Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Agtalinaedka iti Ayat ti Dios

 KAPITULO 1

“Daytoy ti Kaipapanan ti Ayat iti Dios”

“Daytoy ti Kaipapanan ti Ayat iti Dios”

“Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”—1 JUAN 5:3.

1, 2. Ania ti nanggutugot kenka a mangayat ken Jehova a Dios?

AY-AYATEM kadi ti Dios? No indedikarmon ti biagmo ken Jehova, sigurado a nabatad a wen ti sungbatmo—ket maiparbeng laeng a kasta! Rumbeng laeng nga ayatentayo ni Jehova. Kinapudnona, ay-ayatentayo ti Dios gapu iti panagayatna kadatayo. Kastoy ti kuna ti Biblia: “No maipapan kadatayo, agayattayo, agsipud ta isu [ni Jehova] ti immuna a nagayat kadatayo.”—1 Juan 4:19.

2 Ni Jehova ti immuna a nagayat kadatayo. Intedna a pagtaengantayo ti napintas a daga. Ipapaayna dagiti pisikal ken material a kasapulantayo. (Mateo 5:43-48) Napatpateg pay, ipapaayna dagiti naespirituan a kasapulantayo. Intedna kadatayo ti Saona, wenno ti Biblia. Kanayonanna, aw-awisennatayo nga agkararag kenkuana ket impanamnamana nga ipangagnatayo ken tulongannatayo babaen ti nasantuan nga espirituna. (Salmo 65:2; Lucas 11:13) Kangrunaan iti amin, imbaonna kas Mannubbottayo ti ipatpategna unay nga Anak tapno maisalakantayo manipud iti basol ken ipapatay. Anian a naindaklan nga ayat ti impakita ni Jehova kadatayo!—Juan 3:16; Roma 5:8.

3. (a) Tapno agtalinaedtayo iti ayat ti Dios, ania ti nasken nga aramidentayo? (b) Ania a napateg a saludsod ti nasken nga usigentayo, ken pakasarakantayo iti sungbat dayta a saludsod?

3 Kayat ni Jehova a magunggonaantayo nga agnanayon  iti ayatna. Ngem adda dayta iti tunggal maysa kadatayo. Idagadag kadatayo ti Sao ti Dios: “Pagtalinaedenyo ti bagbagiyo iti ayat ti Dios . . . a maipaay iti agnanayon a biag.” (Judas 21) Ti sasao a “pagtalinaedenyo ti bagbagiyo” ipasimudaagna a tapno agtalinaedtayo iti ayat ti Dios, adda nasken nga aramidentayo. Masapul a subadantayo ti ayatna babaen kadagiti aramidtayo. Nasken ngarud nga iyimtuodtayo daytoy a napateg a saludsod, ‘Kasanok a maipakita ti ayatko iti Dios?’ Masarakan ti sungbat kadagiti naipaltiing a sasao ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Nasayaat no usigentayo a naimbag ti kaipapanan dagita a sasao, ta kayattayo  nga ipakita iti Dios no kasano kadakkel ti panagayattayo kenkuana.

“DAYTOY TI KAIPAPANAN TI AYAT ITI DIOS”

4, 5. Kasano a rimmusing dita pusom ti ayat ken Jehova?

4 “Ti ayat iti Dios”—ania ti adda iti panunot ni apostol Juan idi insuratna dagita a sasao? Malagipmo kadi no kaano a rimmusing dita pusom ti ayat ken Jehova?

Ti dedikasion ken bautismo ti pangrugian ti panagbiag a nabuyogan iti panagtulnog ken Jehova gapu iti ayat

5 Panunotem iti apagbiit daydi tiempo idi damo a naammuam ti maipapan kenni Jehova ken dagiti panggepna ket nangrugi a naaddaanka iti pammati. Naawatam a nupay nayanakka a managbasol a naisina iti Dios, linuktan ni Jehova babaen ken Kristo ti gundaway tapno magun-odmo ti biag nga agnanayon iti sidong ti perpekto a kasasaad a napukaw ni Adan. (Mateo 20:28; Roma 5:12, 18) Naamirismo a dakkel a sakripisio ti inaramid ni Jehova iti panangibaonna iti ipatpategna unay nga Anak tapno matay gapu kenka. Natignay ti pusom ket rimmusing iti kaunggam ti ayat iti Dios a nangipakita kenka iti kasta a naindaklan nga ayat.—1 Juan 4:9, 10.

6. Kasano a mayebkas ti napaypayso nga ayat, ket ti ayatmo iti Dios ginutugotnaka a mangaramid iti ania?

6 Nupay kasta, pangrugian laeng ti napaypayso a panagayat ken Jehova ti pannakarikna iti ayat kenkuana. Ti ayat ket saan laeng a basta rikna. Ti pudno a panagayat iti Dios ket saan laeng a basta panangikuna iti, “Ay-ayatek ni Jehova.” Kas iti pammati, aramid ti pakakitaan no addaantayo iti napaypayso nga ayat. (Santiago 2:26) Mayebkastayo ti ayat babaen kadagiti aramid a makaay-ayo iti daydiay ay-ayatentayo. Idi ngarud nagramut dita pusom ti ayat ken Jehova, naaddaanka iti tarigagay nga agbiag iti wagas a makaay-ayo iti nailangitan nga amam. Maysaka kadi a bautisado a Saksi? No kasta, daytoy a nasged a pammateg ken debosion ti nanggutugot kenka a mangaramid iti kapatgan a desision iti biagmo. Indedikarmo ti bagim ken Jehova tapno  aramidem ti pagayatanna, ket insimbolom dayta babaen ti panagpabautisarmo. (Roma 14:7, 8) Ti panangtungpal iti daytoy a naimpusuan a kari ken Jehova ramanenna ti panangaramid iti simmaruno a dinakamat ni apostol Juan.

“TUNGPALENTAYO DAGITI BILINNA”

7. Ania ti dadduma kadagiti bilin ti Dios, ken ania ti ramanen ti panangtungpal kadagita?

7 Inlawlawag ni Juan no ania ti kaipapanan ti panagayat iti Dios: “Tungpalentayo dagiti bilinna.” Ania dagiti bilin ti Dios? Adu nga espesipiko a bilin ti inted ni Jehova kadatayo babaen ti Saona, wenno ti Biblia. Kas pagarigan, iparitna dagiti aramid a kas iti panagbartek, pannakiabig, idolatria, panagtakaw, ken panagulbod. (1 Corinto 5:11; 6:18; 10:14; Efeso 4:28; Colosas 3:9) Ti panangtungpal kadagiti bilin ti Dios ramanenna ti panagbiag a mayannurot kadagiti nalawag a moral a pagalagadan ti Biblia.

8, 9. Kasanotay a maammuan no ania ti makaay-ayo ken Jehova uray no awan ti espesipiko a linteg ti Biblia a mainaig kadagiti situasion a pakaipasanguantayo? Mangtedka iti pagarigan.

8 Ngem tapno maay-ayo ni Jehova, saan nga umdas ti basta panangtungpal kadagiti espesipiko a bilinna. Dinatay inaladan ni Jehova kadagiti linteg a mangiturong iti amin nga aspeto ti inaldaw a panagbiagtayo. Gapu ta kasta, mabalin nga awan dagiti espesipiko a bilin ti Biblia a mainaig iti adu a situasion a pakaipasanguantayo iti inaldaw. Kadagita a kasasaad, kasanotay a maammuan no ania ti makaay-ayo ken Jehova? Silalawag nga ipakita ti Biblia no kasano ti panangmatmat ti Dios kadagiti bambanag. Iti panagadaltayo iti Biblia, maammuantayo no ania ti kaay-ayo ni Jehova ken no ania ti kagurana. (Salmo 97:10; Proverbio 6:16-19) Masinunuotayo dagiti kababalin ken aramid a makaay-ayo kenkuana. No ad-adu ti ammotayo maipapan iti personalidad ken kadagiti wagas ni Jehova, ad-adda a maitunostayo dagiti pangngeddeng ken aramidtayo iti wagas ti panagpampanunotna. No kasta, uray no awan ti espesipiko a linteg ti Biblia  a mainaig kadagiti situasion a pakaipasanguantayo, masansan a maawatantayo “no ania ti pagayatan ni Jehova.”—Efeso 5:17.

9 Kas pagarigan, awan ti espesipiko a bilin ti Biblia a mangiparit iti panagbuya kadagiti pelikula wenno programa iti telebision a mangiparparang iti nakaro a kinaranggas wenno seksual nga imoralidad. Ngem kasapulantay aya ti espesipiko a linteg a mangiparit iti panagbuya kadagita? Ammotayo ti panangmatmat ni Jehova kadagitoy a banag. Nalawag ti kuna ti Biblia: “Asinoman a mangay-ayat iti kinaranggas pudno unay a guraen [ni Jehova].” (Salmo 11:5) Kunana pay: “Ti Dios ukomennanto dagiti mannakiabig ken dagiti mannakikamalala.” (Hebreo 13:4) No utobentayo dagita a naipaltiing a sasao, silalawag a maawatantayo no ania ti pagayatan ni Jehova. Ditay ngarud agbuya kadagiti agdadata ti pannakaiparangna nga aramid a kagura ti Diostayo. Ammotayo a maragsakan ni Jehova no liklikantayo ti narugit nga aramid nga ididiaya ti lubong kas di makadangran a paglinglingayan. *

10, 11. Apay a kayattayo ti agtulnog ken Jehova, ken ania a kita ti panagtulnog ti kalikagumanna kadatayo?

10 Ania ti kangrunaan a makagapu a tungpalentayo dagiti bilin ti Dios? Iti tunggal aldaw, apay a tarigagayantayo ti agbiag a mayannurot iti ammotayo a panangmatmat ti Dios? Kayattay nga aramiden dayta saan a tapno laeng maliklikantayo ti pannusa wenno dagiti dakes a bunga ti aramid dagidiay di mangikankano iti pagayatan ti Dios. (Galacia 6:7) Imbes ketdi, ibilangtayo ti panagtulnog ken Jehova kas napateg a gundaway a maipakitatayo ti ayattayo kenkuana. Kas iti anak a kayatna a paragsaken ti amana, kayattayo met a paragsaken ni Jehova. (Salmo 5:12) Ay-ayatentayo ni Jehova ta isu ti Amatayo. Awanen ti sabali pay a mangted  kadatayo iti dakdakkel a rag-o wenno naun-uneg a pannakapnek ngem ti pannakaammotayo nga agbibiagtayo iti wagas a “makagun-od iti anamong manipud ken Jehova.”—Proverbio 12:2.

11 No kasta, saan a mapilpilit ti panagtulnogtayo. * Saantayo met a pilien no ania kadagiti bilin ti Dios ti kayattayo a tungpalen, nga agtulnogtayo laeng no nanam-ay nga aramiden dayta wenno no bassit laeng wenno awan a pulos ti ipagtengna a pakarigatan. Imbes ketdi, ‘agtulnogtayo manipud iti puso.’ (Roma 6:17) Ti riknatayo ket kas iti narikna ti salmista iti Biblia a nangisurat iti kastoy: “Ipakitakto ti panangay-ayat kadagiti bilinmo nga inayatko.” (Salmo 119:47) Wen, pagay-ayattayo ti agtulnog ken Jehova. Ammotayo a maikari ni Jehova iti naan-anay ken awan kondisionna a panagtulnogtayo ken kalikagumanna ti kasta a panagtulnog. (Deuteronomio 12:32) Kayattayo a ti makuna ni Jehova maipapan kadatayo ket kas iti kuna ti Saona maipapan ken Noe. Impakita dayta a matalek a patriarka ti panagayatna iti Dios babaen ti panagtulnogna iti unos ti pinulpullo a tawen. Kastoy ti kuna ti Biblia maipapan kenkuana: “Inaramid ni Noe ti maitunos iti isuamin nga imbilin kenkuana ti Dios. Inaramidna ti kasta met laeng.”—Genesis 6:22.

12. Kaano a mangparagsak iti puso ni Jehova ti panagtulnogtayo?

12 Ania ti rikna ni Jehova no sidadaantayo nga agtulnog? Kuna ti Saona a ‘maparagsaktayo ti pusona.’ (Proverbio 27:11) Talaga kadi a maragsakan ti puso ti Soberano nga Apo iti uniberso no agtulnogtayo kenkuana? Wen, ket adda nasayaat a panggapuanna nga agrag-o! Pinarsuanatayo ni Jehova nga addaan iti wayawaya nga agpili. Adda kadatayo no kayattayo ti agtulnog wenno agsukir iti Dios. (Deuteronomio  30:15, 16, 19, 20) No sibubulos nga agtulnogtayo iti Dios gapu ta ti pusotayo ket napno iti ayat kenkuana, maay-ayo ken maragsakan unay ti nailangitan nga Amatayo. (Proverbio 11:20) Pilpilientayo ti kasayaatan a wagas ti panagbiag.

“DAGITI BILINNA SAANDA A MAKAPADAGSEN”

13, 14. Apay a maikuna a ‘saan a makapadagsen dagiti bilin’ ti Dios, ken kasano a mayilustrar daytoy?

13 Adda makaliwliwa unay nga imbaga ni apostol Juan maipapan kadagiti bilin ni Jehova: “Dagiti bilinna saanda a makapadagsen.” “Nabantot” ti literal a kaipapanan ti sao a Griego a naipatarus a “makapadagsen” iti 1 Juan 5:3. * Kastoy ti kuna ti sabali pay a patarus ti Biblia: “Saan a narigat a tungpalen dagiti bilbilinna.” (Ti Baro a Naimbag a Damag Biblia) Nainkalintegan ken saan a narigat a tungpalen dagiti bilin ni Jehova. Dagiti lintegna ket kabaelan a tungpalen dagiti imperpekto a tattao.

14 Kas ilustrasion, ibagatayon nga agpatpatulong kenka ti nasinged a gayyemmo iti iyaakarna iti pagtaengan. Kinarton dagiti bagkatenyo. Nalag-an ti dadduma kadagita ken kabaelan a bagkaten ti uray maysa laeng a tao, ngem dua a tao ti kasapulan a mangbagkat kadagiti dadduma gapu ta nadagsen dagitoy. Pilien ti gayyemmo dagiti karton nga ipabagkatna kenka. Dagiti ngata karton nga ammona a dimo kabaelan a bagkaten ti ipaawitna kenka? Saan. Dina ipabagkat dagita kenka gapu ta dina kayat a madangranka. Umasping iti dayta, ti naayat ken naanus a Diostayo saanna a kalikaguman a tungpalentayo dagiti bilin a narigat a tungpalen.  (Deuteronomio 30:11-14) Pulos a dina ipabaklay kadatayo ti kasta a nadagsen nga awit. Maawatan ni Jehova dagiti limitasiontayo, ta “pagaammona unay ti pannakapormatayo, a laglagipenna a tapoktayo.”—Salmo 103:14.

15. Apay a makapagtalektayo a pagimbagantayo dagiti bilin ni Jehova?

15 Saan a makapadagsen dagiti bilin ni Jehova; pagimbagantayo dagita. (Isaias 48:17) Dayta ti gapuna a naikuna ni Moises iti nagkauna nga Israel: “Binilinnatayo ni Jehova nga itungpaltayo amin dagitoy nga alagaden, nga agbutengtayo ken Jehova a Diostayo maipaay iti pagimbagantayo a kanayon, tapno makapagtalinaedtayo a sibibiag kas itoy nga aldaw.” (Deuteronomio 6:24) Makapagtalektayo met nga agpaay iti agnanayon a pagsayaatantayo dagiti linteg nga inted ni Jehova kadatayo. Pulos a dinatay bilinen ni Jehova nga agaramid iti aniaman a makadangran kadatayo. Di matukod ti sirib ni Jehova a Dios. (Roma 11:33) Ammona ngarud no ania ti kasayaatan para kadatayo. Maysa pay, ni Jehova ti personipikasion ti ayat. (1 Juan 4:8) Gapu ta ni Jehova ket ayat, dayta a galad ti mangim-impluensia iti amin a sawen ken aramidenna. Dayta ti nakaibatayan dagiti amin a bilinna kadagiti adipenna.

16. Iti baet dagiti impluensia daytoy rinuker a lubong ken dagiti dakes a pagannayasantayo gapu iti kinaimperpektotayo, apay a kabaelantayo ti agtulnog iti Dios?

16 Ngem di kayat a sawen daytoy a nalaka ti agtulnog iti Dios. Masapul a sarangtentayo dagiti impluensia daytoy rinuker a lubong nga “adda iti pannakabalin daydiay nadangkes.” (1 Juan 5:19) Gapu ta imperpektotayo, masapul met a parmekentayo ti pagannayasan a manglabsing kadagiti linteg ti Dios. (Roma 7:21-25) Ngem agballigitayo gapu iti ayattayo iti Dios. Bendisionan ni Jehova dagidiay agtarigagay a mangipaneknek iti ayatda kenkuana babaen ti panagtulnogda. Itedna ti nasantuan nga espirituna “kadagidiay agtultulnog kenkuana kas agturay.” (Aramid 5:32) Agkakaimbag a bunga ti patauden kadatayo dayta nga espiritu—dagiti agkakapateg  a galad a makatulong kadatayo nga agtulnog iti Dios.—Galacia 5:22, 23.

17, 18. (a) Ania ti usigentayo iti daytoy a libro, ket iti panangusigtayo, ania ti laglagipentayo? (b) Ania ti masalaysay iti sumaganad a kapitulo?

17 Iti daytoy a libro, usigentayo dagiti prinsipio ken moral a pagalagadan ni Jehova agraman dagiti dadduma pay a mangipasimudaag iti pagayatanna. Iti panangusigtayo, adda sumagmamano a napateg a banag a nasken a laglagipentayo. Tandaanantayo a dinatay pilpiliten ni Jehova nga agtulnog kadagiti linteg ken prinsipiona; kalikagumanna ti sibubulos a panagtulnog nga agubbog iti pusotayo. Ditay liplipatan a kayat ni Jehova nga agbiagtayo iti wagas a mangyeg kadatayo kadagiti nabaknang a bendision ita ken mangiturong iti biag nga agnanayon iti masanguanan. Kasta met nga ibilangtayo ti naimpusuan a panagtulnog kas napateg a gundaway a maipakitatayo no kasano kauneg ti ayattayo ken Jehova.

18 Tapno mailasintayo ti umiso ken di umiso, siaayat nga inikkannatayo ni Jehova iti konsiensia. Ngem nasken a masanay ti konsiensiatayo tapno agbalin a mapagtalkan a giya, kas salaysayen ti sumaganad a kapitulo.

^ par. 9 Maipapan iti panangpili iti makaay-ayo a paglinglingayan, kitaem ti Kapitulo 6 daytoy a libro.

^ par. 11 Uray dagiti dakes nga espiritu kabaelanda ti agtulnog a mapilpilit. Idi imbilin ni Jesus kadagiti demonio a rummuarda iti sumagmamano a tattao a linugananda, napilitan dagiti demonio a mangbigbig iti autoridadna ket awan naaramidanda no di agtulnog.—Marcos 1:27; 5:7-13.

^ par. 13 Iti Mateo 23:4, nausar daytoy a sao a mangdeskribir kadagiti “nadagsen nga awit,” dagiti detalyado unay a paglintegan ken aramid-tao a tradision nga impabaklay dagiti eskriba ken Fariseo kadagiti gagangay a tattao. Iti Aramid 20:29, 30, naipatarus met dayta a sao kas “manangirurumen.” Maipapan dayta kadagiti naulpit nga apostata nga ‘agsasao iti tiritir a bambanag’ ken mangal-allilaw kadagiti sabsabali.

Ammuem ti Ad-adu Pay

Kasano a Masursuro Dagiti Annak nga Ayaten ti Dios?

Kasanom a danonen ti puso ti anakmo babaen ti mensahe ti Biblia?