Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Librok Dagiti Estoria ti Biblia

Estoria 10: Ti Dakkel a Layus

Estoria 10: Ti Dakkel a Layus

ITI ruar ti daong, kaskasdi a di mamati dagiti tattao nga umay ti Layus. Mabalin a dakdakkel pay ti katawada. Ngem di nagbayag nagsardengdan nga agkatkatawa.

Dagiti mabutbuteng a tattao ken an-animal a napalikmutan iti danum ti layus

Apaman latta ta agtinnagen ti danum. Husto ni Noe! Ngem naladawen para iti asinoman pay a makastrek iti daong. Ti ruangan ti sinerraan a naimbag ni Jehova.

Di nagbayag natinep aminen a nababa a disso. Ti danum nagbalinda kas dadakkel a karayan. Agbutengen dagiti tattao. Ay, nagimdengda la koman ken Noe. Ngem itatta naladawen.

Iti 40 nga aldaw ken 40 a rabii naibuyat ti danum manipud langit. Ngimmato ingganat’ sikigan ti bambantay, ken uray ti kangangatuan a bambantay naabbonganda. Kas kinuna ti Dios ken Noe, amin a tattao ken an-animal iti ruar ti daong natayda. Ngem amin nga adda iti uneg natalgedda.

Impangato ti danum ti daong, ket timpaw iti danum. Ket iti maysa nga aldaw, kalpasan panagsardeng ti tudo, simmilnag ti init. Anian a buya dayta! Isuamin a kitaam kasla maysa a nagdakkelan a baybay. Ti kakaisuna a makita isu ti daong a tumtumpaw.

Ti daong a tumtumpaw iti danum

Dagiti higante ti napukawdan. Natayda aminen, agraman dagiti innada ken amin dagiti dakes a tattao. Ngem ania ngay ti napasamak kadagiti ammada?

Ti amma dagiti higante saanda a tattao kas kadatayo. Isuda dagiti anghel a bimmaba a kas tattao ditoy daga. Idi immay ti Layus, nagsublida idiay langit kas dagiti anghel. Ngem saandan a napalubosan kas paset ti pamilia dagiti anghel ti Dios. Nagbalindan nga anghel ni Satanas. Ti Biblia awaganna ida dagiti demonio.

Itan pinagangin ti Dios, ket dagiti dandanum ti layus nangrugidan nga umes-es. Lima a bulan kamaudiananna nagdisso ti daong idiay tuktok ti bantay. Pagammuan dagidiay adda iti uneg ti daong makitadan ti tuktok dagiti bambantay.

Kalpasanna imbulos ni Noe ti nangisit a tumatayab a maaw-awagan wak iti ruar ti daong. Agtayab iti apagbiit ket santo agsubli, ta awan pay masarakanna a nasayaat a pagdissuanna.

Maysa a kalapati

Sumaganad, nangibaon ni Noe ti kalapati manipud daong. Ngem nagsubli met laeng ti kalapati ta di makakita ti lugar a paggiananna. Imbulos manen ni Noe ti kapamindua, ket dayta ti nangiyeg ti bulong ti olivo iti sippitna. Itan ammo ni Noe nga immes-esen ti danum. Imbulos manen ni Noe ti kalapati iti kapamitlo, ket daytat’ nakasaraken ti namaga a lugar a pagtaenganna.

Itan kuna ti Dios ken Noe: ‘Rumuarka iti daong. Alaem ti intero a pamiliam ken amin nga an-animal.’ Nasurok a makatawenda a nagian idiay uneg ti daong. Gapuna mailadawantayo ti ragsakda amin a makaruar manen ken ti panagbiagda.

Genesis 7:10-24; 8:1-17; 1 Pedro 3:19, 20.



Dagiti Saludsod

  • Apay nga awanen ti makastrek iti daong idi mangrugin nga agtudo?
  • Mano nga aldaw ken rabii a nagtudtudo, ket kasano kangato ti danum?
  • Ania ti napasamak iti daong idi mangrugin a ngumato ti danum?
  • Nakalasat kadi dagiti higante iti layus, ket ania ti nagbalinan dagiti ammada?
  • Ania ti napasamak iti daong kalpasan ti lima a bulan?
  • Apay a nangibulos ni Noe iti wak?
  • Kasano nga ammo ni Noe nga immes-esen ti danum?
  • Kalpasan ti nasurok a makatawen a nagyan iti daong da Noe ken ti pamiliana, ania ti imbaga ti Dios ken ni Noe?

Kanayonan a salsaludsod

  • Basaenyo ti Genesis 7:10-24.

    Kasano kasaknap ti pannakadadael ti biag ditoy daga? (Gen. 7:23)

    Kasano kapaut nga immes-es ti danum? (Gen. 7:24)

  • Basaenyo ti Genesis 8:1-17.

    Kasano nga ipakita ti Genesis 8:17 a saan a nagbalbaliw ti orihinal a panggep ni Jehova iti daga? (Gen. 1:22)

  • Basaenyo ti 1 Pedro 3:19, 20.

    Ania ti dusa dagiti rebelioso nga anghel idi nagsublida idiay langit? (Judas 6)

    Kasano a ti salaysay maipapan ken ni Noe ken ti pamiliana patibkerenna ti panagtalektayo iti abilidad ni Jehova a mangisalakan kadagiti adipenna? (2 Ped. 2:9)

Ammuem ti Ad-adu Pay

Ania ti Masursurotayo ken Noe?

I-download wenno i-print-yo daytoy nga aktibidad ken ammuenyo no kasano a matuladyo ti kinatulnog ni Noe.

“Nakipagna iti Pudno a Dios”

Ania a karit ti nakaipasanguan ni Noe ken ni baketna iti panangpadakkelda kadagiti annakda? Kasano nga impakitada ti pammati idi inaramidda ti daong?