Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 18: Ni Jacob Napan Haran

Estoria 18: Ni Jacob Napan Haran

AMMOM kadi dagitoy tattao a pakisarsaritaan ni Jacob? Kalpasan ti panagdaliasatna ti adu nga al-aldaw, nakita ida ni Jacob iti maysa a bubon. Insaludsodna: ‘Taga anokayo?’

‘Idiay Haran,’ kunada.

‘Am-ammoyo kadi ni Laban?’ insaludsod ni Jacob.

‘Wen,’ insungbatda. ‘Adtoy, umayen ni Raquel nga anakna, ken ti karkarnerona.’ Isu aya ti makitam iti retrato?

Panagkinnita da Jacob ken Raquel

Inikkat ni Jacob ti bato manipud iti bubon tapno makainum dagiti karnero ni Laban. Kalpasanna inagkanna ni Raquel ket sana imbaga kenkuana ti katataona. Maragsakan unay ni Raquel, isu a napan ken imbagana ken amana a Laban.

Pinaggian ni Laban ni Jacob idiay balayda. Ken pinalubosanna ni Jacob nga agbalin nga asawana ni Raquel. Ngem, indawatna ken Jacob nga isut’ agtrabaho idiay taltalonna iti pito a tawen tapno maalana ni Raquel. Ngem idi nadanonen ti oras ti panagkasar, ammom kadi no aniat’ napasamak?

Inted ni Laban ti inauna a balasangna a ni Lea nga agbalin nga asawa ni Jacob! Immanamong manen ni Jacob nga agtrabaho pay ti pito a tawen, kalpasanna inted ni Laban kenkuana met ni Raquel. Kadagidiay nga al-aldaw impalubos ti Dios a maaddaan dagiti lallaki ti nasursurok ngem maysa nga asawa. Ita ti lalaki masapul a maaddaan laeng ti maymaysa nga asawa.

Genesis 29:1-30.



Dagiti Saludsod

  • Siasino ti babai iti ladawan, ket ania ti inaramid kenkuana ni Jacob?
  • Ania ti situtulok nga aramiden ni Jacob tapno maasawana ni Raquel?
  • Ania ti inaramid ni Laban idi nadanonen ti panawen a panagkasar da Jacob ken Raquel?
  • Tapno maasawana ni Raquel, immanamong ni Jacob a mangaramid iti ania?

Kanayonan a salsaludsod

  • Basaenyo ti Genesis 29:1-30.

    Uray no inallilaw ni Laban, kasano nga impakita ni Jacob nga isu ket natakneng, ket ania ti masursurotayo iti daytoy? (Gen. 25:27; 29:26-28; Mat. 5:37)

    Kasano nga ipakita ti ulidan ni Jacob ti nagdumaan ti ayat ken pannakakayaw? (Gen. 29:18, 20, 30; Sol. 8:6)

    Siasino dagiti uppat a babbai a nagbalin nga assawa ni Jacob a nangipasngay kenkuana kadagiti annak a lalaki idi agangay? (Gen. 29:23, 24, 28, 29)