Mapan iti linaonna

Mapan iti listaan dagiti linaonna

 KAPITULO 38

No Apay a Rumbeng nga Ayatentayo ni Jesus

No Apay a Rumbeng nga Ayatentayo ni Jesus

PANUNOTEM nga addaka iti lumlumned a bangka. Kayatmo kadi nga adda mangisalakan kenka?— Ania ngay no adda mangisakripisio iti mismo a biagna tapno maisalakannaka?— Kasta ti inaramid ni Jesu-Kristo. Kas naammuanta iti Kapitulo 37, intedna ti biagna kas subbot tapno maisalakantayo.

Siempre, saannatayo nga insalakan ni Jesus iti literal a pannakalmes. Malagipmo kadi no ania ti nangisalakananna kadatayo?— Iti basol ken ipapatay a natawidtayo amin ken Adan. Uray nakaaramid kadagiti nakadakdakes a banag ti dadduma a tattao, natay met ni Jesus nga agpaay kadakuada. Irisgom kadi ti biagmo a mangisalakan iti kakasta a tattao?—

Kuna ti Biblia: “Nganngani awan asinoman a matay a maipaay iti maysa a nalinteg a tao; kinapudnona, maipaay iti naimbag a tao, nalabit, adda pay ketdi makaitured a matay.” Ngem ilawlawag ti Biblia a “natay [ni Jesus] maipaay kadagiti di nadiosan a tattao.” Karaman iti dayta dagiti tattao a saan pay ketdi nga agserserbi iti Dios! Ituloy a kunaen ti Biblia: “Bayat a managbasoltayo pay laeng idi [agar-aramid pay laeng iti kinadakes], ni Kristo natay a maipaay kadatayo.”​​—Roma 5:​6-8.

Ammom kadi no siasino nga apostol ti dati nga agar-aramid idi kadagiti nakadakdakes a banag?— Kastoy ti insurat dayta nga apostol: “Ni Kristo Jesus immay ditoy lubong tapno mangisalakan kadagiti managbasol. Siak ti kangrunaan kadagitoy.” Ni apostol Pablo ti nangibaga iti dayta. Kinunana nga isu a mismo ket dati a ‘nakuneng’ ken ‘nadangkes.’​​—1 Timoteo 1:​15; Tito 3:3.

Panunotem laengen no kasano ti kinamanagayat ti Dios ta imbaonna ti Anakna tapno matay maigapu iti kakasta a tattao! Alaem ti Bibliam ket basaenta daytoy iti Juan kapitulo 3, bersikulo 16. Kunana: “Ti Dios  inayatna ti lubong [kayatna a sawen, dagiti tattao ditoy daga] iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”

Ania dagiti sinagaba ni Jesus idi insakripisiona ti biagna a maipaay kadatayo?

Pinaneknekan ni Jesus a ti panagayatna kadatayo ket kas met laeng iti panagayat ni Amana. Mabalin a malagipmo nga iti Kapitulo 30 daytoy a libro, nabasata ti maipapan kadagiti sinagaba ni Jesus iti daydi rabii a pannakatiliwna. Impanda iti pagtaengan ti Nangato a Padi a ni Caifas, ket sadiay ti nangukomanda Kenkuana. Nangyegda kadagiti ulbod a saksi a nagparparbo iti estoria maipapan ken Jesus, ket kalpasanna kinabil dagiti tattao. Dayta ti tiempo a panangilibak ni Pedro nga am-ammona ni Jesus. Ipapanta itan nga addata a mismo sadiay ken makitata ti dadduma pay a pasamak.

Bigaten. Nagpatpatnag a siririing ni Jesus. Agsipud ta saan idi a maipalubos ti panangukom no iti rabii, dagus nga inummong dagiti papadi dagiti miembro ti Sanhedrin, wenno nangato a pangukoman dagiti Judio, ket inulitda nga inukom. Pinabasolda manen ni Jesus a nakaaramid kadagiti krimen a maibusor iti Dios.

Kalpasanna, impareppet dagiti papadi, sada impan iti Romano a gobernador a ni Pilato. Kunada ken Pilato: ‘Bumusbusor ni Jesus iti gobierno. Rumbeng a mapapatay.’ Ngem ammo ni Pilato nga agul-ulbod dagiti papadi. Gapuna, kuna ni Pilato kadakuada: ‘Awan ti nakitak a nagbasolan daytoy a tao. Luk-atakto.’ Ngem impukkaw dagiti papadi ken dagiti sabsabali pay: ‘Saan! Patayem!’

Kalpasanna, pinadas manen ni Pilato nga ibaga kadagiti tattao a luk-atanna ni Jesus. Ngem dagiti papadi ginutugotda dagiti tattao a mangipukkaw: ‘No luk-atam, busbusorem met ti gobierno! Patayem!’ Nakaringringgoren dagiti tattao. Ammom kadi no ania ti inaramid ni Pilato?—

Immannugot kadakuada. Umuna, pinasaplitna ni Jesus. Kalpasanna inyawatna kadagiti soldado tapno papatayenda. Kinoronaanda ni Jesus  iti sisiit sada pinagang-angawan babaen ti panagruknoyda iti sanguananna. Kalpasanna, impaawitda ken Jesus ti dakkel a poste sada inturong iti ruar ti siudad, iti lugar a maawagan iti Disso ti Bangabanga. Sadiay nga inlansada dagiti ima ken saka ni Jesus iti poste. Kalpasanna, impatakderda ti poste isu a nakabitinen ni Jesus. Agdardara ken napalalo ti rigatna.

Saan a dagus a natay ni Jesus. Binaybay-anda a nakabitin iti poste. Nagang-angawan dagiti panguluen a papadi. Kuna dagiti lumabas: “No maysaka nga anak ti Dios, umulogka manipud iti kayo a pagtutuokan!” Ngem ammo ni Jesus no ania ti nangibaonan kenkuana ni Amana. Ammona a masapul nga isakripisiona ti perpekto a biagna tapno maaddaantayo iti gundaway nga agbiag nga agnanayon. Kamaudiananna, idi agarup  alas tres iti dayta a malem, imkis ni Jesus ken Amana sa natay.​​—Mateo 26:36–​​27:50; Marcos 15:1; Lucas 22:39–​​23:46; Juan 18:1–​​19:30.

Naiduma unay ni Jesus no idilig ken Adan! Saan nga impakita ni Adan ti ayatna iti Dios. Nagsukir iti Dios. Dinatay met inayat ni Adan. Gapu ta nagbasol, nayanaktayo amin a managbasol. Ngem impakita ni Jesus ti ayatna iti Dios ken kadatayo. Kanayon a nagtulnog iti Dios. Ken insakripisiona ti biagna tapno maikkatna ti dakes nga epekto kadatayo ti basol ni Adan.

Ania ti maaramidtayo a mangipakita nga ay-ayatentayo ni Jesus?

Apresiarem kadi ti nakaskasdaaw nga inaramid ni Jesus?— No agkararagka iti Dios, agyamanka kadi kenkuana gapu ta intedna ti Anakna?— Inapresiar ni apostol Pablo ti naaramidan ni Kristo maipaay kenkuana. Kuna ni Pablo iti suratna a ti Anak ti Dios ‘inayatnak ken inyawatna ti bagina maipaay kaniak.’ (Galacia 2:20) Natay ni Jesus a maigapu met kenka ken kaniak. Insakripisiona ti perpekto a biagna tapno maaddaantayo iti biag nga agnanayon! Pudno a nabileg dayta a rason tapno ayatentayo ni Jesus.

Iti surat ni apostol Pablo kadagiti Kristiano iti siudad ti Corinto, kinunana: “Ti ayat ni Kristo tignayennatayo.” Ania nga aramid ti pangtignayan koma kadatayo ti ayat ni Kristo? Ania ti makunam?— Usigem ti sungbat ni Pablo: “Natay ni Kristo nga agpaay iti isuamin tapno agbiagda a maipaay Kenkuana. Saanda koma nga agbiag a mangparagsak laeng iti bagbagida.”—Dakami ti nangitaliko; 2 Corinto 5:​14, 15, New Life Version.

 Makapanunotka aya kadagiti wagas a pangipakitaam nga agbibiagka tapno maparagsakmo ni Kristo?— Ti maysa a wagas ket babaen ti panangibagam kadagiti sabsabali no ania ti naadalmo maipapan kenkuana. Wenno panunotem daytoy: Mabalin nga agmaymaysaka, isu a di makita ni nanang wenno tatangmo ti ar-aramidem. Awan met ti sabali a tao a makakitkita kenka. Agbuyaka kadi kadagiti programa iti TV wenno nalabit agkitaka kadagiti banag iti Internet nga ammom a saan a pakaragsakan ni Jesus?— Laglagipem, sibibiag itan ni Jesus, ken makitana amin nga ar-aramidentayo!

Siasino ti makakita iti amin nga ar-aramidentayo?

Ti maysa pay a rason no apay a rumbeng nga ayatentayo ni Jesus ket gapu ta kayattayo a tuladen ni Jehova. “Ay-ayatennak ti Ama,” kinuna ni Jesus. Ammom kadi no apay nga ay-ayatenna ni Jesus ken no apay nga ayatentay met koma?— Agsipud ta situtulok ni Jesus a matay tapno maaramid ti pagayatan ti Dios. (Juan 10:17) No kasta, aramidentayo koma ti ibilbilin ti Biblia kadatayo: “Agbalinkayo a tumutulad iti Dios, kas annak a dungdungnguen, ket itultuloyyo ti magna iti ayat, no kasano a ti Kristo inayatnakayo met ken inyawatna ti bagina maipaay kadakayo.”​​—Efeso 5:​1, 2.

Tapno ad-adda a maapresiartayo ni Jesus ken ti inaramidna para kadatayo, pangngaasim ta basaem ti Juan 3:​35; 15:​9, 10; ken 1 Juan 5:​11, 12.