Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 4: Apay Napukawda ti Taengda

Estoria 4: Apay Napukawda ti Taengda

KITAEM ti mapaspasamak itan. Maparparuar da Adan ken Eva manipud hardin ti Eden. Ammom kadi no apay?

Maparparuar da Adan ken Eva iti hardin ti Eden

Ngamin ta nagaramidda ti banag a dakes unay, banag a naibaga kadakuada a dida ar-aramiden. Kuna ti Dios kadakuada a mabalinda ti mangan manipud kadagiti kaykayo ti hardin. Ngem manipud maysa a kayo kuna ti Dios a saanda a mangmangan, ta no saan matayda. Dayta a kayo ti kukuana laeng. Kas ammotayo, dakes ti mangala ti banag a saanmo a kukua, saan kadi?

Maysa nga aldaw, idi agmaymaysa ni Eva idiay hardin, nagsao ti maysa nga uleg kenkuana. Agasem dayta! Imbagana ken Eva a mangan ti bunga manipud kayo a kuna ti Dios kadakuada a saanda a kankanen. Ita, ammotayo a di agsao dagiti uleg, saan kadi? Gapuna adda maysa a namagsao iti uleg. Asino ngay dayta?

Saan a ni Adan. Ngarud isut’ maysa kadagiti anghel nga inaramid ni Jehova nabayagen sakbay nga inaramidna ti daga. Maysa nga anghel ti nagbalin a natangsit. Kayatna a dagiti tattao agtulnogda kenkuana imbes nga agtulnogda ken Jehova.

Daytoy nga anghel ti namagsao iti uleg. Kunana ken Eva nga isut’ agbalin kas Dios no mangan iti bunga, ket namati ni Eva. Gapuna a nangan, kasta met ni Adan. Nagsukirda iti Dios, gapuna napukawda ti napintas a pagtaenganda.

Ngem addanto aldaw, a pagbalinen met laeng ti Dios ti intero a daga a napintas kas ti hardin ti Eden. Maadaltayonto no kasano ti pannakibiangyo a mamagbalin a kasta. Ngem ita, intay kitaen no aniat’ napasamak kada Adan ken Eva.

Genesis 2:16, 17; 3:1-13, 24; Apocalipsis 12:9.



Dagiti Saludsod

  • Iti ladawan, ania ti mapaspasamak kada Adan ken Eva?
  • Apay a dinusa ida ni Jehova?
  • Ania ti imbaga ti uleg ken ni Eva?
  • Siasino ti namagsao iti uleg?
  • Apay a napukaw da Adan ken Eva ti Paraiso a pagtaenganda?

Kanayonan a salsaludsod

  • Basaenyo ti Genesis 2:16, 17 ken 3:1-13, 24.

    Kasano a ti saludsod ti serpiente ken ni Eva pinadakesna ni Jehova? (Gen. 3:1-5; 1 Juan 5:3)

    Kasano nga agserbi a pakaballaagantayo ni Eva? (Fil. 4:8; Sant. 1:14, 15; 1 Juan 2:16)

    Kasano nga inkalintegan da Adan ken Eva ti basolda? (Gen. 3:12, 13)

    Kasano a dagiti kerubin nga adda iti daya ti hardin ti Eden intandudoda ti kinasoberano ni Jehova? (Gen. 3:24)

  • Basaenyo ti Apocalipsis 12:9.

    Kasano kaballigi ni Satanas iti panangitallikudna kadagiti tattao maibusor iti turay ti Dios? (1 Juan 5:19)