Mapan iti linaonna

Mapan iti listaan dagiti linaonna

 KAPITULO 1

No Apay a Naindaklan a Mannursuro ni Jesus

No Apay a Naindaklan a Mannursuro ni Jesus

NASUROK a dua ribu a tawenen ti napalabas, naipasngay ti maysa a naisangsangayan unay nga ubing a nagbalin a katan-okan a tao a nagbiag. Awan pay idi dagiti eroplano wenno lugan. Awan pay ti telebision, kompiuter, ken Internet.

Jesus ti nagan ti ubing. Isu ti kasisiriban a tao a nagbiag ditoy daga. Ni Jesus met ti kalaingan a mannursuro. Nalaka a maawatan ti panangilawlawagna kadagiti narikut a banag.

Sinursuruan ni Jesus dagiti tattao iti sadinoman a pakasarakanna kadakuada. Nangisursuro iti igid ti baybay ken kadagiti bangka. Nangisursuro kadagiti pagtaengan ken bayat nga agdaldaliasat. Awan kotse ni Jesus, ken awan met idi ti paglugananna a bus wenno tren. Magmagna idi ni Jesus iti nadumaduma a lugar tapno mangisuro kadagiti tattao.

Adu ti masursurotayo iti dadduma a tattao. Ngem ni Jesus ti pakasursuruantayo kadagiti kapapatgan a banag gapu ta isu ti Naindaklan a Mannursuro. Iti Biblia ti pakasarakan kadagiti sasao ni Jesus. No mangngegtayo dagita a sasao manipud iti Biblia, kas man la makisarsarita ni Jesus kadatayo.

Apay a Naindaklan a Mannursuro ni Jesus? Ti maysa a makagapu, nasursuruan ngamin ni Jesus. Ket ammona no kasano kapateg ti agimdeng. Ngem siasino ti inimdengan ni Jesus? Siasino ti nangisuro kenkuana?— Ni Amana. Ti Dios ti Ama ni Jesus.

Agnanaed idi ni Jesus idiay langit a kadua ti Dios sakbay nga immay ditoy daga kas tao. No kasta, naidumduma a tao ni Jesus gapu ta awan sabali a tao a nagbiag idiay langit sakbay a nayanak ditoy daga. Idi adda  ni Jesus idiay langit, isu ket natulnog nga Anak ken nagimdeng ken Amana. Dayta ti gapuna a kabaelan idi ni Jesus nga isuro kadagiti tattao ti nasursurona iti Dios. No agimdengka kada tatang ken nanangmo, matuladmo ni Jesus.

Ti maysa pay a makagapu no apay a Naindaklan a Mannursuro ni Jesus ket inayatna dagiti tattao. Kayatna a tulongan dagiti tattao a makasursuro maipapan iti Dios. Ay-ayaten ni Jesus dagiti nataengan, ngem ay-ayatenna met dagiti ubbing. Magustuan idi dagiti ubbing ti mapan ken Jesus gapu ta kasarsarita ken im-imdenganna ida.

Apay a nagustuan dagiti ubbing ti makikadua ken Jesus?

Maysa nga aldaw, adda sumagmamano a nagannak a nangipan kadagiti annakda ken Jesus. Ngem impagarup dagiti gagayyemna a di masango ni Jesus a kasarita dagiti babassit nga ubbing. Isu a pinapanaw ida dagiti gagayyem ni Jesus. Ngem ania ti imbaga ni Jesus?— Kinunana: “Bay-anyo dagiti ubbing nga umay kaniak; dikay padasen a pawilan ida.” Wen, kayat ni Jesus nga umasideg kenkuana dagiti ubbing. Isu nga uray nakasirsirib ken natan-ok a tao ni Jesus, adda panawenna a nangisuro kadagiti babassit nga ubbing.​—Marcos 10:​13, 14.

 Ammom kadi no apay nga insuro ni Jesus dagiti ubbing ken nagimdeng kadakuada? Kayatna ngamin a paragsaken ida babaen ti panangisurona kadakuada maipapan iti Dios, ti nailangitan nga Amana. Kasanom a maparagsak dagiti tattao?— Babaen ti panangibagam kadakuada kadagiti nasursurom maipapan iti Dios.

Iti naminsan, inusar ni Jesus ti bassit nga ubing tapno isurona kadagiti gagayyemna ti maysa a napateg a leksion. Innalana ti ubing ket pinagtakderna iti tengnga dagiti adalanna. Kalpasanna, kinuna ni Jesus a masapul nga agbalbaliw dagitoy a nataenganen a lallaki ken tuladenda daytoy nga ubing.

Ania ti masursuro dagiti dadakkelen nga ubbing ken natataengan manipud iti bassit nga ubing?

Ania ti kayat a sawen ni Jesus? Ammom kadi no kasano nga agbalin koma a kas iti bassit nga ubing ti maysa a nataenganen, wenno uray ti dakkel metten nga ubing?— Kastoy. Ti bassit nga ubing basbassit ti ammona ngem iti nataengan ket kayatna ti agsursuro. No kasta, ibagbaga ni Jesus a masapul a napakumbaba dagiti adalanna, a kas kadagiti babassit nga ubbing. Wen, adu ti maadaltayo kadagiti dadduma a tattao. Ket rumbeng a mabigbigtayo a napatpateg dagiti pannursuro ni Jesus ngem dagiti bukodtayo a kapanunotan.​—Mateo 18:1-5.

Ti sabali pay a makagapu no apay a Naindaklan a Mannursuro ni Jesus ket ammona a pagbalinen dagiti bambanag a makapainteres kadagiti tattao. No adda ilawlawagna, nalaka a maawatan ken nalawag. Dinakamatna dagiti tumatayab ken sabsabong ken dadduma pay a gagangay a bambanag tapno nalaklaka a maawatan dagiti tattao ti maipapan iti Dios.

 Maysa nga aldaw, bayat nga adda ni Jesus iti bakras ti bantay, inaribungbongan ti adu a tattao. Nagtugaw ni Jesus ken nagpalawag kadakuada, kas makitam ditoy. Maawagan daytoy a palawag iti Sermon idiay Bantay. Kinunana: ‘Kitaenyo dagiti tumatayab iti tangatang. Dida agmula iti bin-i. Dida agurnong iti makan kadagiti kamalig. Ngem pakanen ida ti Dios nga adda idiay langit. Saan kadi a napatpategkayo ngem kadagiti tumatayab?’

Ania a leksion ti isursuro ni Jesus idi dinakamatna ti maipapan kadagiti tumatayab ken sabsabong?

Kinuna pay ni Jesus: ‘Agsursurokayo kadagiti lirio iti talon. Dumakkelda a dida agtrabaho. Ket kitaenyo ti kinapintasda! Uray ni nabaknang nga Ari Solomon saan a nakawesan iti napimpintas ngem kadagiti lirio iti talon. Gapuna, no aywanan ti Dios dagita a sabsabong, dinakayo met ngata aywanan?’​—Mateo 6:25-33.

Matarusam kadi ti leksion nga isursuro ni Jesus?— Dina kayat nga agdanagtayo no sadino ti pangalaantayo iti kanen wenno pagkawestayo. Ammo ti Dios a kasapulantayo amin dagita. Saan nga imbaga ni Jesus a  saantayon nga agtrabaho nga agbirok iti kanen wenno pagkawes. Ngem kinunana nga iyun-unatayo koma ti Dios. No aramidentayo dayta, ipasigurado ti Dios nga addanto kanen ken pagkawestayo. Patiem kadi dayta?—

Idi nalpasen ti palawag ni Jesus, ania ti pinanunot dagiti tattao?— Kuna ti Biblia a nasdaawda iti wagas ti panangisurona. Makapainteres unay ti agimdeng kenkuana. Babaen iti pannursurona, natulonganna dagiti tattao nga agaramid iti umiso.​—Mateo 7:28.

 No kasta, nakapatpateg nga agsursurotayo ken Jesus. Ammom kadi no kasanotayo a maaramid dayta?— Dagiti imbagana ket naisuraten iti maysa a libro. Ammom kadi no ania dayta a libro?— Ti Nasantuan a Biblia. Kaipapananna a makapagimdengtayo ken Jesus no ipangagtayo dagiti mabasatayo iti Biblia. Kinapudnona, adda makaparagsak nga estoria ti Biblia no kasano nga imbilin ti Dios nga agimdengtayo ken Jesus. Kitaentayo no ania ti napasamak.

Maysa nga aldaw, inkuyog ni Jesus ti tallo kadagiti gagayyemna iti maysa a bantay. Santiago, Juan, ken Pedro ti naganda. Adunto pay ti maammuantayo maipapan kadagitoy a lallaki, gapu ta nasinged a gagayyem ni Jesus dagita a tallo. Ngem iti daytoy naisangsangayan a pasamak, nagraniag ti rupa ni Jesus. Ket ti kawesna rimmaniag a kas iti lawag, kas makitam ditoy.

“Daytoy ti Anakko . . . Agimdengkayo kenkuana”

Kalpasanna, adda timek manipud langit a nangngeg ni Jesus ken dagiti gagayyemna. Kinunana: “Daytoy ti Anakko, ti dungdungnguen, nga inanamongak; agimdengkayo kenkuana.” (Mateo 17:1-5) Ammom kadi no siasino ti makintimek iti dayta?— Timek ti Dios! Wen, ti Dios ti nangibaga a masapul nga agimdengda iti Anakna.

Datayo met ngay itatta? Agtulnogtayo kadi iti Dios ken agimdengtayo iti Anakna, ti Naindaklan a Mannursuro?— Dayta ti masapul nga aramidentayo amin. Malagipmo kadi no kasanotayo a maaramid dayta?—

Wen, makapagimdengtayo iti Anak ti Dios babaen ti panangbasa kadagiti salaysay ti Biblia maipapan iti biag ni Jesus. Adu ti nakaskasdaaw a banag a maibaga kadatayo ti Naindaklan a Mannursuro. Maragsakankanto a mangammo kadagitoy a banag a naisurat iti Biblia. Ken naragsakkanto met no ibagam kadagiti gagayyemmo dagiti naimbag a banag a masursurom.

Tapno ad-adu pay ti maammuam a nasayaat a kapanunotan maipapan kadagiti naimbag a banag nga ibunga ti panagimdeng ken Jesus, luktam ti Bibliam ket basaem ti Juan 3:16; 8:28-30; ken Aramid 4:12.