Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agtalinaedka iti Ayat ti Dios

 KAPITULO 5

No Kasano ti Agtalinaed a Saan a Paset ti Lubong

No Kasano ti Agtalinaed a Saan a Paset ti Lubong

“Saankayo a paset ti lubong.”—JUAN 15:19.

1. Ania ti inyunay-unay ni Jesus iti daydi maudi a rabiina ditoy daga kas tao?

ITI maudi a rabiina ditoy daga kas tao, inyebkas ni Jesus ti napalalo a pannakaseknanna iti masanguanan a pagimbagan dagiti pasurotna. Inkararagna pay ketdi dayta. Kinunana iti Amana: “Kiddawek kenka, a saanmo nga ikkaten ida iti lubong, no di ket aywanam ida gapu iti daydiay nadangkes. Saanda a paset ti lubong, a kas kaniak a saan a paset ti lubong.” (Juan 17:15, 16) Iti daytoy a naimpusuan a dawatna, impakita ni Jesus ti nasged nga ayatna kadagiti pasurotna ken ti kinapateg ti immun-una nga imbagana iti dadduma kadakuada iti daydi met laeng a rabii: “Saankayo a paset ti lubong.” (Juan 15:19) Nalawag a nakapatpateg ken Jesus ti panagtalinaed dagiti pasurotna a saan a paset ti lubong!

2. Ania “ti lubong” a dinakamat ni Jesus?

2 “Ti lubong” a dinakamat ni Jesus tuktukoyenna ti intero a sangatauan a naisina iti Dios, iturturayan ni Satanas, ken iturturong ti espiritu ti panagimbubukodan ken kinatangsit nga aggubuay ken Satanas. (Juan 14:30; Efeso 2:2; 1 Juan 5:19) Kinapudnona, “ti pannakigayyem iti [dayta a] lubong ket pannakibusor iti Dios.” (Santiago 4:4) Ngem kasano a dagiti amin nga agtarigagay nga agtalinaed iti ayat ti Dios ket adda iti lubong ngem saanda a paset daytoy? Usigentayo ti lima a pamay-an: babaen ti panagtalinaed a nasungdo iti Pagarian ti Dios iti sidong ni Kristo ken panagtalinaed a neutral kadagiti napolitikaan nga aramid ti lubong, babaen ti panangsaranget iti espiritu  ti lubong, babaen ti naemma a panagkawkawes ken panaglanglangatayo, babaen ti panangsalimetmet iti simple a mata, ken babaen ti panangyaruat iti naespirituan a kabaltayo.

PANAGTALINAED A NASUNGDO KEN NEUTRAL

3. (a) Kasano ti panangmatmat ni Jesus iti politika idi kaaldawanna? (b) Apay a maikuna nga agserserbi kas embahador dagiti napulotan a pasurot ni Jesus? (Iraman ti footnote.)

3 Imbes a makiraman iti politika idi kaaldawanna, impamaysa ni Jesus nga inkasaba ti Pagarian ti Dios, ti nailangitan a gobierno a pagturayanna kas Ari. (Daniel 7:13, 14; Lucas 4:43; 17:20, 21) Dayta ti gapuna nga idi naisaklang iti Romano a Gobernador a ni Poncio Pilato, naikuna ni Jesus: “Ti pagariak saan a paset daytoy a lubong.” (Juan 18:36) Dagiti matalek a pasurotna tultuladenda ti ulidanna babaen ti panagtalinaedda a nasungdo kenni Kristo ken iti Pagarianna ken babaen ti panangiwaragawagda iti dayta a Pagarian iti intero a lubong. (Mateo 24:14) “Dakami ngarud ket embahador a mangisunsuno ken Kristo,” insurat ni apostol Pablo. “Kas dagiti suno ni Kristo ipakaasimi: ‘Makikappiakayo iti Dios.’” *2 Corinto 5:20.

4. Kasano nga iparparangarang dagiti amin a pudno a Kristiano ti kinasungdoda iti Pagarian ti Dios? (Kitaem ti kahon a “ Dagiti Nagkauna a Kristiano a Nagtalinaed a Neutral.”)

4 Gapu ta ganggannaet a turay wenno pagilian ti irepresentar dagiti embahador, saanda a makibiang kadagiti aramid dagiti pagilian a nakaibaonanda no di ket agtalinaedda a neutral. Nupay kasta, itantandudo dagiti embahador ti gobierno ti pagilian nga irepresentarda. Kasta met laeng kadagiti pudno a napulotan a pasurot ni Kristo, ta ti ‘pannakipagilida adda iti langlangit.’ (Filipos 3:20) Kinapudnona, gapu iti regtada a mangikaskasaba iti Pagarian, riniwriwen a “sabsabali a karnero” ni Kristo ti natulonganda a ‘makikappia iti Dios.’ (Juan 10:16; Mateo 25:31-40) Agserserbi dagiti “sabsabali a karnero” kas  mensahero ni Kristo a kabinnulig dagiti napulotan a kakabsat ni Jesus. Kas nagkaykaysa nga arban a mangitantandudo iti Mesianiko a Pagarian, agpada a salsalimetmetan dagitoy a grupo ti nainget a neutral a takder no maipapan kadagiti napolitikaan nga aramid ti lubong.—Isaias 2:2-4.

5. Ania ti nakaidumaan ti kongregasion Kristiano iti nagkauna nga Israel, ken ania ti epektona kadakuada dayta a nakaidumaanda?

 5 Saan laeng a ti kinasungdoda ken Kristo ti makagapu a neutral dagiti pudno a Kristiano. Saan a kas iti nagkauna nga Israel nga addaan iti bukod a pagilian nga inted ti Dios, datayo nga agkakabsat iti pammati ket agnanaed iti nagduduma a pagilian. (Mateo 28:19; 1 Pedro 2:9) No ngarud dumasigtayo kadagiti partido politikal iti lugar a pagnanaedantayo, maikompromiso ti wayawayatayo nga agsao maipapan iti Pagarian ken madadael ti panagkaykaysatayo kas Kristiano. (1 Corinto 1:10) Maysa pay, iti panawen ti gubat, ditay mabalin ti makiranget kadagiti kapammatiantayo ta naibilin nga agiinnayattayo. (Juan 13:34, 35; 1 Juan 3:10-12) Adda ngarud nasayaat a rason a binilin ni Jesus dagiti adalanna a saanda nga agiggem iti kampilan. Imbilinna pay nga ayatenda dagiti kabusorda.—Mateo 5:44; 26:52; kitaem ti kahon a napauluan iti “ Kanayon Kadi a Neutral ti Takderko?

6. Kasano nga apektaran ti panagdedikarmo iti Dios ti pannakilangenmo ken Cesar?

6 Kas pudno a Kristiano, indedikartayo ti biagtayo iti Dios, saan nga iti asinoman a tao, natauan nga organisasion, wenno nasion. Kuna ti 1 Corinto 6:19, 20: “Saanyo a kukua ti bagbagiyo, ta nagatangkayo iti maysa a gatad.” No kasta, nupay ited dagiti pasurot ni Jesus ti maiparbeng ken “Cesar” a dayaw, buis, ken relatibo a panagpasakup, itedda “iti Dios dagiti bambanag ti Dios.” (Marcos 12:17; Roma 13:1-7) Ramanen daytoy ti panagdayaw, amin-kararua a panagayat, ken nasungdo a panagtulnogda. No kasapulan, sidadaanda a matay gapu iti panagserbida iti Dios.—Lucas 4:8; 10:27; Aramid 5:29; Roma 14:8.

PANANGSARANGET ITI “ESPIRITU TI LUBONG”

7, 8. Ania ti “espiritu ti lubong,” ken kasano ti ‘panagtignay’ dayta nga espiritu iti maysa a tao?

7 Maipakita met dagiti Kristiano a saanda a paset ti lubong babaen ti panangsarangetda iti nagdakes nga espiritu ti lubong. “Inawattayo, saan a ti espiritu ti lubong, no di ket  ti espiritu nga aggapu iti Dios,” insurat ni Pablo. (1 Corinto 2:12) Kinunana kadagiti taga-Efeso: ‘Nagnakayo idi naminsan maitunos iti . . . daytoy a lubong, maitunos iti agturay iti autoridad ti angin, ti espiritu nga agtigtignay ita iti annak ti kinasukir.’—Efeso 2:2, 3.

8 Ti “angin” wenno espiritu ti lubong ket isu ti di makita, nabileg a puersa a mangtigtignay kadagiti tattao nga agsukir iti Dios ken mangiparparegta iti “derrep ti lasag ken ti derrep dagiti mata.” (1 Juan 2:16; 1 Timoteo 6:9, 10) Adda bileg wenno “autoridad” daytoy nga espiritu ti lubong gapu ta makakayaw iti managbasol a lasag, nasikap, di agsarday, ken nasaknap a kas iti angin. Maysa pay, “agtigtignay” daytoy iti maysa a tao babaen ti in-inut a panangpatanorna kadagiti dakes a kababalin kas iti panagimbubukodan, kinatangsit, inaagum nga ambision, ken ti pagannayasan a mangipasdek kadagiti bukod a moral a pagalagadan ken agrebelde iti autoridad. * Iti ababa a pannao, ti espiritu ti lubong in-inut a patanorenna iti puso ti maysa a tao dagiti kababalin ti Diablo.—Juan 8:44; Aramid 13:10; 1 Juan 3:8, 10.

9. Kadagiti ania a pamay-an a mabalin a makastrek ti espiritu ti lubong iti isip ken pusotayo?

9 Posible ngata nga agramut iti isip ken pusom ti espiritu ti lubong? Wen no ipalubosmo ken no dika agridam. (Proverbio 4:23) Masansan a di madmadlaw ti panangimpluensiana, nalabit babaen kadagiti kakadua a kasla naimbag a tattao ngem, kinapudnona, awan panagayatda ken Jehova. (Proverbio 13:20; 1 Corinto 15:33) Mabalin a makastrek met kenka dayta a makadangran nga espiritu babaen kadagiti naalas a babasaen, site iti Internet nga us-usaren dagiti apostata ken naglaon iti pornograpia, naalas a paglinglingayan, ken ay-ayam a nakaro ti sinnalisal—wen, babaen ti asinoman wenno aniaman a mangyanninaw iti panagpampanunot ni Satanas wenno ti lubong nga iturayanna.

10. Kasanotay a masaranget ti espiritu ti lubong?

 10 Kasanotay a masaranget ti nasikap nga espiritu ti lubong ken makapagtalinaed iti ayat ti Dios? Babaen laeng ti panangaprobetsar kadagiti naespirituan a probision ni Jehova ken ti kanayon a panangidawat iti tulong ti nasantuan nga espirituna. Nabilbileg nga amang ni Jehova ngem ti Diablo wenno ti dakes a lubong a tengtenglen ni Satanas. (1 Juan 4:4) Nagpateg ngarud nga agtalinaedtayo a nasinged ken Jehova babaen ti kararag!

 NAEMMA A PANAGKAWKAWES KEN PANAGLANGLANGA

11. Kasano nga inimpluensiaan ti espiritu ti lubong dagiti estandarte iti panagkawkawes?

11 Ti panagkawkawes, panaglanglanga, ken kinadalus ti bagi ti maysa a tao ipasimudaagna no ania nga espiritu ti mangtigtignay kenkuana. Iti adu a pagilian, bimmaban iti kasta unay dagiti estandarte iti panagkawkawes nga uray la kinuna ti maysa a komentarista iti telebision nga iti saan a mabayag saanton a mailasin no siasino dagiti balangkantis ken dagiti saan. Sumursurot metten iti uso uray dagiti bumalbalasitang nga ubbing. “Nakakitkiting dagiti kawesda,” kuna ti maysa a pagiwarnak. Adda met dagidiay uray ania lattan ti kawesda, a mangyanninaw iti espiritu ti panagrebelde ken kasta met ti kinaawan dignidad ken panagraem iti bagi.

12, 13. Ania dagiti prinsipio a rumbeng a mangiwanwan kadatayo no maipapan iti panagkawkawes ken panaglanglangatayo?

12 Kas ad-adipen ni Jehova, mayanatup laeng a kayattayo a makaay-ayo ti langatayo. Naurnos, nadalus, ken natakneng koma ti panagkawkawestayo, ken maitutop iti kasasaad. Iti amin a tiempo, rumbeng nga iyanninaw ti langatayo ti “kinaemma ken kinasimbeng ti panunot,” buyogen ti “naimbag nga ar-aramid.” Maitutop dayta iti amin—lalaki man wenno babai—nga “agkunkuna nga agraemda unay iti Dios.” Siempre, saan a ti langatayo ti kangrunaan a pakaseknantayo no di ket ti ‘panagtalinaedtayo iti ayat ti Dios.’ (1 Timoteo 2:9, 10; Judas 21) Wen, kayattayo a ti kapintasan nga arkostayo ket “ti nalimed a kinatao ti puso . . . , nga addaan dakkel a pateg iti imatang ti Dios.”—1 Pedro 3:3, 4.

13 Laglagipem met a ti panagkawkawes ken panaglanglangatayo maapektaranna ti panangmatmat dagiti sabsabali iti pudno a panagdayaw. Ti Griego a sao a naipatarus a “kinaemma,” no iti moral nga anagna, ipasimudaagna ti panangraem, panangikabilangan, ken panangrespeto iti rikrikna wenno kapanunotan ti sabsabali. No kasta, nasken nga ikabilangantayo ti konsiensia dagiti sabsabali uray pay no adda kalintegantayo a mangikeddeng no ania ti pagkawestayo. Kangrunaan iti  amin, kayattayo a maidaydayaw ni Jehova ken ti ilina. Kayattayo met nga ipakita a maikaritayo kas ministro ti Dios, nga ‘aramidentayo ti amin a bambanag a maipaay iti dayag ti Dios.’—1 Corinto 4:9; 10:31; 2 Corinto 6:3, 4; 7:1.

Pakaidayawan kadi ni Jehova ti panaglanglangak?

14. No maipapan iti panaglanglanga ken kinadalus, ania dagiti nasken nga isaludsodtayo iti bagitayo?

14 Ad-adda a napateg ti panagkawkawes, panaglanglanga, ken kinadalus ti bagi no addatayo iti tay-ak ti ministerio wenno iti gimong ti kongregasion. Isaludsodmo iti bagim: ‘Nakadidillaw kadi ti panaglanglangak ken nadugyotak kadi nga uray la ibaindak dagiti sabsabali? Napatpateg kadi kaniak ti kalintegak no kadagitoy a banag ngem ti panagbalin a maikari kadagiti pribilehio iti kongregasion?’—Salmo 68:6; Filipos 4:5; 1 Pedro 5:6.

15. Apay nga awan dagiti mabasatayo iti Biblia nga espesipiko a paglintegan no iti panagkawkawes, panaglanglanga, ken kinadalus?

15 Awan dagiti mabasatayo iti Biblia nga espesipiko a paglintegan para kadagiti Kristiano no iti panagkawkawes, panaglanglanga, ken kinadalus. Saan a kayat ni Jehova a mapaidamantayo iti wayawaya nga agpili wenno mangusar iti panunottayo. Imbes ketdi, kayatna a sursuruentayo nga usaren ti panunottayo a mangusig kadagiti prinsipio ti Biblia ken ‘babaen iti panangusar, masanay dagiti pannakabalin ti pannakaawattayo a mangilasin agpadpada iti umiso ken di umiso.’ (Hebreo 5:14) Kangrunaan iti amin, kayatna nga agpaidalantayo iti ayat—ayat iti Dios ken iti kaarruba. (Marcos 12:30, 31)  Gapu ta kasta, nadumaduma dagiti estilo ti panagkawkawes ken panaglanglanga. Makita ti kasta a panagduduma kadagiti naragsak a panagtataripnong dagiti agsasabali ti kolor ti kawesda nga adipen ni Jehova sadinoman a paset ti daga ti ayanda.

PAGTALINAEDENTAYO A “SIMPLE” TI MATATAYO

16. Kasano a maisupadi ti espiritu ti lubong iti pannursuro ni Jesus, ken ania dagiti nasken nga isaludsodtayo iti bagitayo?

16 Makaallilaw ti espiritu ti lubong, isut’ gapuna a riniwriw ti mamati a kuarta ken material a bambanag ti pagubbogan ti ragsak. Nupay kasta, kinuna ni Jesus: “Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Lucas 12:15) Nupay saan nga anamongan ni Jesus ti nakaro a panangpaidam iti bagi, insurona a ti biag ken napaypayso a ragsak ket mapasaran dagidiay “sipapanunot iti naespirituan a kasapulanda” ken dagidiay mangsalimetmet iti “simple” a mata a nakasentro iti maymaysa a panggep, kadagiti  naespirituan a banag. (Mateo 5:3; 6:22, 23) Isaludsodmo iti bagim, ‘Talaga kadi a patiek ti insuro ni Jesus, wenno naimpluensiaannakon “ti ama ti kinaulbod”? (Juan 8:44) Ania ti ipalgak ti sasaok, dagiti kalatko, dagiti ipangpangrunak, ken ti wagas ti panagbiagko?’—Lucas 6:45; 21:34-36; 2 Juan 6.

17. Ania ti dadduma kadagiti bendision a sagsagrapen dagidiay simple ti matada?

17 “Ti kinasirib mapaneknekan a nalinteg babaen iti ar-aramidna,” kinuna ni Jesus. (Mateo 11:19) Usigem ti sumagmamano laeng kadagiti bendision a sagsagrapen dagidiay simple ti matada. Pudno a mabangbang-aranda iti ministerioda. (Mateo 11:29, 30) Saanda a maringgoran iti kasta unay isu a nailiklikda iti adu a pakatuokan ti isip ken rikna. (1 Timoteo 6:9, 10) Gapu ta mapnekda kadagiti kangrunaan a kasapulan iti biag, ad-adu ti panawenda para iti pamilia ken kadagiti kapammatianda. Ket gapu iti dayta, mabalin a naim-imas ti turogda. (Eclesiastes 5:12) Sagsagrapenda ti dakdakkel a rag-o nga itden ti panangted, nga ar-aramidenda dayta iti aniaman a wagas a kabaelanda. (Aramid 20:35) Maysa pay, ‘aduanda iti namnama,’ natalna ti panunotda, ken kontentoda. (Roma 15:13; Mateo 6:31, 32) Pudno a di magatadan a bendision dagitoy!

PANANGYARUAT ITI “NAAN-ANAY A KABAL”

18. Ania ti kuna ti Biblia maipapan iti kabusortayo, dagiti pamay-anna, ken ti pannakidangadangtayo?

18 Dagidiay agtaltalinaed iti ayat ti Dios ket masalsalakniban met tapno saan ida a madangran ni Satanas. Ikagkagumaan ni Satanas a paidaman dagiti Kristiano, saan laeng nga iti ragsak, no di pay ket iti biag nga agnanayon. (1 Pedro 5:8) Kinuna ni Pablo: “Addaantayo iti pannakigubal, saan a maibusor iti dara ken lasag, no di ket maibusor kadagiti gobierno, maibusor kadagiti autoridad, maibusor kadagiti agturay iti lubong daytoy a kinasipnget, maibusor kadagiti nadangkes nga espiritu a puersa kadagiti nailangitan a disso.” (Efeso 6:12) Ti sao a “pannakigubal” ipasimudaagna a saan nga adayo ti ayan ti kabusortayo no di ket nakaas-asideg ta, no ar-arigen, mano-mano  ti pannakirangettayo. Maysa pay, ipakita dagiti termino a “gobierno,” “autoridad,” ken “agturay iti lubong” nga organisado unay ken naiplano ti panangraut dagiti di makita a kabusortayo.

19. Deskribirem ti naespirituan a kabal ti maysa a Kristiano.

19 Nupay kasta, makapagballigitayo latta iti baet dagiti pagkapuyan ken limitasiontayo kas tattao. Kasano? Babaen ti panangyaruattayo iti “naan-anay a kabal manipud iti Dios.” (Efeso 6:13) Maipapan iti dayta a kabal, kuna ti Efeso 6:14-18: “Agtakderkayo a sititibker a dagiti lomoyo nabariksan iti kinapudno, ken sikakapet ti kabal ti barukong nga isu ti kinalinteg, ket dagiti sakayo nasapatosan iti alikamen ti naimbag a damag ti kappia. Kangrunaan iti amin, alaenyo ti dakkel a kalasag ti pammati, a babaen iti dayta mabalinanyonto a depdepen amin dagiti sumsumged a gayang daydiay nadangkes. Kasta met, awatenyo ti kabal ti ulo [wenno, namnama] ti pannakaisalakan, ken ti kampilan ti espiritu, a dayta ti, sao ti Dios, bayat nga iti amin a langa ti kararag ken araraw itultuloyyo ti agkararag iti espiritu iti amin a gundaway.”

20. Kasano a naiduma ti kasasaadtayo iti kasasaad ti literal a soldado?

20 Yantangay naggapu iti Dios, sigurado a masalaknibannatayo dayta a naespirituan a kabal, no la ket ta kanayon nga aruattayo. Saan a kas kadagiti literal a soldado a mabalin nga adda dagiti panawen a mabayag nga awan dagiti gubat a pakirangetanda, awan sarday ti nainget a pannakiranget dagiti Kristiano ken sa la agpatingga dayta inton dumteng ti tiempo a panangdadael ti Dios iti lubong ni Satanas ken panangigarangugongna kadagiti amin a dakes nga espiritu iti mangliwengliweng nga abut. (Apocalipsis 12:17; 20:1-3) Dika ngarud sumuko no adda dagiti pagkapuyan wenno dakes a tarigagay a parparmekem, ta masapul a ‘disnogentayo’ ti bagitayo tapno agtalinaedtayo a matalek ken Jehova. (1 Corinto 9:27) Kinapudnona, ad-adda nga agdanagtayo no saantayo a makigubgubal!

21. Agballigitayo iti naespirituan a pannakidangadangtayo no la ket ta aramidentayo ti ania?

21 Maysa pay, saantayo nga agballigi iti daytoy a dangadang  iti bukodtayo a pigsa. Dayta ti gapuna nga impalagip ni Pablo a nasken nga agkararagtayo ken Jehova “iti espiritu iti amin a gundaway.” Malaksid iti dayta, nasken met nga umimdengtayo ken Jehova babaen ti panangadal iti Saona ken di panangliway iti panagtataripnongtayo kadagiti padatayo a “soldado,” ta saantayo nga agmaymaysa iti daytoy a dangadang! (Filemon 2; Hebreo 10:24, 25) Dagiti matalek kadagiti amin a nadakamat a benneg ket saan laeng nga agballigi no di pay ket sititibker a madepensaanda ti pammatida no masubok dayta.

NAKASAGANAKA KOMA A MANGIDEPENSA ITI PAMMATIM

22, 23. (a) Apay a masapul a kanayon a nakasaganatayo a mangidepensa iti pammatitayo, ken ania dagiti nasken nga isaludsodtayo iti bagitayo? (b) Ania ti mausig iti sumaganad a kapitulo?

22 “Agsipud ta saankayo a paset ti lubong,” kinuna ni Jesus, “guraennakayo ti lubong.” (Juan 15:19) Masapul ngarud a sisasagana dagiti Kristiano a mangidepensa iti pammatida, ngem iti nadayaw ken naalumamay a pamay-an. (1 Pedro 3:15) Isaludsodmo iti bagim: ‘Maawatak kadi no apay a no dadduma saan nga ar-aramiden dagiti Saksi ni Jehova ti ar-aramiden ti kaaduan? No salimetmetak ti kasta a takder, naan-anay kadi a kombinsidoak nga umiso ti ibagbaga ti Biblia ken ti klase matalek nga adipen? (Mateo 24:45; Juan 17:17) Ket no maipapan iti panangaramid iti umiso iti imatang ni Jehova, saanak laeng kadi a nakasagana nga agbalin a naiduma no di ket pagpannakkelko pay ti agbalin a naiduma?’—Salmo 34:2; Mateo 10:32, 33.

23 Nupay kasta, ti tarigagaytayo nga agtalinaed a saan a paset ti lubong ket masansan a masubok kadagiti nasikap a pamay-an. Kas pagarigan, nadakamat iti un-una ti kapitulo nga ikagkagumaan ti Diablo nga awisen dagiti adipen ni Jehova nga agbalin a paset ti lubong babaen ti nailubongan a paglinglingayan. Kasanotayo a makapili iti nasayaat a paglinglingayan a makapabang-ar ken mangted kadatayo iti nadalus a konsiensia? Mausig daytoy iti sumaganad a kapitulo.

^ par. 3 Manipud idi Pentecostes 33 K.P., agserserbi ni Kristo kas Ari iti kongregasion dagiti napulotan a pasurotna ditoy daga. (Colosas 1:13) Idi 1914, naisaad ni Kristo kas ari a mangituray ‘iti pagarian ti lubong.’ No kasta, agserserbi met ita dagiti napulotan a Kristiano kas embahador ti Mesianiko a Pagarian.—Apocalipsis 11:15.

^ par. 8 Kitaem ti Pannakirinnason Manipud Kadagiti Kasuratan, panid 143-47, nga impablaak dagiti Saksi ni Jehova.