Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 6: Ti Naimbag nga Anak, ken ti Dakes

Estoria 6: Ti Naimbag nga Anak, ken ti Dakes

KITAEM da Cain ken Abel itatta. Isuda dadakkeldan. Nagbalin a mannalon ni Cain. Isu ti agmulmula ti pagay ken prutas ken natnateng. Ni Abel ti nagbalin a pumapastor ti karnero.

Agidatdaton da Cain ken Abel iti Dios

Maysa nga aldaw, nangyeg da Cain ken Abel ti sagut iti Dios. Nangyeg ni Cain kadagiti taraon manipud mulmulana. Ket ni Abel nangyeg met ti kasasayaatan kadagiti karnerona. Ni Jehova naay-ayo ken Abel ken iti sagutna. Ngem saan a naay-ayo ken ni Cain ken ti sagutna. Ammom kadi no apay?

Saan laeng a gapu ta nasaysayaat ti sagut ni Abel ngem ti sagut ni Cain. Gapu ngamin ta naimbag a tao ni Abel. Inayatna ni Jehova ken ti kabsatna. Ngem ni Cain ket dakes; saanna nga inayat ti kabsatna.

Kuna ti Dios ken Cain a balbaliwanna ti ar-aramidna. Ngem nakapungtot unay ni Cain gapu ta ad-adda a kaykayat ti Dios ni Abel. Isu nga idi bukbukoddan idiay kataltalonan, pinang-or ni Cain ni kabsatna nga Abel ti napigsa nga isut’ nakatayanna. Saan kadi a nagdakes dayta?

Ti Dios malaglagipna pay ni Abel, uray no isut’ natayen. Saan a malipatan ni Jehova ti nasayaat a tao kas ken Abel. Maysa nga aldaw isublinto ni Jehova ni Abel iti biag. Ket saanton a matay ni Abel. Saan kadi a nagsayaat a makitatayto dagiti nasayaat a tattao kas ken Abel?

Agtaltalaw ni Cain kalpasan a pinapatayna ni Abel

Saan a maay-ayo ti Dios kadagiti tattao kas ken Cain. Isu a kalpasan ti panangpapatay ni Cain iti kabsatna, ti Dios ti nangdusa kenkuana. Isu ti impanawna ti adayo manipud dadduma iti pamiliana. Innala ni Cain ti maysa kadagiti kakabsatna a babbai, a nagbalin nga asawana.

Ti dadduma nga annak a lallaki ken babbai da Adan ken Eva ti nagaassawada ken naganakda met. Di nagbayag adun tattao ditoy daga. Intay ammuen ti dadduma kadakuada.

Genesis 4:2-26; 1 Juan 3:11, 12; Juan 11:25.



Dagiti Saludsod

  • Ania ti trabaho da Cain ken Abel?
  • Ania dagiti sagut nga inyeg da Cain ken Abel ken ni Jehova?
  • Apay a naay-ayo ni Jehova iti sagut ni Abel, ken apay a saan a naay-ayo iti sagut ni Cain?
  • Ania a kita ti tao ni Cain, ket kasano a pinadas ni Jehova nga ilinteg ni Cain?
  • Ania ti inaramid ni Cain idi duduadan ken ni Abel idiay kataltalonan?
  • Ania ti napasamak ken ni Cain kalpasan a pinapatayna ti kabsatna?

Kanayonan a salsaludsod

  • Basaenyo ti Genesis 4:2-26.

    Kasano nga inladawan ni Jehova ti napeggad a sasaaden ni Cain? (Gen. 4:7)

    Kasano nga impakita ni Cain no ania ti adda iti pusona? (Gen. 4:9)

    Ania ti panangmatmat ni Jehova iti panangpapatay iti awan basolna? (Gen. 4:10; Isa. 26:21)

  • Basaenyo ti 1 Juan 3:11, 12.

    Apay a nakapungtot unay ni Cain, ket kasano nga agserbi daytoy kas pakdaar kadatayo ita? (Gen. 4:4, 5; Prov. 14:30; 28:22)

    Kasano nga ipakita ti Biblia nga uray no dagiti kameng ti pamiliatayo ket busorenda ni Jehova, makapagtalinaedtayo latta a natarnaw? (Sal. 27:10; Mat. 10:21, 22)

  • Basaenyo ti Juan 11:25.

    Ania ti inkari ni Jehova kadagiti amin a matay maigapu iti kinalinteg? (Juan 5:24)

Ammuem ti Ad-adu Pay

Ania ti Masursurotayo Kada Cain ken Abel?

I-print-yo daytoy nga aktibidad, basaenyo dagiti teksto iti Biblia ken kompletuenyo ti dayalogo.

Abel—“Nupay Natay, Agsasao Pay Laeng”

Ania ti masursurotayo maipapan ken Abel ken iti pammatina uray bassit laeng ti dinakamat ti Biblia maipapan kenkuana?