Mapan iti linaonna

Mapan iti listaan dagiti linaonna

 KAPITULO 2

Surat a Naggapu iti Naayat a Dios

Surat a Naggapu iti Naayat a Dios

ANIA a libro ti magusgustuam unay?— Dadduma nga ubbing magustuanda ti libro maipapan kadagiti animal. Pagay-ayat dagiti dadduma ti libro nga adu ti retratona. Makaparagsak a basaen dagita a libro.

Ngem kasayaatan a libro dagidiay naglaon iti kinapudno maipapan iti Dios. Adda maysa a kapapatgan kadagita a libro. Ammom kadi no ania dayta a libro?— Ti Biblia.

Apay a nakapatpateg ti Biblia?— Gapu ta ti Dios ti nangted iti dayta. Isurona kadatayo ti maipapan iti Dios ken dagiti naimbag a banag nga aramidennanto para kadatayo. Ken ipakitana kadatayo no ania ti rumbeng nga aramidentayo tapno maay-ayotayo ti Dios. Kasla surat dayta a naggapu iti Dios.

Nabalinan koma idi ti Dios nga isurat ti intero a Biblia idiay langit sana ited dayta iti tao. Ngem saan a kasta ti inaramidna. Nupay naglaon dayta kadagiti kapanunotan ti Dios, inusarna dagiti adipenna ditoy daga a mangisurat iti Biblia.

Kasano ti panangaramid ti Dios iti dayta?— Tapno matarusam no kasano, panunotem daytoy. No adda mangngegtayo a timek iti radio, mabalin a nakaad-adayo ti ayan ti tao nga agsasao. No agbuyatayo iti telebision, makitatayo pay dagiti tattao iti dadduma a pagilian ditoy lubong, ken mangngegtayo ti ibagbagada.

Makapan pay dagiti tattao idiay bulan, ken makaipatulodda kadagiti mensahe ditoy daga uray addada sadiay. Nadamagmo kadin dayta?— No kabaelan dayta dagiti tattao, kabaelan ngata ti Dios ti agipatulod kadagiti mensahe manipud langit?— Siempre, kabaelanna! Ket nabayagen  nga inaramidna ti kasta sakbay pay a naaddaantayo iti radio wenno telebision.

Kasanotayo nga ammo a kabaelan ti Dios ti makisao kadatayo uray adayo ti ayanna?

Ni Moises ti maysa nga aktual a nakangngeg iti panagsao ti Dios. Saan a nakita ni Moises ti Dios, ngem nangngegna ti timek ti Dios. Minilion a tattao ti adda sadiay idi napasamak daytoy. Kinapudnona, iti daydi nga aldaw pinagginggined ti Dios ti maysa a bantay, ken napakuyogan kadagiti gurruod ken kimat. Ammo dagiti tattao a ti Dios idi ti agsasao, ngem napalalo ti butengda. Gapuna, imbagada ken Moises: “Saan koma a makisao kadakami ti Dios ta amangan no mataykami.” Kalpasanna, insurat ni Moises dagiti imbaga ti Dios. Adda iti Biblia dagita nga insurat ni Moises.​—Exodo 20:18-21.

 Ni Moises ti nangisurat kadagiti umuna a lima a libro ti Biblia. Ngem saan laeng a ni Moises ti nagsurat. Agarup 40 a lallaki ti inusar ti Dios a mangisurat iti nagduduma a paset ti Biblia. Nabayagen a tiempo ti panagbiag dagitoy a lallaki, ket adu a tawen ti panangisuratda iti Biblia. Wen, nagpaut dayta iti agarup 1,600 a tawen! Ti nakaskasdaaw, nupay di pulos nagkikita ti dadduma kadagitoy a lallaki, talaga nga agtutunos amin nga insuratda.

Ania ti nagnagan dagitoy a nangisurat iti Biblia?

Nalatak ti dadduma a lallaki nga inusar ti Dios a mangisurat iti Biblia. Nupay agpaspastor idi ni Moises, isu ti nagbalin a pangulo ti nasion ti Israel. Ni Solomon ket maysa idi nga ari a kasisiriban ken kabaknangan ditoy lubong. Ngem saan unay a nalatak dagiti dadduma a mannurat. Agay-aywan idi ni Amos kadagiti kayo a higos.

Kasta met, doktor ti maysa a nagsurat iti Biblia. Ammom kadi ti naganna?— Lucas. Ti maysa pay a nagsurat ket dati nga agsingsingir iti buis. Mateo ti naganna. Adda pay dati nga abogado, a nalaing iti narelihiosuan a linteg dagiti Judio. Isu ti kaaduan iti insurat a libro ti Biblia. Ammom kadi ti naganna?— Pablo. Kasta met, da Pedro ken Juan nga adalan ni Jesus, a nagsurat met iti Biblia, ket dati a mangngalap.

Adu kadagitoy a nagsurat iti Biblia ti nangibaga kadagiti aramiden ti Dios iti masanguanan. Kasanoda nga ammo dagita uray saan pay a napasamak?— Ti Dios ti nangted iti impormasion kadagidiay a lallaki. Imbagana kadakuada no ania ti mapasamak.

Idi adda ditoy daga ni Jesus, ti Naindaklan a Mannursuro, naisuraten ti kaaduan a paset ti Biblia. Laglagipem a ti Naindaklan a Mannursuro ket datin nga adda idiay langit. Ammona dagiti inaramid ti Dios. Namati aya a ti Dios ti naggapuan ti Biblia?— Wen.

Idi ipakpakaammo ni Jesus kadagiti tattao ti maipapan iti ar-aramid ti Dios, imbasana dagita manipud iti Biblia. No dadduma isursurona kadakuada dagiti malagipna nga ibagbaga ti Biblia, uray saannan nga ibasa. Inikkannatayo met ni Jesus iti ad-adu pay nga impormasion a  naggapu iti Dios. Kinuna ni Jesus: “Ti mismo a bambanag a nangngegko manipud kenkuana sawek iti lubong.” (Juan 8:26) Adu ti nangngeg ni Jesus iti Dios gapu ta nagkadkaduada idin idiay langit. Ket sadino ti pakabasaantayo kadagidiay imbaga ni Jesus?—Iti Biblia. Naisurat amin dagita tapno mabasatayo.

Siempre, idi inusar ti Dios dagiti tattao nga agsurat, nagsuratda iti bukodda a pagsasao. Dayta ti gapuna a kaaduan a paset ti Biblia ket naisurat iti Hebreo, dadduma iti Aramaico, ken adu kadagita iti Griego. Gapu ta di mabasa ti kaaduan a tattao ita dagita a pagsasao, naipatarus ti Biblia iti dadduma a pagsasao. Mabasa itan ti Biblia iti nasurok a 2,260 a pagsasao. Agasem dayta! Ti Biblia ket surat ti Dios kadagiti tattao iti amin a lugar. Ngem uray namin-ano a nakopia dayta, kaskasdi a ti Dios ti naggapuan ti mensahena.

Napateg kadatayo ti linaon ti Biblia. Nabayagen a naisurat dayta ngem ibagbagana dagiti  agdama a mapaspasamak. Ken ibagana kadatayo dagiti aramidento ti Dios iti asidegen a masanguanan. Makapagagar dagiti ibagbagana! Ipaayannatayo iti nakaskasdaaw a namnama.

Ania dagiti masursurom no basaem ti Biblia?

Ibaga met ti Biblia kadatayo no kasano ti kayat ti Dios a panagbiagtayo. Ibagana kadatayo no ania ti naimbag ken no ania ti dakes. Nasken a maammuam daytoy, ken uray siak. Estoriaenna ti maipapan kadagiti tattao a nagaramid iti dakes ken no ania ti napasamak kadakuada, tapno saantayo a maipada iti dakes a nagbanaganda. Estoriaenna met ti maipapan kadagiti tattao a nagaramid iti naimbag ken dagiti nasayaat a nagbanaganda. Naisurat amin dagita a pakagunggonaantayo.

Ngem tapno ad-adda a magunggonaantayo iti Biblia, masapul nga ammuentayo ti sungbat ti maysa a saludsod. Daytoy ti saludsod: Siasino ti nangted iti Biblia kadatayo? Ania ti sungbatmo?— Wen, ti intero a Biblia ket naggapu iti Dios. No kasta, kasanotayo a maipakita a talaga a masiribtayo?— Imdengantayo ti Dios ken tungpalentayo dagiti bilinna.

No kasta, masapul nga iwayaantayo a basaen a sangsangkamaysa ti Biblia. No adda maawattayo a surat a naggapu iti maysa a patpatgentayo unay, ulit-ulitentayo a basaen. Napateg dayta kadatayo. Kasta koma ti panangipategtayo iti Biblia gapu ta maysa dayta a surat a naggapu iti Daydiay kangrunaan a mangipatpateg kadatayo. Maysa dayta a surat a naggapu iti naayat a Dios.

Basaentayo pay biit dagitoy a kasuratan a mangipakita a ti Biblia ket pudno a Sao ti Dios, a naisurat tapno pakagunggonaantayo: Roma 15:4; 2 Timoteo 3:16, 17; ken 2 Pedro 1:20, 21.