Mapan iti linaonna

Mapan iti listaan dagiti linaonna

 KAPITULO 32

No Kasano a Nasalakniban ni Jesus

No Kasano a Nasalakniban ni Jesus

NO DADDUMA nakaskasdaaw ti panangsalaknib ni Jehova kadagiti babassit nga ubbing ken di makabael a mangsalaknib iti bagbagida. No mapanka agpasiar iti away, mabalin a makakitaka iti maysa a pamay-an no kasano ti panangsalaknib ni Jehova. Ngem iti damo mabalin a saanmo a maawatan no ania ti mapaspasamak.

Makakitaka iti maysa a tumatayab a nagdisso iti asidegmo. Kasla nadangran. Ul-ulodenna ti maysa kadagiti payakna ket umadayo no gandatem nga asitgan. Bayat a sursurotem, adaywannaka latta. Pagammuan, kellaat a timmayab. Saan gayam a nadangran dagiti payakna! Ammom kadi no apay a kasta ti inaramid ti tumatayab?—

Ngamin, iti asideg ti nagdissuan ti tumatayab, nakalemmeng dagiti urbonna iti kasamekan. Madanagan ti tumatayab amangan no masarakam dagiti urbonna ket dangram ida. Isu a nagpammarang a nadangran ken inyadayonaka manipud iti ayan dagiti urbonna. Ammom kadi no siasino ti makabael a mangsalaknib kadatayo a kas iti panangsalaknib ti tumatayab kadagiti urbonna?— Iti Biblia, mayarig ni Jehova iti maysa a tumatayab a maawagan agila, a mangsalaknib kadagiti urbonna.​​—Deuteronomio 32:​11, 12.

Kasano ti panangsalaknib daytoy a tumatayab kadagiti urbonna?

 Ti dungdungnguenna nga Anak a ni Jesus ti kapatgan nga anak ni Jehova. Idi adda ni Jesus idiay langit, isu ket maysa a mannakabalin nga espiritu a persona a kas ken Amana. Kabaelanna nga aywanan ti bagina. Ngem idi nayanak ni Jesus kas maysa a maladaga ditoy daga, awan a pulos gawayna. Masapul nga adda mangsalaknib kenkuana.

Tapno maaramidna ti pagayatan ti Dios ditoy daga, masapul a dumakkel ni Jesus ken agbalin a perpekto ken nataengan a tao. Ngem pinanggep ni Satanas a papatayen ni Jesus sakbay a mapasamak dayta. Makapagagar ti estoria maipapan kadagiti panaggandat a mangpapatay ken ni Jesus ken no kasano a sinalakniban ni Jehova. Kayatmo kadi a denggen?—

Di nagbayag kalpasan ti pannakayanak ni Jesus, nangpataud ni Satanas iti kasla maysa a bituen iti tangatang iti Daya. Dagiti lallaki a maawagan iti astrologo, a mangad-adal kadagiti bituen, sinurotda ti bituen agingga a nakagtengda idiay Jerusalem, a ginasut a kilometro ti kaadayona manipud iti naggapuanda. Dinamagda sadiay no sadino a mayanak daydiay agbalinto nga ari dagiti Judio. Idi napagsaludsodan dagidiay makaammo iti kuna ti Biblia maipapan iti dayta, insungbatda: “Idiay Betlehem.”​​—Mateo 2:​1-6.

Kalpasan a sinarungkaran dagiti astrologo ni Jesus, ania ti impakdaar ti Dios kadakuada tapno maispal ti biag ni Jesus?

 Ni Herodes ti ari idi idiay Jerusalem. Nadangkok nga ari ni Herodes. Idi nadamagna ti maipapan iti daytoy baro nga ari a nabiit pay a nayanak iti asideg nga ili ti Betlehem, kinunana kadagiti astrologo: ‘Birokenyo ti ubing. No masarakanyo, agsublikayo ket ipakaammoyonto kaniak.’ Ammom kadi no apay a kayat a maammuan ni Herodes no sadino ti ayan ni Jesus?— Agimon ngamin ni Herodes ket kayatna a papatayen ni Jesus!

Kasano a sinalakniban ti Dios ti Anakna?— Idi nasarakan dagiti astrologo ni Jesus, inikkanda kadagiti sagut. Di nagbayag, babaen ti tagtagainep pinakdaaran ti Dios dagiti astrologo a saandan nga agsubli ken ni Herodes. Sabali ngarud a dalan ti nagnaanda idi agawidda ken saandan a nagsubli idiay Jerusalem. Idi naammuan ni Herodes a pimmanawen dagiti astrologo, napalalo ti pungtotna. Tapno mapapatay ni Jesus, pinapapatay ni Herodes dagiti amin nga ubbing a lallaki idiay Betlehem a nababbaba ngem dua ti tawenda! Ngem awan idin sadiay ni Jesus.

Ammom kadi no kasano a nakalibas ni Jesus?— Kalpasan ti ipapanaw dagiti astrologo, binilin ni Jehova ni Jose nga asawa ni Maria a bumangon ket mapanda idiay Egipto. Iti kaadda ni Jesus sadiay, saan a madangran ni nadangkok a Herodes. Kalpasan ti sumagmamano a tawen, idi pumanawen da Maria ken Jose idiay Egipto a kaduada ni Jesus, pinakdaaran manen ti Dios ni Jose. Babaen ti tagtagainep, binilinna ni Jose a mapan idiay Nazaret, ta natalged sadiay ni Jesus.​​—Mateo 2:​7-​23.

Kasano a naispal ni ubing a Jesus iti maikadua a gundaway?

Maawatam kadi no kasano a sinalakniban ni Jehova ti Anakna?— Iti panagkunam, siasino ti kas kadagiti babassit a tumatayab nga inlemmeng ti inada iti kasamekan wenno kas ken Jesus idi ubing pay laeng? Saan kadi a mayarigka kadakuada?—  Adda met dagidiay agtarigagay a mangdangran kenka. Ammom kadi no siasinoda?—

Kuna ti Biblia a ni Satanas ket kasla maysa a leon a ngumerngernger ket kayatnatayo nga alun-onen. No kasano a dagiti babassit nga animal ti masansan a kayat a tukmaan dagiti leon, dagiti ubbing ti masansan met a kayat a dangran ni Satanas ken dagiti demoniona. (1 Pedro 5:8) Ngem nabilbileg ni Jehova ngem ni Satanas. Masalakniban ni Jehova dagiti annakna wenno malapdanna ti aniaman a dakes nga aramiden ni Satanas kadakuada.

Malagipmo kadi iti Kapitulo 10 daytoy a libro no ania ti kayat ti Diablo ken dagiti demoniona nga aramidentayo?— Wen, kayatda a makiramantayo iti seksual a relasion nga iparit ti Dios. Ngem siasino laeng aya dagiti mabalin a maaddaan iti seksual a relasion?— Wen, dagiti laeng dua a nataengan a tao nga agassawa.

Ngem makapaladingit ta adda dagiti nataengan nga agtarigagay a makidenna kadagiti ubbing. No aramidenda dayta, mabalin nga aramiden met dagiti ubbing dagiti dakes a banag a masursuroda kadagitoy a nataengan. Mabalin a masursuroda met nga usaren dagiti mabagbagida iti di umiso a pamay-an. Kasta ti napasamak idi un-unana iti siudad ti Sodoma. Kuna ti Biblia a dagiti tattao sadiay, “manipud ubing agingga iti lakay,” kayatda a kaiddaen dagiti lallaki a bisita ni Lot.​​—Genesis 19:​4, 5.

Isu a no kasano a kasapulan idi a masalakniban ni Jesus, masapul met a masalaknibanka kadagiti nataengan​​—ken uray kadagiti padam nga ubbing​​—nga agtarigagay a makidenna kenka. Kaaduanna, agpammarang a nasingpet dagitoy a tattao. Mabalin nga adda pay ketdi itedda kenka no ikarim a saanmo nga ibagbaga kadagiti dadduma ti kayatda nga aramiden kenka. Ngem kas ken ni Satanas ken dagiti demoniona, agimbubukodan dagitoy a tattao, ket ti laeng pakaragsakanda ti pampanunotenda. Ket kayatda a paragsaken ti bagbagida babaen ti pannakidennada kadagiti ubbing. Nagdakes dayta nga aramid!

 Ammom kadi no ania ti aramidenda tapno maparagsakda ti bagbagida?— Mabalin nga aprosanda ti mabagbagim. Wenno mabalin nga idekketda pay ketdi ti mabagbagida iti mabagbagim. Ngem saanmo a palubosan ti asinoman a mangay-ayam iti mabagbagim, uray dagiti kakabsatmo wenno ni nanang wenno tatangmo.

Ania ti masapul a sawen ken aramidem no adda aggandat a mangapros kenka a dakes ti panggepna?

Kasanom a masalakniban ti bagim kadagiti tattao nga agar-aramid kadagiti kasta a dakes a bambanag?— Umuna iti amin, saanmo a palubosan ti asinoman a mangay-ayam iti mabagbagim. No adda agpanggep a mangaramid iti kasta, ipapilitmo nga ibaga ti kastoy iti napigsa a timek: “Isardengmo dayta! Ipulongka!” No ibaga dayta a tao a ti napasamak ket basolmo, dimo patien. Saan a pudno dayta. Ipulongmo latta uray pay no siasino dayta a tao! Ipulongmo uray no ibagana a dakayo laeng a dua ti makaammo iti ar-aramidenyo. Uray no ikarina nga ikkannaka kadagiti agkakapintas a regalo wenno butbutngennaka, panawam ket ipulongmo.

Dika agbuteng, ngem masapul nga agannadka. No bagbagaandaka dagiti dadakkelmo nga agannadka kadagiti tattao wenno lugar a napeggad kenka, masapul nga ipangagmo ida. No ipangagmo ida, saan a maaddaan ti maysa a dakes a tao iti gundaway a mangdangran kenka.

Basaem no kasanom a masalakniban ti bagim kadagiti dakes a seksual nga aramid, iti Genesis 39:​7-​12; Proverbio 4:​14-​16; 14:​15, 16; 1 Corinto 6:​18; ken 2 Pedro 2:14.