Mapan iti linaonna

Mapan iti listaan dagiti linaonna

 KAPITULO 9

Nasken a Labanantayo Dagiti Sulisog

Nasken a Labanantayo Dagiti Sulisog

ADDA kadi ammom a nangbilin kenka nga agaramid iti di umiso?— Kinaritnaka aya a mangaramid iti dayta? Wenno imbagana kadi a makaparagsak dayta ken saan nga agpaypayso a dakes?— No adda mangaramid iti kastoy kadatayo, padpadasennatayo a sulisogen.

Ania ti rumbeng nga aramidentayo no adda mangsulisog kadatayo? Tumuloktayo aya ken agaramidtayo iti di umiso?— Saan a makaay-ayo dayta ken Jehova a Dios. Ngem ammom kadi no siasino ti maragsakan?— Wen, ni Satanas a Diablo.

Kabusor ti Dios ni Satanas, ken kabusortayo met. Ditay makita gapu ta maysa nga espiritu. Ngem makitanatayo. Maysa nga aldaw, nakisarita ti Diablo ken ni Jesus, ti Naindaklan a Mannursuro, ket pinadasna a sulisogen. Kitaenta no ania ti inaramid ni Jesus. Iti kasta ammotayo ti nasayaat nga aramidentayo no adda mangsulisog kadatayo.

Ania ti mabalin a malagipen ni Jesus idi nabautisaran?

Kanayon a kayat ni Jesus nga aramiden ti pagayatan ti Dios. Impanayagna daytoy babaen ti panagpabautisarna idiay Karayan Jordan. Kalpasan ti pannakabautisar ni Jesus, pinadas ni Satanas a sulisogen. Kuna ti Biblia a “naluktan ti langlangit” iti imatang ni Jesus. (Mateo 3:16) Mabalin a kayat a sawen daytoy a nangrugin a malagip ni Jesus ti maipapan iti dati a biagna idiay langit a kadua ti Dios.

 Kalpasan ti pannakabautisarna, napan ni Jesus idiay let-ang tapno utobenna dagiti bambanag a malagipnan. Limmabas ti uppat a pulo nga aldaw ken rabii. Saan pay a pulos a nangnangan ni Jesus, isu a mabisin unayen. Iti daydi a tiempo, pinadas ni Satanas a sulisogen ni Jesus.

Kasano nga inusar ti Diablo dagiti bato tapno sulisogenna ni Jesus?

Kinuna ti Diablo: “No sika ket anak ti Dios, ibagam kadagitoy a bato nga agbalinda a tinapay.” Nagimas ketdi koman ti tinapay! Ngem kabaelan kadi ni Jesus a pagbalinen a tinapay dagiti bato?— Wen, kabaelanna. Apay? Gapu ta adda naisangsangayan a pannakabalin ni Jesus kas Anak ti Dios.

Pinagbalinmo aya koma a tinapay ti bato no sika ti binilin ti Diablo?— Mabisin idi ni Jesus. Gapuna, mabalinna latta kadi nga aramiden dayta uray maminsan laeng?— Ammo ni Jesus a di umiso ti kasta a panangusar iti pannakabalinna. Inikkan ni Jehova iti pannakabalin tapno tulonganna dagiti tattao nga umadani iti Dios. Saanna nga usaren iti bukodna a pagimbagan.

Gapuna, imbaga ketdi ni Jesus ken ni Satanas ti naisurat iti Biblia: ‘Ti tao agbiag, saan nga iti tinapay laeng, no di ket iti tunggal sao a rummuar iti ngiwat ni Jehova.’ Ammo ni Jesus a napatpateg ti agaramid iti pakaragsakan ni Jehova ngem ti maaddaan iti kanen.

Ngem pinadas manen ti Diablo. Impanna ni Jesus idiay Jerusalem sa pinagtakderna iti nangato a paset ti templo. Kalpasanna kinuna  ni Satanas: ‘No sika ti anak ti Dios, tumapuakka ditoy. Ta adda a naisurat a dagiti anghel ti Dios ti mangsalaknib kenka.’

Apay a kastoy ti imbaga ni Satanas?— Imbagana dayta tapno sulisogenna ni Jesus nga agaramid iti minamaag. Ngem manen, saan a dimngeg ni Jesus ken ni Satanas. Kinunana ken Satanas: “Adda a naisurat, ‘Dika suboken ni Jehova a Diosmo.’” Ammo ni Jesus a di umiso a subokenna ni Jehova babaen ti panangirisgona iti biagna.

Ngem saan a simmardeng ni Satanas. Simmaganad, impanna ni Jesus iti nakangatngato a bantay. Sadiay nga impakitana kenkuana amin a pagpagarian, wenno gobierno, ti lubong ken ti dayagda. Kalpasanna kinuna ni Satanas ken ni Jesus: “Amin dagitoy a banag itedkonto kenka no agruknoyka ken mangaramidka iti maysa a tignay a panagdayaw kaniak.”

Panunotem ti intukon ti Diablo. Talaga kadi a kukua ni Satanas amin dagitoy a pagarian, wenno gobierno ti tao?— Kinapudnona, saan a sinupiat ni Jesus a kukua ni Satanas dagita. Mabalinna koma a supiaten dayta no saan a ni Satanas ti makinkukua kadagita. Wen, talaga a ni Satanas ti agturay kadagiti amin a nasion ti lubong. Inawagan pay ti Biblia ni Satanas a “ti agturay iti daytoy a lubong.”​​—Juan 12:31.

Apay a maitukon ni Satanas ken Jesus amin dagitoy a pagarian?

Ania ti aramidem no ikari ti Diablo nga adda itedna kenka no agdayawka kenkuana?— Ammo ni Jesus a dakes ti agdayaw iti Diablo uray pay ania ti maalana a gunggona. Isu a kinuna ni Jesus: ‘Pumanawka, Satanas! Ta kuna ti Biblia a ni Jehova a Diosmo ti masapul a dayawem ket isu laeng ti masapul a pagserbiam.’​​—Mateo 4:​1-​10; Lucas 4:​1-​13.

Ania ti aramidem no adda mangsulisog kenka?

Maipaspasangotayo met kadagiti pakasulisogan. Addada kadi ammom a pakasulisogan?— Daytoy ti maysa a pagarigan. Mabalin nga agaramid ni nanangmo iti naimas a tinapay wenno bibingka. Mabalin nga ibagana kenka a dika pay laeng mangmangan. Ngem mabisinka unayen, isu a kasla masulsulisogka a mangan. Tungpalem kadi ni nanangmo?— Kayat ni Satanas a sumukirka kenkuana.

 Laglagipem ni Jesus. Mabisbisin met unay idi. Ngem ammona a napatpateg ti mangparagsak iti Dios ngem ti pannangan. Maipakitam a tultuladem ni Jesus no tungpalem ti imbaga ni nanangmo.

Mabalin a sulisogendaka ti dadduma nga ubbing nga uminum kadagiti tableta. Baka ibagada kenka a nagsayaat ti mariknam no tomarem dagita. Ngem baka droga dagita a tableta. Mabalin a pagsakitennaka wenno pakatayam pay ketdi.  Wenno baka adda mangted kenka iti sigarilio, a naglaon met iti droga, ket karitennaka nga agsigarilio. Ania ti aramidem?—

Laglagipem ni Jesus. Sinulisog ni Satanas ni Jesus nga irisgona ti biagna idi imbagana kenkuana a tumapuak iti templo. Ngem saan nga aramiden ni Jesus ti kasta. Ania ti aramidem no adda mangkarit kenka a mangaramid iti banag a napeggad?— Saan nga impangag ni Jesus ni Satanas. Saanmo met koma nga ipangag ti asinoman a mangpadas a mangimpluensia kenka nga agaramid iti dakes.

Apay a di umiso ti agusar kadagiti imahen iti panagdayaw?

Mabalin nga addanto tiempo nga allukoyendaka nga agdayaw iti imahen, ngem iparparit dayta ti Biblia. (Exodo 20:​4, 5) Mabalin a paset dayta ti seremonia idiay eskuelaan. Mabalin nga ibagada kenka a saanka pay ketdi a makapageskuela no dimo aramiden dayta. Ania ti aramidem?—

Nalaka ti agaramid iti naimbag no kasta ti ar-aramiden ti isuamin. Ngem nakarigrigat ti agaramid iti naimbag no addada mangpadpadas a mangimpluensia kadatayo nga agaramid iti di umiso. Mabalin nga ibagada a saan met a talaga a nakadakdakes ti ar-aramidenda. Ngem ti napateg a saludsod ket, Ania ti kuna ti Dios maipapan iti dayta? Isu ti makaammo iti kasayaatan.

Gapuna, uray ania ti ibaga dagiti dadduma, saantayo koma a pulos nga aramiden dagiti banag a kuna ti Dios a dakes. Iti kasta, kanayon a maparagsaktayo ti Dios, ket ditay pulos pagustuan ti Diablo.

Masarakan iti Salmo 1:​1, 2; Proverbio 1:​10, 11; Mateo 26:41; ken 2 Timoteo 2:​22 ti ad-adu pay nga impormasion no kasano a labanan ti sulisog nga agaramid iti dakes.