Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 9: Nagaramid Daong ni Noe

Estoria 9: Nagaramid Daong ni Noe
Dagiti tattao katkatawaanda ni Noe

NI NOE adda asawana ken tallo nga annakna. Ti nagan dagiti annakna isu da Sem, Cam ken Jafet. Ket tunggal maysa kadagitoy nga annak adda asawada. Gapuna adda walo a tattao iti pamilia ni Noe.

Kuna ita ti Dios ken Noe a mangaramid ti dakkel a daong. Daytoy a daong ti nagdakkel kas bapor, ngem ad-adda a kalanglanga ti dakkel, ken atiddog a kahon. Tallo a grado ti kangatona. Dayta ti maaddaan kukuarto para ken Noe ken ti pamiliana, dagiti an-animal, ken ti taraon a kasapulanda.

Kuna ti Dios ken Noe: ‘Mangipatulodakto ti dakkel a layus ket dadaelekto ti intero a lubong. Isuamin nga awan iti daong matayto.’

Nagtulnog ni Noe ken ti annakna ken Jehova ket rinugiandan ti nagbangon. Ngem nagkatkatawa laeng dagiti dadduma a tattao. Awan namati ken Noe idi imbagana ti aramiden ti Dios.

Ti pamilia ni Noe iserserrekda dagiti animal ken taraon iti daong

Kalpasan adu a tawen, nalpasen ti daong. Ita imbaga ti Dios ken Noe nga iserreknan dagiti an-animal ken tumatayab idiay daong. Kuna ti Dios a mangyeg ti sagdudua ti dadduma a kita dagiti an-animal, agpadpada iti lalaki ken babai. Ngem iti dadduma nga an-animal, kuna ti Dios ken Noe a mangiyeg ti pito. Inaramid ni Noe ti imbaga ti Dios.

Kalpasanna, simrek metten ni Noe ken ti pamiliana idiay daong. Ket pinunitan ti Dios ti ruangan. Pagarupenyo nga addakay idiay uneg ti daong a kaduada, nga agur-uray. Addanto ngata layus?

Genesis 6:9-22; 7:1-9.



Dagiti Saludsod

  • Mano ti kameng ti pamilia ni Noe, ket ania ti nagan dagiti tallo nga annakna?
  • Ania ti karkarna nga impaaramid ti Dios ken ni Noe, ken apay?
  • Ania ti inaramid dagiti kaarruba ni Noe idi imbaga ni Noe kadakuada ti maipapan iti daong?
  • Ania ti imbaga ti Dios nga aramiden ni Noe kadagiti animal?
  • Kalpasan a pinunitan ti Dios ti ruangan ti daong, ania ti masapul nga aramiden ni Noe ken ti pamiliana?

Kanayonan a salsaludsod

  • Basaenyo ti Genesis 6:9-22.

    Apay a naisangsangayan ni Noe a managdaydayaw iti pudno a Dios? (Gen. 6:9, 22)

    Ania ti panangmatmat ni Jehova iti kinaranggas, ket kasano koma nga apektaran daytoy ti panangpilitayo iti paglinglingayan? (Gen. 6:11, 12; Sal. 11:5)

    Kasanotayo a matulad ni Noe no adda dagiti bilin nga aggapu ken ni Jehova babaen ti organisasionna? (Gen. 6:22; 1 Juan 5:3)

  • Basaenyo ti Genesis 7:1-9.

    Nupay imperpekto a tao ni Noe, isu ket imbilang ni Jehova a nalinteg. Kasano a makapabileg daytoy kadatayo ita? (Gen. 7:1; Prov. 10:16; Isa. 26:7)