Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 5: Nangrugi ti Kinarigat

Estoria 5: Nangrugi ti Kinarigat

IDIAY ruar ti hardin ti Eden, agtrabaho ti nadagsen da Adan ken Eva para iti taraonda. Imbes a dagiti napipintas a bungbunga ti kayo, nakitada ti adu a sisiit ken kalkalunay. Ngamin ta ni Adan ken Eva nagsukirda iti Dios ken nagsardengdan a gagayyemna.

Ni Adan agtrabtrabaho iti nadagsen a kadua ti anakna

Ngem dakdakes pay, nangrugin a matay da Adan ken Eva. Laglagipenyo a kuna ti Dios a matayda no manganda iti bunga daydiay maysa a kayo. Iti aldaw a pannanganda mangrugida metten a matay.

Amin dagiti annak da Adan ken Eva naiyanakdan kalpasan ti panangparuar ti Dios kadagiti dadakkelda manipud Hardin ti Eden. Kaipapanan daytoy a dagiti annak ti lumakaydanto met ken matayda.

No nagtulnog koma da Adan ken Eva ken ni Jehova, naragsak koma ti biag para kadakuada ken dagiti annakda. Awan koma ti lumakay, agsakit ken matay.

Kayat ti Dios a dagiti tattao agbiagda nga agnanayon iti kinaragsak, ket inkarina nga addanto aldaw a kasta. Isuamin agbalindanto a gagayyem ti Dios. Ken napintasto ti intero a daga.

Ni Eva ken dagiti annakna

Ngem ni Eva saanen a gayyem ti Dios. Isu nga idi ipasngayna dagiti annakna isu ti narigatan. Ti isusukir ken Jehova ti pudno a mangyeg ti adu a ladingit, saan kadi?

Adu ti annak da Adan ken Eva. Ti nagan ti inauna nga anakda isu ti Cain. Ket ti nagan ti maikadua nga anakda isu ti Abel. Ammom kadi no aniat’ napasamak kadakuada?

Genesis 3:16-23; 4:1, 2; Apocalipsis 21:3, 4.



Dagiti Saludsod

  • Ania ti kasasaad da Adan ken Eva iti ruar ti hardin ti Eden?
  • Ania ti nangrugi a mapasamak kada Adan ken Eva, ken apay?
  • Apay a lumakay ken matay dagiti annak da Adan ken Eva?
  • No nagtulnog koma da Adan ken Eva ken ni Jehova, ania koma ti kasasaadda ken dagiti annakda?
  • Kasano a nagrigat ni Eva gapu iti kinasukirna?
  • Ania ti nagan dagiti immuna a dua nga annak da Adan ken Eva?
  • Siasino dagiti dadduma pay nga ubbing iti ladawan?

Kanayonan a salsaludsod

  • Basaenyo ti Genesis 3:16-23 ken 4:1, 2.

    Kasano a naapektaran ti biag ni Adan gapu ti lunod iti daga? (Gen. 3:17-19; Roma 8:20, 22)

    Apay a maitutop ti nagan nga Eva, a kaipapananna “Daydiay Sibibiag”? (Gen. 3:20)

    Kasano a nangipakita ni Jehova iti konsiderasion kada Adan ken Eva uray pay kalpasan ti panagbasolda? (Gen. 3:7, 21)

  • Basaenyo ti Apocalipsis 21:3, 4.

    Ania dagiti “immuna a bambanag” a padpadaanam nga aglabas?