daytoy.

Kasano a nangrugi amin daytoy a gulo? Ngamin ta nakigayyem ni Dina kadagiti tattao a di agtultulnog iti linlinteg ti Dios. Ditay kayat ti makigayyem iti kakasta, saan kadi?

Genesis 34:1-31.



Dagiti Saludsod

  • Apay a saan a kayat da Abraham ken Isaac a mangasawa dagiti annakda kadagiti babbai a taga Canaan?
  • Kayat kadi ni Jacob a makigayyem ti balasangna kadagiti babbai a taga Canaan?
  • Iti ladawan, siasino ti lalaki a kumitkita ken ni Dina, ket ania ti dakes nga inaramidna?
  • Ania ti inaramid dagiti kakabsat ni Dina a da Simeon ken Levi idi nadamagda ti napasamak?
  • Kayat kadi ni Jacob ti inaramid da Simeon ken Levi?
  • Kasano a nangrugi amin daytoy a gulo?

Kanayonan a salsaludsod

  • Basaenyo ti Genesis 34:1-31.

    Naminsan laeng kadi a nakikadua ni Dina kadagiti babbalasang idiay Canaan? Ilawlawagmo. (Gen. 34:1)

    Apay nga adda met basol ni Dina iti pannakapukaw ti kinabirhenna? (Gal. 6:7)

    Kasano a maipakita dagiti agtutubo ita a saanda a tultuladen ni Dina? (Prov. 13:20; 1 Cor. 15:33; 1 Juan 5:19)