Mapan iti linaonna

Mapan iti listaan dagiti linaonna

 KAPITULO 24

Pulos a Dika Koma Agbalin a Mannanakaw

Pulos a Dika Koma Agbalin a Mannanakaw

NAPADASAM kadin ti natakawan?— Ania ti nariknam gapu iti dayta?— Siasinoman ti nangala iti dayta ket maysa a mannanakaw, ket awan ti mangayat iti mannanakaw. Kasano ngata nga agbalin a mannanakaw ti maysa a tao? Nayanak kadi a kasta?—

Kalkalpasta laeng a naammuan a nayanak a managbasol dagiti tattao. No kasta, imperpektotayo amin. Ngem awan ti nayanak a mannanakaw. Mabalin a nasayaat a pamilia ti nagtaudan ti maysa a mannanakaw. Mabalin a mapagpiaran dagiti nagannak ken kakabsatna. Ngem mabalin a maallukoy nga agtakaw gapu iti tarigagayna iti kuarta ken dagiti magatang ti kuarta.

Siasino ti ammom nga immuna a mannanakaw?— Panunotenta dayta. Idi adda idiay langit ti Naindaklan a Mannursuro, am-ammona dayta a persona. Dati nga anghel dayta a mannanakaw. Ngem yantangay inaramid ti Dios a perpekto dagiti amin nga anghel, kasano a nagbalin a mannanakaw dayta nga anghel?— Kas naammuanta iti Kapitulo 8 daytoy a libro, tinarigagayanna ti banag a saanna a kukua. Malagipmo kadi no ania daydiay?—

Kalpasan a pinarsua ti Dios ti immuna a lalaki ken babai, tinarigagayan dayta nga anghel nga isu ti pagdayawanda. Awan kalinteganna a mangagaw iti panagdayawda. Kukua ti Dios dayta. Ngem tinakawna! Babaen ti panangallukoyna kada Adan ken Eva nga agdayaw kenkuana, nagbalin a mannanakaw ti anghel. Nagbalin a Satanas a Diablo.

Apay nga agbalin a mannanakaw ti maysa a tao?— Gapu iti panagtarigagayna iti saanna a kukua. Mabalin a pumigsa unay daytoy a tarigagay agingga a gutugotenna nga agaramid iti dakes uray pay dagiti  naimbag a tattao. No dadduma, dagidiay tattao nga agbalin a mannanakaw pulos a saandan nga agbabawi ken agaramid manen iti naimbag. Ti maysa a pagarigan ket ti dati nga apostol ni Jesus. Judas Iscariote ti naganna.

Ammo ni Judas a dakes ti agtakaw gapu ta nasursuruan iti Linteg ti Dios manipud pay kinaubingna. Ammona a nagsao pay idi ti Dios manipud langit ket imbagana iti ilina: “Dika agtakaw.” (Exodo 20:15) Idi nataenganen ni Judas, naam-ammona ti Naindaklan a Mannursuro ken nagbalin a maysa kadagiti adalanna. Di nagbayag, pinili pay ni Jesus ni Judas nga agbalin a maysa kadagiti 12 nga apostolna.

Kakuykuyog idi ni Jesus dagiti apostolna bayat nga agdaldaliasat. Agkakapanganda. Adda maysa a kahon a pakaidulinan idi ti amin a kuartada. Impaaywan ni Jesus dayta a kahon ken ni Judas. Siempre, saan a kukua ni Judas ti kuarta. Ngem ammom kadi no ania ti inaramid ni Judas?—

Apay a nagtakaw ni Judas?

Rinugian ni Judas ti mangala iti kuarta manipud iti kahon uray awan ti pammalubos. Mangala iti kuarta no awan ti makakitkita, ken ipampamuspusanna pay ketdi ti mangala iti ad-adu pay. Kanayon laengen a kuarta ti pampanunotenna. Kitaenta ti imbunga daytoy a dakes a tarigagay sumagmamano laeng nga aldaw sakbay ti pannakapapatay ti Naindaklan a Mannursuro.

Ni Maria, a kabsat ni Lazaro a gayyem ni Jesus, ket nangala iti nakasaysayaat a lana ken imbukbokna iti saksaka ni Jesus. Ngem nagreklamo ni Judas. Ammom kadi no apay?— Kinunana a gapu ta mabalin koma a nailako ti lana ket naited ti kuarta kadagiti napanglaw. Ngem kinapudnona, kayatna nga ad-adu koma ti kuarta a maidulin iti kahon tapno matakawna.​—Juan 12:​1-6.

Binilin ni Jesus ni Judas a saannan a ririen ni Maria gapu iti nakasaysayaat nga inaramidna. Nakagura ni Judas idi imbaga ni Jesus dayta kenkuana, isu a napan iti panguluen dagiti papadi, a kabusor idi ni Jesus.  Kayatda a tiliwen ni Jesus, ngem kayatda nga aramiden dayta iti rabii tapno saan a makita ida dagiti tattao.

Kinuna ni Judas kadagiti papadi: ‘Ibagak kadakayo no kasanoyo a makita ken matiliw ni Jesus, no bayadandak. Mano ti pangbayadyo kaniak?’

Simmungbat dagiti papadi: ‘Ikkandaka iti tallo pulo a kapisi ti pirak.’​—Mateo 26:14-​16.

Innala ni Judas ti kuarta. Arigna inlakona ti Naindaklan a Mannursuro kadagidiay a lallaki! Mapanunotmo kadi nga adda asinoman a makaaramid iti kasta a kinadakes?— Nakalkaldaang ta kasta ti mapasamak no agbalin a mannanakaw ti maysa a tao ken agtakaw iti kuarta. Ad-adda nga ay-ayatenna ti kuarta ngem dagiti dadduma a tattao wenno uray pay ti Dios.

Mabalin a kunaem, ‘Diakto pulos ayaten ti aniaman a banag nga ad-adda ngem ti panagayatko ken Jehova a Dios.’ Nasayaat no kasta ti riknam. Idi pinili ni Jesus ni Judas kas maysa nga apostol, nalabit kasta ti rikna ni Judas. Mabalin a kasta met ti dati a rikna ti dadduma a nagbalin a mannanakaw. Pagsaritaanta ti maipapan iti dadduma kadakuada.

Ania dagiti dakes a pampanunoten da Acan ken David?

Ti maysa ket adipen ti Dios nga agnagan  iti Acan, a nabayagen a nagbiag sakbay a nayanak ti Naindaklan a Mannursuro. Nakakita ni Acan iti nagpintas a kawes, balitok, ken sumagmamano a pirak. Saanna a kukua dagita. Kuna ti Biblia a kukua ni Jehova dagita gapu ta naala manipud kadagiti kabusor ti ili ti Dios. Ngem tinarigagayan unay ni Acan dagita isu a tinakawna.​—Josue 6:​19; 7:​11, 20-​22.

Adtoy ti sabali pay a pagarigan. Idi un-unana, pinili ni Jehova ni David nga agbalin nga ari iti Israel. Maysa nga aldaw, nakita ni David ti nagpintas a babai a ni Bat-seba. Intultuloyna a minatmatan ni Bat-seba ken pinampanunotna nga alaenna kas asawa. Ngem asawa dayta ni Urias. Ania koma ti inaramid ni David?—

Insardeng koman ni David a panunoten ti panangalana ken Bat-seba. Ngem saanna nga  insardeng. Gapuna, innala ni David ni Bat-seba. Kalpasanna, impamuspusanna ti pannakapapatay ni Urias. Apay nga inaramid ni David dagitoy a kinadakes?— Gapu ta intultuloyna a tinarigagayan ti maysa a babai a kukua ti sabali.​—2 Samuel 11:​2-​27.

Iti ania a wagas a mannanakaw ni Absalom?

Gapu ta nagbabawi ni David, pinalubosan ni Jehova nga agbiag. Ngem sipud idin, naglak-am ni David iti adu a riribuk. Tinarigagayan ti anakna a ni Absalom nga agawen ti trono ni David kas ari. Gapuna, no mapan dagiti tattao ken David, arakupen ken agkan ida ni Absalom. Kuna ti Biblia: “Intultuloy nga inagaw ni Absalom ti puso dagiti tattao ti Israel.” Ginuyugoyna dagidiay a tattao nga isu ti pilienda nga agbalin nga ari imbes a ni David.​—2 Samuel 15:​1-​12.

Adda kadin banag a tinarigagayam unay, a kas iti panagtarigagay da Acan, David, ken Absalom?— No sabali ti makinkukua iti dayta, sa alaem nga awan ti pammalubos, panagtakaw dayta. Malagipmo kadi no ania ti tinarigagayan ti immuna a mannanakaw a ni Satanas?— Tinarigagayanna nga isu ti pagdayawan dagiti tattao imbes a ti Dios. Isu a nagtakaw ni Satanas idi sinulisogna da Adan ken Eva nga agtulnog kenkuana.

No adda banag a kukua ti maysa a tao, isu ti rumbeng a mangibaga no siasino ti mangusar iti dayta. Kas pagarigan, mabalin a mapanka makiay-ayam iti balay ti dadduma nga ubbing. Nasayaat ngata no mangalaka iti aniaman a banag sadiay ket iyawidmo?— Saan, malaksid no ibaga ti tatang wenno nanangda a mabalinmo nga alaen. No agyawidka iti aniaman a dimo ipakpakada, panagtakaw dayta.

Apay a masulisogka nga agtakaw?— Gapu ta tarigagayam ti banag a saanmo a kukua. Uray di makita ti sabali a tao nga innalam dayta, siasino ti makakita kenka?— Ni Jehova a Dios. Ket laglagipentayo a kagura ti Dios ti panagtakaw. Isu a ti panagayatmo iti Dios ken iti kaarrubam ti tumulong kenka a di pulos agbalin a mannanakaw.

Nalawag nga ibagbaga ti Biblia a dakes ti agtakaw. Pangngaasim ta basaem ti Marcos 10:17-​19; Roma 13:9; ken Efeso 4:28.