Mapan iti linaonna

Mapan iti listaan dagiti linaonna

 KAPITULO 21

Rumbeng Kadi nga Agpasindayagtayo?

Rumbeng Kadi nga Agpasindayagtayo?

ANIA ti kayat a sawen ti agpasindayag? Ammom kadi?— Adtoy ti maysa a pagarigan. Napadasmo kadin ti nagaramid iti banag a saanmo unay nga ammo? Mabalin a pinadasmo ti agbasketbol. Wenno pinadasmo ti aglangoy. Adda kadi nagkatkatawa a nanglais kenka sa kinunana, “Nalalaingak ngem sika”?— Agpaspasindayag dayta a tao.

Ania ti mariknam no kasta ti aramiden dagiti sabsabali? Magustuam kadi?— No kasta, ania ngata ti marikna dagiti dadduma no agpasindayagka?— Nasayaat kadi no ibagam iti sabali, “Nalalaingak ngem sika”?— Maay-ayo ngata ni Jehova kadagiti tattao a mangaramid iti kasta?—

Adda tattao nga am-ammo ti Naindaklan a Mannursuro a nangipagarup a nasaysayaatda ngem kadagiti sabsabali. Agpannakkel, wenno agpasindayagda, ken umsienda dagiti sabsabali. Isu nga iti maysa nga aldaw, adda inestoria ni Jesus kadakuada tapno ipakitana a dakes ti agpasindayag. Imdenganta dayta.

Ti estoria ket maipapan iti maysa a Fariseo ken maysa nga agsingsingir iti buis. Dagiti Fariseo ket mannursuro iti relihion a masansan nga agpampammarang a kasla nalinlintegda ngem kadagiti sabsabali. Ti Fariseo iti estoria ni Jesus ket napan iti templo ti Dios idiay Jerusalem tapno agkararag.

Apay a naay-ayo ti Dios iti agsingsingir iti buis imbes nga iti Fariseo?

Kinuna ni Jesus nga adda agsingsingir iti buis a napan met idiay templo tapno agkararag. Kaaduan a tattao kagurada dagiti agsingsingir iti buis. Pagarupenda a sasauren ida dagiti agsingsingir iti buis. Ket agpayso nga adu idi ti agsingsingir iti buis a saan a kanayon a mapagpiaran.

 Iti templo, kastoy ti inkararag ti Fariseo iti Dios: ‘O Dios, agyamanak kenka ta saanak a managbasol a kas iti dadduma a tattao. Saanko a sasauren dagiti tattao ken saanak nga agar-aramid iti dadduma pay a dakes a bambanag. Saanak a kas iti dayta nga agsingsingir iti buis. Maysaak a tao a nalinteg. Saanak a mangmangan iti mamindua iti makalawas tapno ad-adu ti panawenko a mangpampanunot kenka. Ken itedko iti templo ti apagkapullo ti amin a bambanag a magun-odak.’ Talaga nga impagarup ti Fariseo nga isu ket nasaysayaat ngem kadagiti sabsabali, di ngamin?— Ken imbagana met dayta iti Dios.

Ngem saan a kasta ti agsingsingir iti buis. Dina pay maitured ti tumangad idiay langit idi nagkararag. Sitatakder iti adayo bayat a nakadumog. Napalalo ti panagbabawi ti agsingsingir iti buis gapu kadagiti basolna, ken dandanogenna ti barukongna gapu iti ladingit. Saanna nga impagpannakkel iti Dios ti kinaimbagna. Imbes ketdi, inkararagna: ‘O Dios, kaasiannak gapu ta managbasolak.’

Siasino kadagitoy a dua a lallaki ti ammom a makaay-ayo iti Dios? Ti kadi Fariseo a nangipagarup a napalalo ti kinaimbagna? Wenno ti kadi agsingsingir iti buis a nagbabawyanna dagiti basolna?—

Kinuna ni Jesus a naay-ayo ti Dios iti daydiay agsingsingir iti buis. Apay? Inlawlawag ni Jesus: ‘Agsipud ta ti tunggal maysa a mangitan-ok iti bagina a kasla nasaysayaat ngem kadagiti sabsabali maipababanto. Ngem ti mangipakumbaba iti bagina maitan-okto.’​​—Lucas 18:​9-​14.

 Ania a leksion ti isursuro idi ni Jesus iti estoriana?— Insurona a di umiso a panunotentayo a nasaysayaattayo ngem kadagiti sabsabali. Mabalin a saantayo nga ibagbaga a nasaysayaattayo, ngem babaen iti tigtignaytayo, maipakitatayo a kasta ti pampanunotentayo. Napadasam kadin dayta?— Usigem ni apostol Pedro.

Idi imbaga ni Jesus kadagiti apostolna nga isuda amin panawandanto ni Jesus inton matiliw, impasindayag ni Pedro: ‘Uray isuda amin panawandaka, dikanto pulos panawan!’ Ngem nagbiddut ni Pedro. Napalalo ti panagtalekna iti bagina. Pinanawanna ni Jesus. Nupay kasta, nagsubli, kas maammuantanto iti Kapitulo 30 daytoy a libro.​​—Mateo 26:31-​33.

Usigenta ti maysa a pagarigan itatta. Idiay eskuelaan, nalabit adda sumagmamano a saludsod a damagenda kenka ken iti kaklasem. Ania ngay no naparpartakka a sumungbat ngem iti kaklasem? Siempre, maragsakanka no ammom ti sungbat. Ngem nasayaat kadi no idiligmo ti bagim iti daydiay nakapkapuy a sumungbat?— Umiso kadi a pagparangem a nalalaingka babaen ti panangipababam iti sabali?—

Kasta ti inaramid ti Fariseo. Impasindayagna nga isu ket nasaysayaat ngem iti agsingsingir iti buis. Ngem kinuna ti Naindaklan a Mannursuro a nagbiddut ti Fariseo. Agpayso a mabalin a nalalaing ti maysa a tao nga agaramid iti maysa a banag ngem iti sabali a tao. Ngem dina kayat a sawen a talaga a nasaysayaat dayta a tao.

Nasaysayaatka kadi no ad-adu ti ammom ngem iti sabali a tao?

Gapuna, no nalalaingtayo ngem iti sabali a tao, umiso kadi dayta a panggapuantayo nga agpasindayag?— Panunotem daytoy. Datayo kadi ti nangaramid iti mismo nga utektayo?— Saan, ti Dios ti nangted iti utektayo. Ket kaaduan kadagiti banag nga ammotayo, nasursurotayo iti sabali a tao. Mabalin a nabasatayo dagita iti libro. Wenno nalabit adda nangibaga kadatayo. Uray no datayo a mismo ti nakaammo iti maysa a banag, kasanotayo a naaramid dayta?— Wen, babaen ti panangusartayo iti utek nga inted ti Dios kadatayo.

 No ar-aramiden ti maysa a tao ti amin a kabaelanna, nasayaat no adda maibagam a mangparegta kenkuana. Ibagam a magustuam ti inaramidna. Mabalin a matulongam pay ketdi a rumang-ay. Kasta ti kayatmo nga aramiden kenka dagiti tattao, di ngamin?—

Apay a di umiso nga agpasindayagtayo no napigpigsatayo ngem iti sabali?

Adda tattao a napigpigsa ngem kadagiti sabsabali. Ania ngay no napigpigsaka ngem iti kabsatmo? Dayta kadi ti panggapuam nga agpasindayag?— Saan. Ti taraon a kankanentayo ti mangpappapigsa kadatayo. Ket saan kadi a ti Dios ti mangmangted iti lawag ti init ken tudo ken amin a kasapulan a mangpataud iti taraon?— No kasta, ti Dios ti rumbeng a pagyamanantayo no napigsatayo.​​—Aramid 14:​16, 17.

Ditay magustuan ti asinoman a napasindayag, di ngamin?— Laglagipentayo ti sasao ni Jesus: ‘Kas iti kayatyo nga aramiden kadakayo dagiti sabsabali, kasta met laeng ti aramidenyo kadakuada.’ No aramidentayo dayta, ditayto pulos agbalin a kas iti napasindayag a Fariseo iti estoria ti Naindaklan a Mannursuro.​​—Lucas 6:31.

Iti naminsan, adda nangawag ken Jesus iti naimbag. Kinuna kadi ti Naindaklan a  Mannursuro, ‘Wen, naimbagak’?— Saanna nga inaramid dayta. Imbes ketdi, kinunana: “Awan asinoman a naimbag, malaksid ti maysa, ti Dios.” (Marcos 10:18) Nupay perpekto ti Naindaklan a Mannursuro, saan a nagpasindayag. Imbes ketdi, intedna amin a dayaw iti Amana, ni Jehova.

No kasta, adda kadi asinoman a mabalintayo nga ipasindayag?— Wen, adda. Maipagpannakkeltayo ti Namarsua kadatayo, ni Jehova a Dios. No makitatayo ti nagpintas nga ilelennek ti init wenno dadduma pay a nakaskasdaaw a parsua, mabalintayo nga ibaga, ‘Ti nakaskasdaaw a Diostayo a ni Jehova ti nangaramid iti daytoy!’ Kanayon koma a sisasaganatayo nga agsao maipapan kadagiti nakaskasdaaw a banag a naaramidanen ni Jehova ken aramidennanto pay.

Ania ti ipaspasindayag daytoy nga ubing?

Basaem ti kuna ti Kasuratan maipapan iti panagpasindayag, wenno panagpannakkel, ket ammuenta no kasanotayo koma a liklikan ti panagpasindayag: Proverbio 16:​5, 18; Jeremias 9:​23, 24; 1 Corinto 4:7; ken 13:4.