Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 7: Ti Natured a Lalaki

Estoria 7: Ti Natured a Lalaki
Enoc

IDI mangrugin nga umadu ti tao ditoy daga, kaaduan ti nagaramid ti dakes kas ken Cain. Ngem adda maysa a lalaki a naiduma. Daytoy a lalaki ti agnagan Enoc. Natured a lalaki ni Enoc. Intultuloyna ti nagserbi iti Dios.

Ammom kadi no apay dagidiay a tattao idi ti nagaramidda ti adu a kinadakes? Panunotem, Asino kadi ti nakagapu ti isusukir da Adan ken Eva iti Dios? Wen, isu ti dakes nga anghel. Ti Biblia nagananna dayta ti Satanas. Kayatna amin nga agbalin a dakes.

Panagtakaw ken pammapatay

Maysa nga aldaw impaibaga ni Jehova a Dios ken Enoc kadagiti tattao ti maysa a banag a dida kayat a denggen. Isu daytoy: ‘Addanto aldaw a dadaelen ti Dios amin a dakes a tattao.’ Mabalin a makapungtot dagiti tattao a nakangngeg iti daytoy. Isu a masapul nga agbalin a natured ni Enoc.

Saan a pinagbiag ti Dios ni Enoc ti mabayag a kadua dagidiay dakes a tattao. Nagbiag laeng ni Enoc ti 365 a tawtawen. Pudno, dagiti tattao kadagidiay nga al-aldaw atatiddog ti biagda ngem itatta. Ni Matusalem nga anak ni Enoc ti nagbiag ti 969 a tawtawen!

Tattao nga agar-aramid iti dakes

Kalpasan ti ipapatay ni Enoc, dumakes a dumakes dagiti tattao. Kuna ti Biblia a ‘ti daga napunno ti kinaranggas.’

Ammom kadi ti maysa kadagiti rason nga adut’ riribok kadagidiay nga al-aldaw? Wen ta ni Satanas adda baro a pamay-anna a mangpaaramid ti dakes kadagiti tattao. Daytoy ti sumaganad a maammuantayo.

Genesis 5:21-24, 27; 6:5; Hebreo 11:5; Judas 14, 15.



Dagiti Saludsod

  • Kasano a naiduma ni Enoc?
  • Apay a nagaramid iti adu a kinadakes dagiti tattao idi kaaldawan ni Enoc?
  • Ania a kinadakes ti ar-aramiden dagiti tattao? (Kitaem ti ladawan.)
  • Apay a masapul nga agbalin a natured ni Enoc?
  • Kasano kaatiddog ti biag dagiti tattao idi, ngem kasano kapaut ti biag ni Enoc?
  • Ania ti napasamak kalpasan ti ipapatay ni Enoc?

Kanayonan a salsaludsod

  • Basaenyo ti Genesis 5:21-24, 27.

    Ania a kita ti relasion ti adda iti nagbaetan da Enoc ken Jehova? (Gen. 5:24)

    Sigun iti Biblia, siasino ti tao a kapautan a nagbiag, ket mano ti tawenna idi natay? (Gen. 5:27)

  • Basaenyo ti Genesis 6:5.

    Kasano kadakes ti kasasaad ti daga kalpasan ti ipapatay ni Enoc, ket kasano a maipada daytoy iti kaaldawantayo? (2 Tim. 3:13)

  • Basaenyo ti Hebreo 11:5.

    Ania a kualidad ni Enoc ti ‘nangay-ayo a naan-anay iti Dios,’ ket ania ti resultana? (Gen. 5:22)

  • Basaenyo ti Judas 14, 15.

    Kasano a matulad dagiti Kristiano ita ti kinatured ni Enoc iti panangpakdaarda kadagiti tattao maipapan iti um-umay a gubat ti Armagedon? (2 Tim. 4:2; Heb. 13:6)