Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 8: Dagiti Higante iti Daga

Estoria 8: Dagiti Higante iti Daga

NO ADDA nakitam kas katayag ti bobida ti balayyo, aniat’ kunam? Dayta a tao ti maysa a higante! Adda idi tiempo nga addada higante ditoy daga. Sadino ti naggapuanda?

Dagiti naranggas a higante

Ti dakes nga anghel a ni Satanas pinadpadasna a pagbalinen a dakes dagiti anghel ti Dios. Immay ti tiempo, a dadduma kadagitoy nga anghel dimngegda ken Satanas. Bimmabada ditoy daga ket nangaramidda ti bagbagi ti tao para kadakuada met laeng. Ammom kadi no apay?

Kuna ti Biblia a gapu ta nakitada dagiti napipintas a babbai ditoy daga ket kayatda nga asawaen ida. Kuna ti Biblia a dakes daytoy, ta inaramid ti Dios nga agtaeng dagiti anghel idiay langit.

Idi naaddaan annak dagitoy nga anghel ken ti assawada, dagitoy nga annak ti naidumada. Bayat a dumakdakkelda, dumakkelda a dumakkelen agingga a nagbalindan a higante.

Dagitoy a higante ti dakesda. Ket gapu ta dadakkel ken napigsada unay, saktanda dagiti tattao. Pinadpadasda a piliten tunggal maysa nga agbalin a dakes kas kadakuada.

Natayen ni Enoc, ngem adda maysa a tao ditoy daga ita a nasayaat. Noe ti nagan daytoy a tao. Aramidenna a kanayon ti kayat a paaramid ti Dios kenkuana.

Maysa nga aldaw kuna ti Dios ken Noe a dadaelennanto amin a dakes a tattao. Ngem ti Dios isalakanna ni Noe, ti pamiliana ken adu kadagiti an-animal. Kitaentayo no kasano nga inaramid ti Dios daytoy.

Genesis 6:1-8; Judas 6.



Dagiti Saludsod

  • Ania ti napasamak idi dimngeg ken ni Satanas dagiti dadduma nga anghel ti Dios?
  • Apay a dagiti dadduma nga anghel bimmabada ditoy daga?
  • Apay a saan nga umiso nga umay dagiti anghel ditoy daga ken mangaramidda iti bagbagi ti tao para kadakuada?
  • Ania ti nakaidumaan dagiti annak dagiti anghel?
  • Kas makitam iti ladawan, ania ti inaramid dagiti annak dagiti anghel idi nagbalinda a higante?
  • Kalpasan ni Enoc, siasino ti naimbag a tao a nagbiag ditoy daga, ket apay a kaay-ayo ti Dios?

Kanayonan a salsaludsod

  • Basaenyo ti Genesis 6:1-8.

    Kas ipakita ti Genesis 6:6, kasano nga apektaran ti kababalintayo ti rikna ni Jehova? (Sal. 78:40, 41; Prov. 27:11)

  • Basaenyo ti Judas 6.

    Ania ti maadaltayo ita kadagiti anghel idi kaaldawan ni Noe a “saan a nangtaginayon iti nakaisigudan a kasasaadda”? (1 Cor. 3:5-9; 2 Ped. 2:4, 9, 10)