Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agsublika ken Jehova

Surat ti Bagi a Manarawidwid

Surat ti Bagi a Manarawidwid

Patgenmi a kabsat:

Kas pagaammomon, naglaon ti Biblia iti adu a salaysay maipapan kadagiti tattao. Adu kadakuada a matalek a lallaki ken babbai ti naaddaan kadagiti problema a kas kadagiti mapaspasarantayo ita. Addaanda iti “rikna a kas kadatayo.” (Santiago 5:17) Naupay ti dadduma kadakuada gapu kadagiti problema ken pakadanagan. Adda dagiti nasaktan unay gapu kadagiti kapamilia wenno kapammatianda. Makonkonsiensia met ti dadduma gapu kadagiti naaramidda a basol.

Ngem talaga kadi a pinanawandan ni Jehova? Saan. Adu kadakuada ti nangikararag iti kas iti inkararag ti salmista: “Nagallaallaak a kasla karnero a napukaw. O sapulem ti adipenmo, ta saanko a linipatan dagiti bukodmo a bilin.” (Salmo 119:176) Kasta met kadi ti riknam?

Saan a pulos a lipaten ni Jehova dagiti agdaydayaw kenkuana a nayaw-awan. Tultulonganna ketdi ida—masansan a babaen kadagiti kapammatianda. Kas pagarigan, usigem no kasano a tinulongan ni Jehova ti adipenna a ni Job idi nakapasar iti nadumaduma a pakarigatan a kas iti pannakapukaw dagiti sanikuana, ipupusay dagiti ay-ayatenna, ken naaddaan iti nakaro a sakit. Inibturanna pay dagiti nasakit a sasao dagiti tattao a mangliwliwa koma kenkuana. Ngem saanna a tinallikudan ni Jehova uray no adda idi gundaway a saan nga umiso ti panangmatmatna iti situasionna. (Job 1:22; 2:10) Kasano a tinulongan ni Jehova ni Job tapno maaddaan iti umiso a panangmatmat?

Ti maysa a pamay-an ket babaen ti panangusarna ken Eliu a kapammatian ni Job. Idi impeksa ni Job ti riknana, dimngeg ni Eliu ken natignay nga agsao. Ania ngata ti ibagana? Babalawenna ngata, konsiensiaen wenno pabainanna tapno laeng ilinteg ni Job ti kapanunotanna? Imbilang kadi ni Eliu nga isu ket nangatngato ngem ni Job? Saan a pulos! Iti panangtignay ti espiritu ti Dios, kinuna ni Eliu: “Iti pudno a Dios kaslaak met laeng kenka; manipud iti pila nasukogak, siak met.” Sa impasiguradona ken Job: “Ti kinamakaaliaw iti biangko saanto a mamagkullayaw kenka, ket awan ti panangpilitko a nadagsento kenka.” (Job 33:6, 7) Imbes a nayonan ni Eliu dagiti pakadagsenanna, siaayat a nangipaay iti balakad ken pammaregta a kasapulan ni Job.

Kayatmi a maammuam nga idi insaganami daytoy a broshur, kasta met laeng ti inaramidmi. Dimngegkami nga immuna ken inad-adalmi a naimbag dagiti kasasaad ken karirikna ti dadduma kadagiti immadayo iti kongregasion. (Proverbio 18:13) Kalpasanna, nainkararagan nga inadalmi dagiti salaysay iti Kasuratan maipapan iti panangtulong ni Jehova kadagiti adipenna a naipasango kadagiti isu met la a kasasaad. Kamaudiananna, inusarmi dagiti salaysay iti Kasuratan ken dagiti kapadasan ti kakabsat ita tapno maaramid daytoy a broshur. Naimpusuan nga awisendaka a mangadal iti daytoy a publikasion. Ay-ayatendaka unay.

Bagi a Manarawidwid Dagiti Saksi ni Jehova