Mapan iti linaonna

Mapan iti listaan dagiti linaonna

 KAPITULO 6

Ti Naindaklan a Mannursuro Nagserbi Kadagiti Sabsabali

Ti Naindaklan a Mannursuro Nagserbi Kadagiti Sabsabali

MARAGSAKANKA kadi no adda nasayaat a maaramidan kenka dagiti sabsabali?— Uray dagiti dadduma a tattao maragsakanda met no makaaramid dagiti sabsabali iti pagsayaatanda. Kastatayo amin. Ammo dayta ti Naindaklan a Mannursuro, ket kanayon idi nga agar-aramid iti pagsayaatan dagiti sabsabali. Kinunana: ‘Immayak, saan a tapno pagserbian, no di ket tapno agserbi.’​—Mateo 20:28.

Ania ti pagririkiaran idi dagiti pasurot ni Jesus?

Gapuna, no kayattayo a tuladen ti Naindaklan a Mannursuro, ania ti masapul nga aramidentayo?— Masapul a pagserbiantayo dagiti sabsabali. Masapul nga agaramidtayo kadagiti pagsayaatanda. Agpayso a saan a kastoy ti ar-aramiden ti adu a tattao. Kinapudnona, kaaduan a tattao kanayon a kayatda nga isuda ti pagserbian dagiti sabsabali. Uray dagiti pasurot ni Jesus nakariknada met idi iti kasta. Tinarigagayanda amin ti agbalin a katan-okan wenno kapatgan.

Maysa nga aldaw, agdaldaliasat ni Jesus ken dagiti adalanna. Idi makastrekdan iti siudad ti Capernaum, iti asideg ti Baybay ti Galilea, simrekda amin iti maysa a balay. Sadiay a pinagsaludsodan ida ni Jesus: “Ania ti nagririkiaranyo iti dalan?” Dida makauni gapu ta idi addada  iti dalan pagririkiaranda no siasino ti katan-okan kadakuada.​—Marcos 9:33, 34.

Ammo ni Jesus a di umiso a panunoten dagiti adalanna nga adda natantan-ok kadakuada. Gapuna, kas naadaltayo iti immuna a kapitulo daytoy a libro, pinagtakderna ti bassit nga ubing iti tengngada sa imbagana kadakuada nga agbalinda koma a napakumbaba a kas iti dayta bassit nga ubing. Ngem dida latta nakasursuro. Isu nga idi asidegen ti ipapatayna, adda leksion nga insuro ni Jesus kadakuada a didanto pulos malipatan. Ania ti inaramidna?—

Idi sumangodan amin iti panganan, timmakder ni Jesus sana inikkat ti makinruar a kawesna. Nangala iti tualia sana imbarikes. Kalpasanna, nangala iti palanggana ken kinargaanna iti danum. Sigurado a masmasdaaw dagiti pasurotna no ania ti aramidenna. Bayat nga agbuybuyada, sinaggaysa a binugguan ni Jesus dagiti saksakada. Kalpasanna, pinunasanna dagiti sakada iti tualia. Agasem dayta! Kas pagarigan ta addaka idi sadiay, ania ngata ti nariknam?—

Ania a leksion ti isursuro idi ni Jesus kadagiti pasurotna?

Impagarup dagiti pasurotna a di umiso ti kastoy a panagserbi kadakuada ti Naindaklan a Mannursuro. Nabainanda. Kinapudnona, saan nga ipalubos idi ni Pedro nga aramiden ni Jesus kenkuana ti kasta a nanumo a panagserbi. Ngem kinuna ni Jesus a nasken nga aramidenna dayta.

Saan a gagangay itatta a bugguantayo ti saksaka dagiti sabsabali. Ngem kasta ti gagangay a maar-aramid idi adda ni Jesus ditoy daga. Ammom kadi no apay?— Ngamin, idiay pagilian a nagnaedan ni Jesus ken dagiti pasurotna, nakapalloka laeng dagiti tattao gapu ta awan pay idi ti sapatos. Isu a no magnada kadagiti natapok a kalsada, nakataptapok dagiti sakada. Panangipakita iti kinaimbag no bugguanda dagiti natapok a saka ti asinoman a sumarungkar iti balayda.

Ngem iti daydi a tiempo, awan uray maysa kadagiti adalan ni Jesus ti nagboluntario a mangbuggo kadagiti sakada. Isu a ni Jesus a mismo ti nangaramid iti dayta. Iti kasta, adda napateg a leksion nga insuro ni Jesus  kadagiti pasurotna. Masapul a masursuroda daytoy a leksion. Ket maysa dayta a leksion a masapul a sursuruentayo.

Ammom kadi no ania dayta a leksion?— Idi naisuoten ni Jesus dagiti makinruar a kawesna ken nakasublin iti lamisaan, inlawlawagna: “Ammoyo kadi no ania ti inaramidko kadakayo? Awagandak iti, ‘Mannursuro,’ ken, ‘Apo,’ ket umiso ti panagsaoyo, ta kastaak. Ngarud, no siak, nupay Apo ken Mannursuro, binugguak dagiti sakayo, rebbengyo met a bugguan dagiti saka ti maysa ken maysa.”​—Juan 13:2-14.

Ania ti maitulongmo kadagiti sabsabali?

Impakita ti Naindaklan a Mannursuro a kayatna nga agserbi iti maysa ken maysa dagiti adalanna. Dina kayat nga agbalinda a managimbubukodan. Dina kayat a panunotenda a nakapatpategda unay isu a rumbeng a kanayon a pagserbian ida dagiti sabsabali. Kayatna a situtulokda koma nga agserbi kadagiti sabsabali.

Saan aya a nagsayaat a leksion dayta?— Tuladem kadi ti Naindaklan a Mannursuro ket agserbika kadagiti sabsabali?— Mabalintayo amin ti agaramid iti pagsayaatan dagiti sabsabali. Daytoy ti mangparagsak kadakuada. Ngem kangrunaanna, dayta ti mangparagsak ken Jesus ken ti Amana.

 Saan a narigat ti agserbi kadagiti sabsabali. No agsiputka, adu ti makitam a maitulongmo kadagiti dadduma. Panunotem daytoy: Adda kadi maitulongmo ken ni nanangmo? Ammom nga adu ti ar-aramidenna para kenka ken iti intero a pamilia. Mabalinmo kadi a tulongan?— Apay a dimo damagen kenkuana?

Nalabit mabalinmo ti agidasar sakbay ti pannangan. Wenno mabalinmo a dalusan ti lamisaan kalpasan ti pannangan. Dadduma nga ubbing isuda ti agibelleng iti basura iti inaldaw. Aniaman ti maaramidam, makapagserbika kadagiti sabsabali a kas iti inaramid ni Jesus.

Addada kadi adingmo a mabalinmo a pagserbian? Laglagipem a nagserbi ni Jesus, ti Naindaklan a Mannursuro, uray kadagiti pasurotna. No pagserbiam dagiti adingmo, tultuladem ni Jesus. Ania ti maitulongmo kadakuada?— Mabalinmo a sursuruan ida a mangipakni kadagiti abalbalayda no nalpasdan nga agay-ayam. Wenno mabalinmo  a tulongan ida nga agaruat. Wenno nalabit matulongam ida a mangiplastar iti pagturoganda. Adda pay kadi sabali a mapanunotmo a maitulongmo kadakuada?— Ay-ayatendaka no aramidem dagitoy, a kas iti panagayat kenkuana dagiti pasurot ni Jesus.

Uray idiay eskuelaan mabalinmo met ti agserbi kadagiti sabsabali. Mabalinmo a pagserbian dagiti kaeskuelaam, ti maestram wenno ti maestrom. No adda makaregreg kadagiti librona, maipakitam a naasika no tulongam a mangpidut kadagita. Mabalinmo ti agboluntario a mangdalus iti pisara wenno adda pay sabali a maitulongmo iti maestra wenno maestrom. Maipakitam met ti asi no ilukatam ida iti ruangan.

No dadduma, madlawtayo nga awan panagyaman dagiti tattao a pagserbiantayo. Gapu iti dayta, sumardengtayo kadin nga agaramid iti naimbag?— Saan! Adu ti tattao a di nagyaman ken Jesus kadagiti nasayaat nga inaramidna. Ngem saan a namingga a nagaramid iti naimbag.

Gapuna, ditay koma sumardeng nga agserbi kadagiti sabsabali. Laglagipentayo ti Naindaklan a Mannursuro, a ni Jesus, ket kanayon nga ikagumaantayo a suroten ti ulidanna.

Para iti ad-adu pay a teksto maipapan iti panangtulong kadagiti sabsabali, basaem ti Proverbio 3:27, 28; Roma 15:1, 2; ken Galacia 6:2.