Mapan iti linaonna

Mapan iti listaan dagiti linaonna

 KAPITULO 26

No Apay a Narigat ti Agaramid iti Naimbag

No Apay a Narigat ti Agaramid iti Naimbag

IDI nagaramid ni Saulo iti kinadakes, siasino ti naragsakan?— Ni Satanas a Diablo. Ngem naragsakan met dagiti panguluen ti relihion dagiti Judio. Idi nagbalinen ni Saulo nga adalan ti Naindaklan a Mannursuro ken naawaganen iti Pablo, nangrugin a guraen dagidiay a panguluen ti relihion. No kasta, matarusam kadi no apay a marigatan ti adalan ni Jesus nga agaramid iti naimbag?—

Ania ti sinagaba ni Pablo idi inaramidna ti naimbag?

Iti naminsan, imbilin ti nangato a padi a ni Ananias a kabilen dagiti tattao ni Pablo. Pinadas pay ni Ananias a paibalud ni Pablo. Adu ti sinagaba ni Pablo idi nagbalin nga adalan ni Jesus. Kas pagarigan, kinabkabil dagiti dakes a tattao ni Pablo ken ginandatda a papatayen babaen ti pananguborda iti dadakkel a batbato.​—Aramid 23:​1, 2; 2 Corinto 11:​24, 25.

Adu ti mabalin a mangallukoy kadatayo nga agaramid kadagiti banag a di makaay-ayo iti Dios. Gapuna, ti saludsod ket, Kasano ti panagayatmo iti naimbag? Napalalo kadi ti panagayatmo iti dayta isu nga aramidem latta ti naimbag uray  no guraendaka dagiti dadduma gapu iti dayta? Kasapulan ti tured tapno maaramidmo dayta, di ngamin?—

Mabalin a maisaludsodmo, ‘Apay a kaguradatayo dagiti tattao no agaramidtayo iti naimbag? Saan aya a rumbeng a pagragsakanda koma dayta.’ No pampanunotem, kasta koma a talaga. Masansan a magustuanda idi ni Jesus gapu kadagiti naimbag nga inaramidna. Iti naminsan, isuamin nga umili iti maysa a siudad immaribungbongda iti balay a pagdagdagusanna. Napanda sadiay gapu ta papaimbagen ni Jesus dagiti masakit.​—Marcos 1:33.

Ngem pasaray di kayat dagiti tattao ti isursuro ni Jesus. Nupay kanayon nga umiso ti isursurona, impakita dagiti dadduma ti napalalo a gurada  kenkuana gapu ta agsasao iti pudno. Napasamak daytoy iti maysa nga aldaw idiay Nazaret, ti siudad a dimmakkelan ni Jesus. Napan ni Jesus iti sinagoga, maysa a lugar a pagtataripnongan dagiti Judio tapno agdayawda iti Dios.

Nangipaay ni Jesus sadiay iti nagsayaat a palawag manipud iti Kasuratan. Nagustuan dagiti tattao idi damo. Nasdaawda kadagiti agkakapintas nga imbalikasna. Kasla dida patien a daytoy daydi ubing a dimmakkel iti mismo a siudadda.

Ngem kalpasanna adda sabali a banag nga imbaga ni Jesus. Imbagana nga addanto tiempo nga ipakita ti Dios ti naisangsangayan nga anamongna kadagiti tattao a saan a Judio. Idi imbaga ni Jesus daytoy, nakapungtot dagidiay adda iti sinagoga. Ammom kadi no apay?— Impagarupda nga isuda laeng ti addaan iti naisangsangayan nga anamong ti Dios. Impagarupda a natantan-okda ngem iti dadduma a tattao. Gapuna, kinagurada ni Jesus gapu iti imbagana. Ket ammom kadi no ania ti inaramidda kenkuana?—

Kuna ti Biblia: ‘Tinengngelda ni Jesus ket pinagtalawda iti siudad. Inturongda iti igid ti bantay ken ginandatda nga itapuak iti derraas tapno papatayenda! Ngem nakalibas ni Jesus.’​—Lucas 4:​16-​30.

Apay a dagitoy a tattao ikagkagumaanda a papatayen ni Jesus?

No napasamak dayta kenka, agsublika pay aya tapno kasaritam dagidiay a tattao maipapan iti Dios?— Kasapulam ti tured, di ngamin?— Nupay kasta, kalpasan ti agarup makatawen, nagsubli ni Jesus idiay Nazaret. Kuna ti Biblia: “Rinugianna nga isuro ida kadagiti sinagogada.” Saan a simmardeng ni Jesus a mangibaga iti kinapudno gapu ta saan a mabuteng kadagiti tattao nga awanan panagayat iti Dios.​—Mateo 13:54.

Iti sabali pay nga aldaw, aldaw a panaginana, nakita ni Jesus ti maysa a lalaki a nagango ti imana. Adda pannakabalin ni Jesus a naggapu iti Dios a mangpaimbag iti dayta a lalaki. Ngem adda sumagmamano a lallaki sadiay a mangpadpadas a mangsupiat ken Jesus. Ania ti inaramid  ti Naindaklan a Mannursuro?— Umuna, insaludsodna: ‘No addaankayo iti karnero a natnag iti dakkel nga abut iti Sabbath, aonenyo aya?’

Wen, aonenda ti karnero uray iti Sabbath, wenno ti aldaw a panaginanada koma. Gapuna, kinuna ni Jesus: ‘Nasaysayaat pay a tulongan ti maysa a tao iti Sabbath, gapu ta napatpateg ti tao ngem iti karnero!’ Anian a nagbatad a rumbeng a tulongan ni Jesus daytoy a lalaki babaen ti panangpaimbagna kenkuana!

Binilin ni Jesus ti lalaki nga iyunnatna ti imana. Dagus nga immimbag ti imana. Anian a ragsak dayta a lalaki! Ngem dagidiay ngay dadduma a lallaki? Naragsakanda kadi?— Saan. Ad-adda pay a kinagurada ni Jesus. Rimmuarda ket implanoda a papatayen ni Jesus!​—Mateo 12:​9-​14.

Kasta met laeng itatta. Aniaman ti aramidentayo, pulos a ditay maparagsak amin a tattao. Masapul ngarud nga ikeddengtayo no siasino a talaga ti kayattayo a paragsaken. No kayattayo a paragsaken ni Jehova a Dios ken ni Jesu-Kristo nga Anakna, masapul ngarud a kanayon a surotentayo ti isursuroda. Ngem no aramidentayo dayta, siasino ti manggura kadatayo? Siasino ti mangparigat kadatayo nga agaramid iti naimbag?—

Ni Satanas a Diablo. Ngem asino pay?— Dagidiay naallilaw ti Diablo a mamati kadagiti di umiso a banag. Kinuna ni Jesus kadagiti panguluen ti relihion idi kaaldawanna: “Naggapukayo iti amayo a Diablo, ket kayatyo nga aramiden dagiti tarigagay ni amayo.”​—Juan 8:44.

Adu ti tattao a magustuan ti Diablo. Inawagan ida ni Jesus a “ti lubong.” Ania ngata “ti lubong” nga ibagbaga ni Jesus?— Kitaenta ti Juan kapitulo 15, bersikulo 19. Kastoy ti mabasata a kinuna ni Jesus: “No pasetnakayo koma ti lubong, ti lubong maayatan iti kukuana. Ita agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong.”

Gapuna, ti lubong a manggura kadagiti adalan ni Jesus ket buklen dagiti amin a tattao a saanna a pasurot. Apay a guraen ti lubong dagiti  adalan ni Jesus?— Panunotem daytoy. Siasino ti agturay iti lubong?— Kuna ti Biblia: “Ti intero a lubong adda iti pannakabalin daydiay nadangkes.” Dayta a nadangkes ket ni Satanas a Diablo.​—1 Juan 5:19.

Matarusam kadin no apay a nakarigrigat ti agaramid iti naimbag?— Ni Satanas ken ti lubongna ti mangparparigat. Ngem adda pay sabali a makagapu. Malagipmo kadi?— Iti Kapitulo 23 daytoy a libro, naammuanta a nayanaktayo amin a managbasol. Saan aya a nakasaysayaat no maawanen ti basol, ti Diablo, ken ti lubongna?—

Inton maawan daytoy a lubong, anianto ti mapasamak kadagidiay agar-aramid iti naimbag?

Inkari ti Biblia: “Ti lubong aglabas.” Kayatna a sawen a maawanton amin dagidiay saan a pasurot ti Naindaklan a Mannursuro. Saandanto a mapalubosan nga agbiag nga agnanayon. Ammom kadi no siasino ti agbiag nga agnanayon?— Ituloy a kunaen ti Biblia: “Ti agaramid iti pagayatan ti Dios agtalinaed iti agnanayon.” (1 Juan 2:17) Wen, dagidiay laeng agaramid iti naimbag, dagidiay agaramid “iti pagayatan ti Dios,” ti agbiag nga agnanayon iti baro a lubong ti Dios. Isu nga uray narigat, saan kadi a kayattayo ti agaramid iti naimbag?—

Basaenta dagitoy a teksto a mangipakita no apay a saan a nalaka ti agaramid iti naimbag: Mateo 7:​13, 14; Lucas 13:​23, 24; ken Aramid 14:​21, 22.