Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Agtalinaedka iti Ayat ti Dios

 APENDISE

Kaano ken Apay a Kasapulan ti Agdalungdong?

Kaano ken Apay a Kasapulan ti Agdalungdong?

Kaano ken apay a masapul nga agdalungdong ti maysa a Kristiano a babai no iti panagdayawna? Iti naipaltiing a surat ni apostol Pablo, usigentayo no ania ti kinunana mainaig iti daytoy a topiko. Impaayna ti giya a kasapulantayo tapno makaaramidtayo kadagiti umiso a desision a pakaidayawan ti Dios. (1 Corinto 11:3-16) Impalgak ni Pablo ti tallo a napateg a banag a tingitingentayo: (1) dagiti aktibidad a nasken nga agdalungdong ti maysa a babai, (2) dagiti kasasaad a nasken nga aramidenna dayta, ken (3) dagiti motibo no apay nga iyaplikarna daytoy a pagalagadan.

Dagiti aktibidad. Dua ti dinakamat ni Pablo: panagkararag ken panagipadto. (Bersikulo 4, 5) Ti panagkararag ket nadayaw a pannakikomunikar ken Jehova. Iti kaaldawantayo, maibilang a panagipadto ti aniaman a naibatay iti Biblia a panagisuro nga ar-aramiden ti maysa a Kristiano a ministro. No kasta, kayat kadi a sawen ni Pablo a masapul nga agdalungdong ti maysa a babai tunggal agkararag wenno mangisuro maipapan iti kinapudno a linaon ti Biblia? Saan. Agdepende dayta iti kasasaad.

Dagiti kasasaad. Ti sasao ni Pablo ipasimudaagna ti dua a kasasaad no kaano nga agdalungdong ti maysa a babai—iti uneg ti pamilia ken iti kongregasion. Kinunana: “Ti ulo ti babai isu ti lalaki . . . Tunggal babai nga agkararag wenno agipadto a ti ulona di nadalungdongan ibabainna ti ulona.” (Bersikulo 3, 5) Iti urnos ti pamilia, ti asawa a lalaki ti tinudingan ti Dios kas ulo ti babai. Ti  babai ibabainna ni lakayna no saanna a bigbigen ti autoridad ni lakayna ket aramidenna dagiti responsabilidad a naipaannong iti asawana. Kas pagarigan, no ti babai ket nasken a mangikondukta iti panangyadal iti Biblia bayat a siiimatang ni lakayna, masapul a bigbigenna ti autoridad ni lakayna babaen ti panagdalungdongna. Aramidenna dayta, bautisado man wenno saan ni lakayna, yantangay ni lakayna ti ulo ti pamilia. * Agdalungdong met ti babai no mangikararag wenno mangisuro bayat a siiimatang ti menor de edad ken bautisado nga anakna a lalaki. Aramidenna dayta saan a gapu ta ti anakna ti ulo ti pamilia no di ket kas panangbigbig iti autoridad a naipaay kadagiti bautisado a lallaki a miembro ti kongregasion Kristiano.

Kuna ni Pablo mainaig iti kongregasion: “No ti asinoman a tao kasla makisupiat iti sabali pay a kadawyan, awanantayo iti sabali pay, uray dagiti kongregasion ti Dios.” (Bersikulo 16) Iti uneg ti kongregasion Kristiano, dagiti bautisado a lallaki ti nakaitedan ti kinaulo. (1 Timoteo 2:11-14; Hebreo 13:17) Dagiti laeng lallaki ti madutokan nga agserbi kas panglakayen ken ministerial nga adipen. Isuda laeng ti inikkan ti Dios iti responsabilidad a mangaywan iti arbanna. (Aramid 20:28) Nupay kasta, adda dagiti kasasaad a ti maysa a Kristiano a babai ti mangaramid iti annongen a gagangay nga aramiden ti kualipikado ken bautisado a lalaki. Kas pagarigan, mabalin a nasken nga ikonduktana ti taripnong sakbay ti panangasaba gapu ta awan wenno saan a presente ti kualipikado ken bautisado a lalaki. Wenno saan, mabalin a mangikondukta iti panangyadal iti Biblia nga adda a presente ti maysa a bautisado a lalaki. Gapu ta dagiti kasta nga aktibidad ket paset ti panagandar ti kongregasion Kristiano, masapul nga agdalungdong ti babai kas panangbigbig nga ar-aramidenna ti annongen a gagangay a naituding kadagiti lallaki.

Iti sabali a bangir, adu ti aspeto ti panagdayaw a saan a kasapulan nga agdalungdong ti babai. Kas pagarigan, saan a nasken nga agdalungdong no agkomento kadagiti gimong ti kongregasion, no mangasaba iti binalaybalay a kadua ti asawana wenno ti sabali pay a bautisado a lalaki, wenno no iyadalanna dagiti  di bautisado nga annakna wenno kaduana ida nga agkararag. Mabalin nga adda tumaud a dadduma pay a saludsod, ket no saan a masigurado ti kabsat a babai ti maipapan iti maysa a banag, mabalinna ti agsukimat pay. * No kaskasdi a saan a sigurado ket tignayen ti konsiensiana nga agdalungdong, awan dakesna no aramidenna dayta, kas ipakita ti naipakuyog a ladawan.

Dagiti motibo. Iti bersikulo 10, makitatayo ti dua a rason no apay nga agdalungdong ti maysa a Kristiano a babai: “Ti babai rebbeng a maaddaan iti pagilasinan ti kinaturay iti rabaw ti ulona gapu kadagiti anghel.” Umuna, imutektekam ti sasao a “pagilasinan ti kinaturay.” Ti panagdalungdong ket maysa a pamay-an a panangipakita ti babai a bigbigenna ti autoridad nga inted ni Jehova kadagiti bautisado a lallaki iti kongregasion. Gapuna, maipakitana ti ayat ken ti kinasungdona kenni Jehova a Dios. Ti maikadua a rason ket makita iti sasao a “gapu kadagiti anghel.” Kasano a maapektaran dagita a nabileg nga espiritu a parsua no agdalungdong ti maysa a babai?

Mabenepisiaran dagiti anghel no makitada a ti autoridad ti Dios ket mabigbigbig iti intero nga organisasion ni Jehova, idiay langit ken ditoy daga. Kasta met, magunggonaanda iti ulidan dagiti imperpekto a tattao no iti daytoy a banag. Ngamin, masapul nga agpasakupda met iti urnos ni Jehova. Maysa daytoy a pannubok a saan idi a napagballigian ti adu nga anghel. (Judas 6) Ita, mabalin a mapaliiw dagiti anghel a ti maysa a Kristiano a babai ket ad-adu ti kapadasanna, ad-adu ti ammona, ken nasirsirib ngem iti bautisado a lalaki iti kongregasion, ngem kaskasdi a sidadaan nga agpasakup iti autoridad ti kabsat a lalaki. Iti dadduma a kasasaad, ti babai ket maysa a napulotan a Kristiano a makipagtawid ken Kristo inton agangay. Nangatngatonto ti saad ti kasta a babai  ngem kadagiti anghel ken makipagturayto ken Kristo idiay langit. Anian a nagsayaat dayta nga ulidan a mapalpaliiw ita dagiti anghel! Pudno a maysa a pribilehio para iti amin a kakabsat a babbai nga iparangarang ti napakumbaba a panagtulnogda babaen ti panangipakitada iti kinasungdo ken kinamanagpasakup iti imatang dagiti riniwriw a matalek nga anghel!

^ par. 3 Gagangay a saan nga agkararag iti napigsa ti Kristiano nga asawa a babai no adda ti manamati nga asawana malaksid no kiddawen ti kasasaad, kas koma no saanen a makapagsao ni lakayna gapu iti nakaro a sakit.

^ par. 2 Para iti kanayonan nga impormasion, kitaem Ti Pagwanawanan, Pebrero 15, 2015, panid 30; Hulio 15, 2002, panid 26-7; ken Agosto 15, 1977 panid 508 (Pebrero 15, 1977, panid 125-8 iti Ingles).