Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agtalinaedka iti Ayat ti Dios

 APENDISE

Maisardengmo ti Masturbasion

Maisardengmo ti Masturbasion

Ti masturbasion ket maysa nga ugali a saan a makaay-ayo iti Dios. Nalapunos iti derrep ken narugit ti adda iti panunot ti tao a mangar-aramid iti kasta. * Mabalin a paggartemanna pay dagiti sabsabali, a pagpapasan laeng iti derrep ti pangibilanganna kadakuada. Inton agangay, matmatannanton ti sekso, saan a kas ebkas ti ayat ti dua a tao nga agpimpinnateg, no di ket kas nainlasagan nga aramid a mangted iti apagkanito laeng a ragsak ken pangibulosan iti seksual a rikna. Ngem iti kinapudnona, ti masturbasion riingenna dagiti kameng ti bagi “no maipapan iti pannakiabig, kinarugit, [ken ti di umiso a] panaggartem iti sekso” imbes a papatayenna dagita.—Colosas 3:5.

Insurat ni apostol Pablo: “Dungdungnguen, dalusantayo koma ti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.” (2 Corinto 7:1) Saanka a maawanan iti namnama no marigrigatanka a mangyaplikar kadagita a sasao. Ni Jehova ket kanayon a “sisasagana a mamakawan” ken tumulong. (Salmo 86:5; Lucas 11:9-13) Kinapudnona, no konkondenarennaka ti pusom ken ikagkagumaam nga isardeng dayta nga ugali—nupay sagpaminsan a mailaw-anka—kayatna a sawen nga addaanka iti nasayaat a kababalin. Laglagipem met a ti “Dios dakdakkel ngem kadagiti pusotayo ket ammona ti amin a bambanag.” (1 Juan 3:20) Saan laeng a dagiti basoltayo ti kitkitaen ti Dios; kitkitaenna ti intero a kinataotayo. Gapu ta am-ammonatayo unay, denggenna buyogen ti  pannakipagrikna dagiti napasnek a panagdawattayo iti asina. Gapuna, pulos a dika koma mauma nga umadani iti Dios babaen ti napakumbaba ken napasnek a panagkararag, kas iti maysa nga ubing nga agkamang iti amana no adda peggad. Paraburannaka ni Jehova iti nadalus a konsiensia. (Salmo 51:1-12, 17; Isaias 1:18) Siempre, masapul nga agtignayka a maitunos kadagiti kararagmo. Kas pagarigan, ikagumaam a liklikan ti amin a kita ti pornograpia ken dagiti dakes a pannakitimpuyog. *

No marigatanka a mangisardeng iti masturbasion, pangngaasim ta makisaritaka iti Kristiano a nagannak wenno iti nataengan iti naespirituan ken maseknan a gayyem. *Proverbio 1:8, 9; 1 Tesalonica 5:14; Tito 2:3-5.

^ par. 1 Ti masturbasion ket panangpennek iti seksual a tarigagay babaen ti panangay-ayam iti mabagbagi.

^ par. 2 Kas praktikal nga addang tapno makontrol ti pannakausar ti kompiuter iti pagtaengan, adu a pamilia ti mangikabil iti dayta iti lugar a makitkita dagiti amin a kameng ti pamilia. Malaksid iti dayta, adda dagiti pamilia a gumatgatang iti software, wenno programa ti kompiuter, a manglapped iti panagparang wenno iseserrek dagiti naalas a material no madamada nga agin-Internet. Nupay kasta, awan ti software a naan-anay a mapagpannurayan.

^ par. 1 Para kadagiti praktikal a singasing no kasano nga isardeng ti masturbasion, kitaem ti artikulo nga “Agimtuod Dagiti Agtutubo . . . Kasano a Maparmekko Daytoy nga Aramid?” iti Nobiembre 2006 a ruar ti Agriingkayo!, ken ti panid 178-182 ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 1.