Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agtalinaedka iti Ayat ti Dios

 APENDISE

Panagsaludo iti Bandera, Panagbutos, ken Serbisio Sibil

Panagsaludo iti Bandera, Panagbutos, ken Serbisio Sibil

Panagsaludo iti Bandera. Patien dagiti Saksi ni Jehova a ti panagrukbab wenno panagsaludo iti bandera a masansan a mabuyogan iti kanta ket maysa a narelihiosuan nga aramid kas panangbigbig a ti pannakaisalakan ket maigapu iti Estado wenno kadagiti liderna, saan nga iti Dios. (Isaias 43:11; 1 Corinto 10:14; 1 Juan 5:21) Ni Nabucodonosor nga ari ti nagkauna a Babilonia ti maysa kadagiti kasta a lider. Tapno agsiddaaw dagiti tattao iti kinadaegna ken kinapasnekna iti relihion, nangibangon daytoy a nabileg nga ari iti dakkel a ladawan sa imbilinna kadagiti iturayanna nga agrukbabda iti dayta bayat nga adda mapatpatokar a musika, nga umasping ita iti nailian a kanta. Nupay kasta, ti tallo a Hebreo a da Sidrac, Mesac, ken Abednego ket nagkedked nga agrukbab iti dayta a ladawan uray pay no patay ti dusada.—Daniel, kapitulo 3.

Iti kaaldawantayo, “ti bandera ti kangrunaan a simbolo ti nasionalismo ken ti kapatgan a banag a pagdaydayawan dagidiay mamati iti nasionalismo,” insurat ti historiador a ni Carlton Hayes. “Aglugay dagiti lallaki no mailabas ti bandera; ken kas panagdayaw iti bandera, dagiti mannaniw nangputarda kadagiti daniw ket dagiti ubbing agkantada kadagiti himno.” Innayonna pay a malaksid iti dayta, addaan met ti nasionalismo kadagiti “nasantuan nga aldaw,” kas iti Maikapat nga Aldaw ti Hulio iti Estados Unidos, kasta met nga addaan dayta kadagiti “santo ken bannuar” ken “templo,” wenno sagrado a luglugar. Iti maysa a seremonia iti publiko idiay Brazil, binigbig ti presidente ti Superior Military Court: “Mararaem ken madaydayaw ti bandera . . . no kasano a madaydayaw ti nakayanakan a daga.” Wen, “sagrado ti bandera, kas iti krus,” kuna idi ti The Encyclopedia Americana.

 Iti nabiit pay, kinuna ti nadakamat nga ensiklopedia a ti nailian a kanta ket “ebkas ti panagayat iti pagilian ken masansan nga iramanna ti panagkiddaw iti pannarabay ken pannalaknib ti Dios kadagiti tattao wenno kadagiti agturay kadakuada.” Nainkalintegan ngarud a dagiti Saksi ni Jehova ibilangda a narelihiosuan dagiti patriotiko a seremonia a pakairamanan ti panagsaludo iti bandera ken panagkanta kadagiti nailian a kanta. Kinapudnona, maipapan iti panagkedked dagiti annak dagiti Saksi ni Jehova nga agsaludo iti bandera wenno mangyebkas iti sapata ti kinasungdo a maar-aramid kadagiti eskuelaan iti Estados Unidos, kastoy ti kuna ti libro a The American Character: “Iti nagsasaganad a kaso, pinatalgedan kamaudiananna ti Korte Suprema a dagitoy nga inaldaw a ritual ket narelihiosuan.”

Nupay saan a makiramraman dagiti adipen ni Jehova kadagiti seremonia nga ibilangda a saan a nainkasuratan, raemenda ti kalintegan dagiti sabsabali a mangaramid iti dayta. Raraemenda met dagiti bandera kas emblema ken bigbigenda dagiti agtuturay iti gobierno kas “nangatngato nga autoridad” nga agserserbi kas “ministro ti Dios.” (Roma 13:1-4) Gapuna, kas naidagadag nga aramiden dagiti Kristiano, dagiti Saksi ni Jehova ikararaganda dagiti ‘ar-ari ken dagiti amin nga adda iti nangato a saad.’ Nupay kasta, ti motibotayo ket “tapno maitultuloytayo ti agbiag a natalinaay ken naulimek buyogen ti naan-anay a nadiosan a debosion ken kinaserioso.”—1 Timoteo 2:2.

Panagbutos kadagiti napolitikaan nga eleksion. Dagiti pudno a Kristiano raemenda ti kalintegan dagiti sabsabali nga agbutos. Saanda nga agprotesta maibusor iti eleksion, ken makikooperarda kadagiti nabutosan nga agtuturay. Nupay kasta, nainget ti panangsalimetmetda iti neutral a takderda no mainaig kadagiti napolitikaan nga aramid dagiti nasion. (Mateo 22:21; 1 Pedro 3:16) Ania ti rumbeng nga aramiden dagiti Kristiano nga agnanaed kadagiti pagilian nga inkapilitan ti panagbutos wenno nakaro ti pannakabusor dagidiay saan a mapan iti pagbutosan? Laglagipem a da Sidrac, Mesac, ken Abednego napanda idi idiay tanap ti Dura. Gapuna, ti maysa a Kristiano nga adda iti umasping a kasasaad, mabalinna nga ikeddeng ti mapan iti pagbutosan no ipalubos ti konsiensiana. Ngem nasken nga agannad tapno saan a masalungasing ti neutral a takderna. Masapul nga ikabilanganna dagiti sumaganad nga innem a prinsipio:

  1.   Dagiti pasurot ni Jesus ket ‘saan a paset ti lubong.’—Juan 15:19.

  2. Dagiti Kristiano ireprepresentarda ni Kristo ken ti Pagarianna.—Juan 18:36; 2 Corinto 5:20.

  3. Ti kongregasion Kristiano ket nagkaykaysa iti pammati, ken nareppet iti ayat dagiti miembrona.—1 Corinto 1:10; Colosas 3:14.

  4. Adda sungsungbatan dagidiay mangibutos iti maysa nga opisial iti aniaman nga aramiden ti imbutosda.—Imutektekam dagiti prinsipio a nailanad iti 1 Samuel 8:5, 10-18 ken 1 Timoteo 5:22.

  5. Iti imatang ni Jehova, isu ket linaksid dagiti Israelita idi tinarigagayanda ti maaddaan iti tao a mangituray kadakuada.—1 Samuel 8:7.

  6. Masapul a nawaya dagiti Kristiano a mangisarsarita iti maipapan iti Pagarian ti Dios kadagiti amin a tattao, aniaman ti napolitikaan nga ideolohiada.—Mateo 24:14; 28:19, 20; Hebreo 10:35.

Serbisio Sibil. Iti dadduma a pagilian, iparebbeng ti Estado a dagidiay agkedked nga agsoldado makiramanda iti serbisio sibil iti sumagmamano a tiempo. Masapul nga agkararagtayo no agdesisiontayo mainaig iti daytoy a banag. Mabalintay met ti makisarita maipapan iti dayta iti padatayo a Kristiano a nataengan ti panagpampanunotna. Kalpasanna usarentayo ti konsiensiatayo nga agdesision maibatay iti ammotayo maipapan iti dayta a banag.—Proverbio 2:1-5; Filipos 4:5.

Kuna ti Sao ti Dios nga ‘agtulnogtayo kadagiti gobierno ken autoridad kas agtuturay, a sisasaganatayo iti tunggal naimbag nga aramid, nga agbalintayo a nainkalintegan.’ (Tito 3:1, 2) Bayat a sipapanunottayo iti dayta, mabalintay nga isaludsod iti bagbagitayo: ‘No aramidek ti maysa a kita ti serbisio sibil, maikompromisok ngata ti neutral a takderko kas Kristiano wenno maikalam-itak ngata iti palso a relihion?’ (Mikias 4:3, 5; 2 Corinto 6:16, 17) ‘Marigatan wenno malapdannak ngata daytoy a mangitungpal kadagiti responsabilidadko kas Kristiano?’ (Mateo 28:19, 20; Efeso 6:4; Hebreo 10:24, 25) ‘Iti sabali a bangir, no aramidek daytoy a kita ti serbisio, maaddaanak ngata iti ad-adu a tiempo a mangpalawa kadagiti naespirituan nga aktibidadko, nalabit babaen ti pannakiramanko iti amin-tiempo a ministerio?’—Hebreo 6:11, 12.

No ipalubos ti konsiensia ti maysa a Kristiano nga aramidenna ti maysa a kita ti serbisio sibil imbes nga agpaibalud, ti desisionna ket  raemen koma dagiti padana a Kristiano. (Roma 14:10) Ngem no iti panagriknana ket saanna a mabalin nga aramiden ti kasta a serbisio, raemen met koma dagiti sabsabali dayta a desisionna.—1 Corinto 10:29; 2 Corinto 1:24.

 

Ammuem ti Ad-adu Pay

LIBRO KEN BROSHUR

Nasungdo a Panangsuporta iti Gobierno ti Dios—Awanen Sabali

Adda di ninamnama a nangalun-on iti “karayan” ti pannakaidadanes a napasaran dagiti Saksi ni Jehova gapu iti neutral a takderda iti politika.