Mapan iti linaonna

Mapan iti listaan dagiti linaonna

 KAPITULO 13

Dagidiay Nagbalin nga Adalan ni Jesus

Dagidiay Nagbalin nga Adalan ni Jesus

Siasino daytoy a lalaki, ken kasano a nagbalin nga adalan ni Jesus?

SIASINO ti kasayaatan nga adipen ti Dios?— Umiso ti sungbatmo, ni Jesu-Kristo. Panagkunam matuladtayo ngata ni Jesus?— Kuna ti Biblia nga adda inaramidna nga ulidan a surotentayo. Ket aw-awisennatayo nga agbalin nga adalanna.

Ammom kadi ti kaipapanan ti agbalin nga adalan ni Jesus?— Adu ti kaipapananna. Umuna, masapul nga agsursurotayo kenkuana. Ngem saan laeng a dayta. Masapul met a talaga a patientayo ti ibagbagana. No mamatitayo kenkuana, tungpalentayo dagiti ipaaramidna kadatayo.

Adu a tattao ti agkuna a mamatida ken Jesus. Panagkunam, talaga kadi nga isuda amin ket adalan ni Jesus?— Kaaduan kadakuada ti saan. Mabalin a makimismisada. Ngem adu kadakuada ti di pulos nagtignay a mangammo iti insuro ni Jesus. Kinapudnona, ti adalan ni Jesus ket dagidiay laeng mangsursurot iti ulidanna.

Pagsaritaanta ti sumagmamano kadagiti adalan ni Jesus idi adda pay laeng ditoy daga. Ni Felipe ti maysa kadagiti immuna a nagbalin nga adalan. Binirok ni Felipe ni Natanael a gayyemna (a naawagan met iti Bartolome), a makitam a nakatugaw iti sirok ti kayo. Idi umasideg ni Natanael ken ni Jesus, kuna ni Jesus: ‘Kitaenyo, adtoy ti mapagtalkan a lalaki, pudno a maysa nga Israelita.’ Nasdaaw ni Natanael ket insaludsodna: ‘Kasano nga am-ammonak?’

Siasino dagiti aw-awisen ni Jesus nga agbalin nga adalanna?

“Sakbay nga inayabannaka ni Felipe, bayat nga addaka iti sirok ti kayo a higos, nakitaka,” kuna ni Jesus. Nasdaaw  ni Natanael gapu ta ammo ni Jesus ti eksakto nga ayanna, isu a kuna ni Natanael: “Sika ti Anak ti Dios, sika ti Ari ti Israel.”​​—Juan 1:49.

Da Judas Iscariote, Judas (a naawagan met iti Tadeo), ken Simon

Adda dadduma a nagbalin nga adalan ni Jesus kasakbayan da Felipe ken Natanael. Dagitoy da Andres ken ni Pedro a manongna kasta met da Juan ken nalabit ni Santiago a manong ni Juan. (Juan 1:​35-​51) Ngem kalpasanna, nagsubli dagitoy nga uppat iti trabahoda a panagkalap. Kalpasanna, maysa nga aldaw bayat a magmagna ni Jesus iti igid ti Baybay ti Galilea, nakitana nga ibabbaba da Pedro ken Andres dagiti iketda a pagkalap iti baybay. Inayaban ida ni Jesus: “Surotendak.”

Da Santiago (nga anak ni Alfeo), Tomas, ken Mateo

Iti saan unay nga adayo, nakita ni Jesus da Santiago ken Juan. Kaduada ni tatangda a nakalugan iti bangka ken mangtartarimaan kadagiti iket a pagkalapda. Inayaban met ida ni Jesus. Ania ngata ti  inaramidmo no sika ti inayaban ni Jesus? Simmurotka ngata koma a dagus kenkuana?— Dagitoy a lallaki am-ammoda ni Jesus. Ammoda nga isu ket imbaon ti Dios. Isu a dagus a pinanawanda ti trabahoda a panagkalap ket sinurotda ni Jesus.​​—Mateo 4:​18-​22.

Da Natanael, Felipe, ken Juan

Idi nagbalinen a pasurot ni Jesus dagitoy a lallaki, kayatna kadi a sawen a kankanayon idin nga umiso ti ar-aramidenda?— Saan. Mabalin a malagipmo a nagririkiaran pay ketdi dagitoy a lallaki no siasino ti katan-okan kadakuada. Ngem dimngegda ken Jesus, ket situtulokda a nagbalbaliw. No situtuloktayo nga agbalbaliw, agbalintayo met nga ad-adalan ni Jesus.

Da Santiago (a kabsat ni Juan), Andres, ken Pedro

Inawis ni Jesus ti amin a kita ti tattao tapno agbalin nga ad-adalanna. Iti naminsan, adda nabaknang nga agturay nga immasideg ken Jesus ket dinamagna no kasano a gun-oden ti biag nga agnanayon. Idi imbaga ti nabaknang nga agturay a tungtungpalennan dagiti bilin ti Dios sipud pay kinaubingna, inawis ni Jesus: “Umayka agbalinka a pasurotko.” Ammom kadi ti napasamak?—

Idi naammuan ti lalaki a masapul a panunotenna a napatpateg ti agbalin nga adalan ni Jesus ngem ti agbalin a nabaknang, naladingitan unay. Saan a nagbalin nga adalan ni Jesus gapu ta ad-adda ti panagayatna iti kuartana ngem ti panagayatna iti Dios.​​—Lucas 18:18-​25.

Kalpasan ti agarup makatawen ket kagudua a panangaskasaba ni Jesus, nangpili iti 12 kadagiti adalanna nga agbalin nga apostol. Dagiti apostol ket lallaki nga imbaonna a mangaramid iti naisangsangayan a trabaho. Ammom kadi ti nagnaganda?— Kitaenta man no maam-ammota ida. Kitaem dagiti ladawanda ditoy, ket padasem nga ibaga ti naganda. Kalpasanna padasem nga ikabesa dagiti naganda.

Siasino dagitoy a babbai a timmulong ken Jesus bayat a nangaskasaba?

Idi agangay, dimmakes ti maysa kadagiti 12 nga apostol. Judas Iscariote ti naganna. Kalpasanna, adda sabali nga adalan a napili nga agbalin nga apostol. Ammom kadi ti naganna?— Ni Matias. Di nagbayag,  nagbalin met nga apostol da Pablo ken Bernabe, ngem saanda a karaman kadagiti 12.​​—Aramid 1:​23-​26; 14:14.

Kas naammuanta iti Kapitulo 1 daytoy a libro, impakita ni Jesus ti interes kadagiti ubbing. Apay nga inaramidna dayta?— Gapu ta ammona a posible nga agbalinda met nga ad-adalanna. Kinapudnona, masansan a makaisao dagiti ubbing iti bambanag a pakagutugotan pay ketdi dagiti nataengan tapno agimdeng ken agsursuroda iti ad-adu pay maipapan iti Naindaklan a Mannursuro.

Adu met ti babbai a nagbalin nga adalan ni Jesus. Dadduma ti kimmuyog kenkuana bayat a nangaskasaba iti nagduduma a siudad. Karaman kadagita da Maria  Magdalena, Juana, ken Susana. Mabalin a timmulongda met a mangisagana iti taraonna ken mangilaba kadagiti kawesna.​​—Lucas 8:​1-3.

Kayatmo kadi ti agbalin nga adalan ni Jesus?— Laglagipem a saan nga umdas a basta ibagatayo a maysatayo kadagiti adalanna. Masapul nga agtignaytayo a kas maysa kadagiti adalanna uray sadino ti ayantayo, saan laeng a no mapantayo makigimong. Adda kadi mapanunotmo a dadduma pay a lugar a sadiay nasken nga agtignaytayo a kas adalan ni Jesus?—

Kinapudnona, masapul nga aramidentayo ti kasta idiay pagtaengan. Ngem kasta met koma idiay eskuelaan. Dita koma pulos liplipatan a no kayattayo ti agbalin a pudno nga adalan ni Jesus, masapul a kanayon nga agtignaytayo a kas ken Jesus, iti inaldaw, ken sadinoman ti ayantayo.

Sadino ti nasken a pangipakitaantayo nga adalannatayo ni Jesus?

Ita, basaenta ti kuna ti Biblia maipapan kadagiti adalan ni Jesus, iti Mateo 28:​19, 20; Lucas 6:​13-​16; Juan 8:​31, 32; ken 1 Pedro 2:21.