Mapan iti linaonna

Mapan iti listaan dagiti linaonna

 KAPITULO 10

Nabilbileg ni Jesus Ngem Kadagiti Demonio

Nabilbileg ni Jesus Ngem Kadagiti Demonio

MALAGIPMO kadi no apay a nagbalin a Satanas a Diablo ti maysa kadagiti anghel ti Dios?— Binusorna ti Dios gapu iti inaagum a tarigagayna nga isu ti pagdayawan. Adda kadi dadduma pay nga anghel a nagbalin a pasurot ni Satanas?— Adda. Inawagan ida ti Biblia a ‘dagiti anghel ni Satanas,’ wenno demonio.​—Apocalipsis 12:9.

Mamati kadi iti Dios dagitoy a dakes nga anghel, wenno demonio?— ‘Mamati dagiti sairo nga adda Dios,’ kuna ti Biblia. (Santiago 2:19) Ngem mabutengdan kenkuana. Ammoda ngamin a dusaen ida ti Dios gapu kadagiti dakes nga inaramidda. Ania dagiti dakes nga inaramidda?—

Kuna ti Biblia a pinanawan dagidiay nga anghel ti maitutop a pagnaedanda idiay langit ket immayda ditoy daga tapno agbiagda a kas tattao. Inaramidda daytoy gapu ta kayatda ti maaddaan iti seksual a relasion kadagiti napipintas a babbai ditoy daga. (Genesis 6:​1, 2; Judas 6) Ania ti ammom maipapan iti seksual a relasion?—

 Ti seksual a relasion tuktukoyenna ti naisangsangayan unay a kinasinged ti maysa a lalaki ken babai. Kalpasanna, mabalin a dumakkel ti maladaga iti tian ti ina. Ngem dakes kadagiti anghel ti maaddaan iti seksual a relasion. Kayat ti Dios a dagiti laeng agassawa a lalaki ken babai ti maaddaan iti seksual a relasion. Iti kasta, no mayanak ti maladaga, ti asawa a lalaki ken babai ti mangaywan iti dayta.

Ania ti dakes nga inaramid dagitoy nga anghel?

Idi naglasag a kas tao dagiti anghel ken nakidennada kadagiti babbai ditoy daga, dimmakkel dagiti annakda agingga a nagbalinda a higante. Narungsotda unay, ken ranggasanda dagiti tattao. Gapuna, nangyeg ti Dios iti dakkel a layus tapno dadaelenna dagiti higante ken amin a nadangkes a tattao. Ngem binilinna ni Noe a mangibangon iti daong, wenno dakkel a bangka, tapno maisalakan ti sumagmamano a tattao a nagaramid iti naimbag. Kinuna ti Naindaklan a Mannursuro a napateg a laglagipen ti napasamak iti Layus.​—Genesis 6:​3, 4, 13, 14; Lucas 17:​26, 27.

Idi dimteng ti Layus, ammom kadi ti napasamak kadagiti dakes nga anghel?— Pinanawandan dagiti inaramidda a natauan a bagida, ket nagsublida idiay langit. Ngem saandan nga anghel ti Dios, isu a nagbalinda nga anghel ni Satanas, wenno demonio. Ket ania  ti napasamak kadagiti annakda, dagiti higante?— Natayda iti Layus. Ken natay met amin a sabsabali pay a tattao a di nagtulnog iti Dios.

Apay a nakaro unay itan ti kinadakes ditoy daga?

Manipud iti daydi a Layus, saanen a pinalubosan ti Dios nga agbalin a kasla tao dagiti demonio. Ngem nupay ditay makita dagiti demonio, kaskasdi nga ikagkagumaanda a sulisogen dagiti tattao nga agaramid kadagiti nakadakdakes a banag. Nakarkaro itan ti panangriribukda. Napagtalawda ngaminen idiay langit ket naitapuakda ditoy daga.

Ammom kadi no apay a ditay makita dagiti demonio?— Espirituda ngamin. Ngem masiguradotayo a sibibiagda. Kuna ti Biblia a ni Satanas ti ‘mangyaw-awan kadagiti tattao iti intero a lubong,’ ket dagiti demoniona ti tumultulong kenkuana.​​—Apocalipsis 12:​9, 12.

Mabalinandatayo met kadi nga iyaw-awan, wenno allilawen ti Diablo ken dagiti demoniona?— Wen, maallilawdatayo no ditay agannad. Ngem ditay agbuteng. Kinuna ti Naindaklan a Mannursuro: ‘Awan pannakabalin ti Diablo kaniak.’ No umadanitayo iti Dios, salaknibannatayo iti Diablo ken kadagiti demoniona.​​—Juan 14:30.

Nasken nga ammotayo no ania dagiti dakes a pangallilaw kadatayo dagiti demonio. Gapuna, agpanunottayo. Ania dagiti dakes nga inaramid dagiti demonio idi immayda ditoy daga?— Sakbay ti Layus, naaddaanda iti seksual a relasion kadagiti babbai, ket saan a maiparbeng dayta kadagiti anghel. Itatta, maragsakan dagiti demonio no saan nga agtulnog dagiti tattao iti linteg ti Dios maipapan iti seksual a relasion. Damagek man kenka, Siasino laeng ti rumbeng a maaddaan iti seksual a relasion?— Umiso ti sungbatmo, dagiti laeng agassawa.

Itatta, addada agtutubo a lallaki ken babbai nga addaan iti seksual a relasion, ngem dakes daytoy kadakuada. Dakamaten ti Biblia ti maipapan iti ‘mabagbagi’ ti lalaki, wenno ti billitna. (Levitico 15:​1-3) Ti mabagbagi ti babai ket maawagan iti pipit. Pinarsua ni Jehova dagitoy a paset ti bagi para iti naisangsangayan a panggep a tagiragsaken laeng koma dagiti agassawa. Maragsakan dagiti demonio no agaramid dagiti tattao iti bambanag nga iparparit ni Jehova. Kas pagarigan, pagay-ayat dagiti demonio no  ay-ayamen ti agtutubo a lalaki ken babai ti billit wenno pipitda. Ditay kayat a paragsaken dagiti demonio, di ngamin?—

Adda pay sabali a pagay-ayat dagiti demonio ngem kagura ni Jehova. Ammom kadi no ania dayta?— Ti kinaranggas. (Salmo 11:5) Makuna a kinaranggas no nauyong dagiti tattao ken dangranda dagiti sabsabali. Laglagipem, kasta ti inaramid idi dagiti higante nga annak dagiti demonio.

Pagay-ayat met dagiti demonio a butbutngen dagiti tattao. No dadduma agpammarangda nga isuda dagiti tattao a natayen. Mabalin a tuladenda pay ketdi ti timek dagidiay natay. Kastoy ti panangallilaw dagiti demonio iti adu a tattao tapno patienda a sibibiag pay dagiti natayen a tattao ken mabalinda a kasarita dagiti sibibiag. Wen, al-allilawen dagiti demonio ti adu a tattao tapno mamatida kadagiti al-alia.

Masapul ngarud nga agannadtayo tapno saannatayo a maallilaw ni Satanas ken dagiti demoniona. Ipakdaar ti Biblia: ‘Padpadasen ni Satanas a pagbalinen ti bagina a kasla nasayaat nga anghel, ket kasta met laeng ti aramiden dagiti adipenna.’  (2 Corinto 11:​14, 15) Ngem kinapudnona, dakes dagiti demonio. Kitaenta no kasano ti panangpadasda a mangallilaw kadatayo a mangtulad kadakuada.

Sadino ti adu a pakasursuruan dagiti tattao iti kinaranggas, di umiso a seksual a relasion, espiritu a parparsua, ken al-alia?— Saan aya a kadagidiay pabuya iti telebision ken pelikula, panagay-ayam kadagiti kompiuter ken video, panagusar iti Internet, ken panagbasa kadagiti komiks? No ar-aramidentayo dagitoy, sumingedtayo kadi iti Dios wenno iti Diablo ken kadagiti demoniona? Ania ti panagkunam?—

Ania ti mabalin a mapasamak no agbuybuyatayo iti kinaranggas?

Siasino ti ammom a maay-ayatan no denggen ken buyaentayo dagiti dakes a banag?— Wen, ni Satanas ken dagiti demoniona. Gapuna, ania ti masapul nga aramidenta?— Masapul a ti basaen, denggen, ken buyaenta ket dagidiay mangted iti pagimbaganta ken tumulong kadata nga agserbi ken Jehova. Addada kadi mapanunotmo a naimbag a bambanag a mabalinta nga aramiden?—

Ania ti nasayaat nga aramidentayo?

No naimbag ti ar-aramidentayo, awan rason a pagbutngantayo dagiti demonio. Napigpigsa ni Jesus ngem kadakuada, ket mabutengda kenkuana. Maysa nga aldaw, inyikkis dagiti demonio ken ni Jesus: “Immayka kadi tapno dadaelennakami?” (Marcos 1:24) Ditay kadi maragsakan inton dumteng ti tiempo a dadaelen ni Jesus ni Satanas ken dagiti demoniona?— Kabayatanna, masiguradotayo a salaknibannatayo ni Jesus kadagiti demonio no kanayon a nasingedtayo kenkuana ken iti nailangitan nga Amana.

Basaenta iti 1 Pedro 5:​8, 9 ken Santiago 4:​7, 8 no ania ti masapul nga aramidenta.