Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 12: Nagaramid Dagiti Tattao ti Dakkel a Torre

Estoria 12: Nagaramid Dagiti Tattao ti Dakkel a Torre

ADU a tawen ti naglabas. Dagiti annak ni Noe ti nagputotda ti adu, ket di nagbayag adun ti tattao ditoy daga.

Maysa kadagitoy isu ti apoko-ti-tumeng ni Noe nga agnagan Nimrod. Isu ti dakes a tao a nanganup ken nangpapatay ti an-animal ken tattao. Pinagbalinna met ti bagina nga ari. Saan a kinayat ti Dios ni Nimrod.

Maymaysa ti pagsasao amin a tattao idi. Kayat ni Nimrod a pagkaykaysaenna ida amin tapno maiturayanna ida. Gapuna imbagana kadagiti tattao a mangbangonda ti siudad ken ti maysa a dakkel a torre. Kitaem ida iti retrato nga agar-aramid ti ladrilio.

Saan a naay-ayo ni Jehova a Dios iti daytoy. Ngem kuna dagiti tattao: ‘Mangbangontayo ti maysa a siudad ken nangato a torre a ti tuktokna dumanon idiay langit. Iti kasta nalalataktayonto!’ Kayatda nga isuda ti maidaydayaw, saan a ti Dios.

Ammom kadi no kasano a pinasardeng ti Dios dagiti tattao a mangbangbangon ti torre? Bigla a pinagsasaona ida ti nagduduma a pagsasao. Gapuna saanda a nagkikinnaawatan ti maysa ken maysa. Isut’ gapuna a ti siudadda naawagan Babel, wenno Babilonia, kayatna a sawen “pannakariribok.”

Itan mangrugin nga umadayo dagiti tattao manipud Babel. Ti grupo dagiti tattao a parpareho ti saoda ti nagtitiponda a nagian iti dadduma a paspaset ti daga.

Genesis 10:1, 8-10; 11:1-9.

Dagiti trabahador nga agibangbangon iti dakkel a torre


Dagiti Saludsod

  • Siasino ni Nimrod, ket kasano ti panagrikna ti Dios kenkuana?
  • Iti ladawan, apay nga agar-aramid dagiti tattao iti ladrilio?
  • Apay a saan a naay-ayo ni Jehova iti daytoy a panagbangon?
  • Kasano a pinasardeng ni Jehova ti pannakaibangon ti torre?
  • Ania ti nayawag iti siudad, ket ania ti kayat a sawen dayta a nagan?
  • Ania ti napasamak kadagiti tattao idi a ti Dios pinagdudumana ti pagsasaoda?

Kanayonan a salsaludsod

  • Basaenyo ti Genesis 10:1, 8-10.

    Ania a kababalin ti imparangarang ni Nimrod, ket ania a pakdaar ti ipaay daytoy kadatayo? (Prov. 3:31)

  • Basaenyo ti Genesis 11:1-9.

    Apay a nangbangonda iti torre, ngem apay a napaay daytoy? (Gen. 11:4; Prov. 16:18; Juan 5:44)