Mapan iti linaonna

Mapan iti listaan dagiti linaonna

 KAPITULO 40

No Kasano a Maparagsak ti Dios

No Kasano a Maparagsak ti Dios

ANIA ti maaramidtayo a mangparagsak iti Dios? Adda kadi maitedtayo kenkuana?— Kuna ni Jehova: “Kukuak ti tunggal atap nga animal ti bakir.” Kunana pay: “Ti pirak kukuak, ket ti balitok kukuak.” (Salmo 24:1; 50:10; Haggeo 2:8) Ngem adda mabalintayo nga ited iti Dios. Ania dayta?—

Palubosannatayo ni Jehova nga agpili no kayattayo ti agserbi kenkuana wenno saan. Dinatayo piliten a mangaramid iti kayatna. Ammuenta no apay nga inaramidnatayo ti Dios tapno maikeddengtayo no agserbitayo kenkuana wenno saan.

Mabalin nga ammomon no ania ti robot. Makina dayta a nairanta nga agtignay sigun iti aniaman a kayat ti nangaramid. No kasta, saan a ti robot ti mangikeddeng iti kayatna nga aramiden. Mabalinnatayo koma amin nga aramiden ni Jehova a kas kadagiti robot. Maaramidnatayo koma a kasta tapno ti laeng pagayatanna ti aramidentayo. Ngem saan a kasta ti inaramid ti Dios. Ammom kadi no apay?— Adda dadduma nga abalbalay a robot. No mapaandar dagita, agtignayda sigun laeng iti inranta ti nangaramid. Nakakitaka kadin iti kasta nga abalbalay?— Masansan a mauma dagiti tattao a mangay-ayam iti abalbalay nga agandar laeng sigun iti nairanta, wenno naiprograma, nga aramidenna. Di kayat ti Dios nga agbalintayo a robot  nga agtulnog kenkuana gapu laeng ta naiprograma nga isu ti pagserbiantayo. Kayat ni Jehova a ti rason no apay nga agserbitayo kenkuana ket gapu ta ay-ayaten ken kayattayo ti agtulnog kenkuana.

Apay a saannatayo nga inaramid ti Dios a kas iti daytoy a robot?

Panagkunam, ania ngata ti marikna ti nailangitan nga Amatayo no agtulnogtayo kenkuana gapu ta dayta ti kayattayo?— Panunotem daytoy. Ania ngata ti epektona kada tatang ken nanangmo no dakes wenno nasayaat ti kababalinmo?— Kuna ti Biblia a ti masirib nga anak ‘mamagrag-o iti amana’ ngem ti maag nga anak “isu ti ladingit ni inana.” (Proverbio 10:1) Nadlawmo kadi a maragsakan da nanang ken tatangmo no aramidem ti ibilbilinda kenka?— Ngem ania ngata ti riknada no agsukirka kadakuada?—

Kasanom a maparagsak ni Jehova ken dagiti nagannak kenka?

Ita, panunotenta ti nailangitan nga Amatayo a ni Jehova. Ibagana kadatayo no kasanotayo a maparagsak. Pangngaasim ta alaem ti Bibliam ket ukradem iti Proverbio 27:11. Ditoy, makisasao ti Dios kadatayo: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” Ammom kadi ti kayat a sawen ti mangrurod?— Mabalin a rurodennaka ti maysa a tao no katawaannaka sa kunana a dimo kabaelan nga aramiden ti imbagam. Kasano a rinurod ni Satanas ni Jehova?— Kitaenta.

Laglagipem, naammuanta iti Kapitulo 8 daytoy a libro a kayat ni Satanas ti agbalin a Kangatuan ket kayatna nga isu ti pagtulnogan ti isuamin.  Kuna ni Satanas nga agdaydayaw dagiti tattao ken Jehova gapu laeng ta ipaayan ni Jehova ida iti biag nga agnanayon no agdayawda kenkuana. Idi naallukoyen ni Satanas da Adan ken Eva nga agsukir ken Jehova, kinarit ni Satanas ti Dios. Kinunana iti Dios: ‘Agserserbi dagiti tattao kenka gapu laeng iti it-itedmo kadakuada. Ikkannak iti gundaway, ket mapagtallikudko kenka ti asinoman a tao.’

Kalpasan ti panagbasol da Adan ken Eva, kasano a kinarit ni Satanas ni Jehova?

Agpayso a saan a masarakan a direkta iti Biblia dagita a sasao. Ngem no basaenta ti maipapan ken Job, nabatad a kasta ti imbaga ni Satanas iti Dios. Talaga a napateg idi kada Satanas ken Jehova no agmatalek wenno di agmatalek ni Job iti Dios. Ukradenta ti Biblia iti Job kapitulo 1 ken 2 tapno maammuanta ti napasamak.

Sigun iti Job kapitulo 1, adda a mismo ni Satanas idiay langit idi nakitaripnong dagiti anghel ken Jehova. Gapuna, dinamag ni Jehova ken Satanas: “Sadino ti naggapuam?” Kuna ni Satanas a sinursorna ti intero a daga. Gapuna, dinamag ni Jehova: ‘Nakitam kadi  ni Job, nga agserserbi kaniak ken saan nga agar-aramid iti dakes?’?​​—Job 1:​6-8.

Dagus a nagrason ni Satanas. ‘Agdaydayaw laeng ni Job kenka gapu ta awan parikutna. No saanmo a salakniban ken bendisionan, ilunodnakanto nga iparupa.’ Simmungbat ngarud ni Jehova: ‘Ala wen, Satanas, maaramidmo amin a kayatmo kenkuana, ngem dimo dangdangran ni Job.’​​—Job 1:​9-​12.

Ania ti inaramid ni Satanas?— Impatakawna kadagiti tattao dagiti baka ken asno ni Job sana pinapatay dagidiay mangay-aywan kadagita. Kalpasanna, nakimat dagiti karnero ken dagidiay agay-aywan kadagita ket natayda amin. Kalpasanna, dimteng dagiti tattao ket tinakawda dagiti kamelio sada pinapatay dagidiay agay-aywan. Kamaudiananna, nangpataud ni Satanas iti napigsa nga allawig a nangrippuog iti balay nga ayan dagiti sangapulo nga annak ni Job, ket natayda amin. Iti laksid amin dagita, nagtultuloy a nagserbi ni Job ken Jehova.​​—Job 1:​13-​22.

Idi makita manen ni Jehova ni Satanas, kinuna ni Jehova kenkuana a matalek latta ni Job. Nagkalintegan ni Satanas, a kunkunana: ‘No palubosannak laeng a mangdangran iti bagina, ilunodnakanto nga iparupa.’ Pinalubosan ngarud ni Jehova a dangran ni Satanas ti bagi ni Job ngem pinakdaaranna a dina papatayen ni Job.

Ania dagiti inibturan ni Job, ket apay a naragsakan ti Dios iti daytoy?

 Pinagsakit ni Satanas ni Job isu a nagbusbusali ti intero a bagina. Nakabangbangsit dagita isu nga awanen ti mayat nga umasideg kenkuana. Naikuna pay kenkuana ti asawa ni Job: “Ilunodmo ti Dios ket matayka!” Pimmasiar dagidiay aginkukuna a gagayyem ni Job ket ad-adda a pinagladingitda idi imbagada nga adda la ketdi dakes nga inaramid ni Job isu nga agrigrigat. Ngem iti laksid amin dagita a parikut ken rigat a pinataud ni Satanas ken Job, intultuloy ni Job ti nagserbi a simamatalek ken Jehova.​​—Job 2:​1-​13; 7:5; 19:13-​20.

Panagkunam, ania ngata ni narikna ni Jehova gapu iti kinamatalek ni Job?— Naragsakan gapu ta maikuna ni Jehova ken Satanas: ‘Kitaem ni Job! Agserserbi kaniak gapu ta dayta ti kayatna.’ Matuladmo ngata ni Job kas maysa a tao a mabalin nga itudo ni Jehova a mangipaneknek nga ulbod ni Satanas?— Pudno a pribilehio ti mangipaay iti kasta a sungbat iti imbaga ni Satanas a maitallikudna ti asinoman nga agserbi ken Jehova. Sigurado nga imbilang ni Jesus dayta kas maysa a pribilehio.

Di pulos intulok ti Naindaklan a Mannursuro nga impluensiaan ni Satanas nga agaramid iti aniaman a di umiso. Panunotem laengen no kasano ti panangparagsakna ken Amana! Mabalin nga itudo ni Jehova ni Jesus sana ibaga ken Satanas: ‘Kitaem ti Anakko! Tinaginayonna ti naan-anay a kinamatalekna kaniak gapu ta ay-ayatennak!’ Panunotem met ti rag-o ni Jesus gapu ta naparagsakna ti puso ni Amana. Gapu iti dayta a rag-o, inibturan pay ni Jesus ti ipapatay iti kayo a pagtutuokan.​​—Hebreo 12:2.

Kayatmo kadi a tuladen ti Naindaklan a Mannursurotayo ket paragsakem ni Jehova?— Itultuloymo ngarud nga ammuen no ania ti kayat ni Jehova nga aramidem, ket paragsakem babaen ti panangtungpalmo iti dayta!

Basaem no ania ti inaramid ni Jesus tapno maparagsakna ti Dios ken no ania met ti nasken nga aramidentayo, iti Proverbio 23:22-​25; Juan 5:​30; 6:​38; 8:​28; ken 2 Juan 4.