Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Agsublika ken Jehova

 PASET 4

Pannakakonsiensia—‘Dalusannak iti Basolko’

Pannakakonsiensia—‘Dalusannak iti Basolko’

“Simmayaat ti panagbiag ti pamiliami gapu iti baro a trabahok, ngem nangrugi metten a makiramanak kadagiti aktibidad a di maitutop kadagiti Kristiano, kas koma kadagiti selebrasion iti lubong ken napolitikaan nga aktibidad. Immatenderak payen iti sabali a relihion. Nagbalinak a di aktibo iti 40 a tawen. Bayat a bumaybayag, ad-adda met a nariknak a dinakon mapakawan ni Jehova. Diak mapakawan ti bagik. Ngamin, ammok la ngaruden a dakes dagita ngem inaramidko latta.”—Martha.

KAS iti nagdagsen nga awit, ti pannakakonsiensia pakapsutennaka. “Dagiti bukodko a biddut limmasatda iti ngatuen ti ulok,” insurat ni Ari David. “Kas iti maysa a nadagsen nga awit nadagsenda unay maipaay kaniak.” (Salmo 38:4) Nalapunos iti liday ti dadduma a Kristiano ta ipapanda a saan idan a mapakawan ni Jehova. (2 Corinto 2:7) Ngem talaga kadi a kasta? No nakaaramidka iti nadagsen a basol, kayatna kadi a sawen nga inlaksidnakan ni Jehova ket saannakan a mapakawan? Mapakawannaka latta!

“Ilintegtayo Koma ti Bambanag iti Nagbabaetantayo”

Saan a baybay-an ni Jehova dagiti agbabbabawi. Kinapudnona, kayatna ida a tulongan! Iti ilustrasionna maipapan iti bayanggudaw nga anak, inyarig ni Jesus ni Jehova iti naayat nga ama nga addaan iti anak a pimmanaw iti poderna. Nagbalin nga immoral ti biag ti anakna. Idi agangay, nakapagpampanunot ket nagawid. Adayo pay laeng, “nakita ni amana ket simnek ti asina, ket timmaray ket inapungolna ti tengngedna ken inagkanna a sidudungngo.” (Lucas 15:11-20) Kayatmo kadi ti umasideg ken Jehova ngem iti panagriknam ket ‘nakaad-adayoka’ kenkuana? Kas iti ama iti ilustrasion ni Jesus, maasian ni Jehova kenka ken ipatpategnaka. Padpadaananna ti panagsublim.

Ngem kasanon no iti panagriknam ket saannakan a mapakawan ni Jehova gapu ta nadagsen wenno adu unay ti basolmo? Panunotem ti awis kenka ni Jehova a nailanad iti Isaias 1:18: “‘Umaykayo, ita, ket ilintegtayo koma ti bambanag iti nagbabaetantayo,’ kuna ni Jehova. ‘Uray no ti basbasolyo kasla koma eskarlata, mapapudawdanto a kasla niebe.’” Wen, uray pay no dagiti basol ket kas iti eskarlata wenno nakalablabaga a mantsa iti puraw a bado, mapakawan latta dagita ni Jehova.

Saan a kayat ni Jehova nga agtultuloyka a maparigatan gapu iti pannakakonsiensiam. Ania ngarud ti aramidem tapno pakawanennaka ti Dios ken maaddaanka iti nadalus a konsiensia, iti kasta lumag-an ti riknam? Usigem ti dua a banag nga inaramid ni Ari David. Umuna, kinunana: “Ipudnokto dagiti salungasingko ken Jehova.” (Salmo 32:5) Laglagipem nga inawisnakan ni Jehova nga umasideg kenkuana babaen ti kararag ken ‘ilintegyo ti bambanag iti nagbaetanyo.’ Patgam koma dayta nga awis. Ipudnom dagiti basolmo ken Jehova, ken iyebkasmo kenkuana ti linaon ti pusom. Gapu iti kapadasan ni David, sikokompiansa nga inkararagna: “Dalusannak uray pay iti basolko. . . . Ti puso a nadunor ken naidagel, O Dios, saanmonto nga umsien.”—Salmo 51:2, 17.

Maikadua, inawat ni David ti tulong ti Dios babaen ti dinutokanna a pannakabagi a ni propeta  Natan. (2 Samuel 12:13) Nangipaay met ni Jehova ita kadagiti panglakayen iti kongregasion a nasanay tapno tumulong kadagiti agbabbabawi a mangisubli iti relasionda ken Jehova. No makisaritaka kadagiti panglakayen, usarenda ti Biblia ken naimpusuan nga ikararagandaka tapno mabang-aranka, maksayan wenno mapukaw dagiti negatibo a riknam, ken matulonganka nga umimbag iti naespirituan.—Santiago 5:14-16.

Kayat ni Jehova a mariknam ti bang-ar nga itden ti nadalus a konsiensia

Naragsak ti Tao a Napakawan ti Basolna

Mabalin a mariknam a nagrigat nga ipudno ti basolmo ken Jehova a Dios ken makisarita kadagiti panglakayen. Kasta met laeng ti narikna ni David. ‘Nagulimek’ maipapan iti basolna. (Salmo 32:3) Ngem idi agangay, nakitana ti pagsayaatan ti panangipudno ken panangilintegna iti basolna.

Ti kangrunaan a nagunggona ni David ket ti pannakaisubli ti rag-ona. Insuratna: “Naragsak daydiay a ti iyaalsana mapakawan, a ti basolna maabbongan.” (Salmo 32:1) Inkararagna pay: “O Jehova, luktam koma dagitoy bibigko, tapno ti bukodko a ngiwat isaritana koma ti pannakaidaydayawmo.” (Salmo 51:15) Nadalusen ti konsiensia ni David ken agyamyaman ta pinakawanen ti Dios. Gapuna, natignay a mangisarita iti sabsabali iti maipapan ken Jehova.

Kayat ni Jehova a mariknam ti bang-ar nga itden ti nadalus a konsiensia. Kayatna met a naragsakka a mangisarsarita iti sabsabali iti maipapan kenkuana ken kadagiti panggepna a saan a mapilpilit wenno makonkonsiensia. (Salmo 65:1-4) Laglagipem ti awisna kenka. Kayatna a ‘mapunas dagiti basolmo, iti kasta dagiti panawen ti pannakabang-ar umayda manipud iti persona ni Jehova.’—Aramid 3:19.

Kasta ti kapadasan ni Martha. Insalaysayna: “Kanayon a patpatulodannak ti anakko iti Pagwanawanan ken Agriingkayo! Ket in-inut a nakasubliak ken Jehova. Ti panagdawatko iti pammakawan iti amin a nagbasolak ti karigatan nga inaramidko tapno makasubliak. Ngem idi agangay, nagkararagak iti Dios ket dimmawatak iti pammakawan. Kasla diak patien a limmabas pay ti 40 a tawen sakbay a nakasubliak ken Jehova. Paneknekan ti kapadasak nga uray adun a tawen nga immadayo ti maysa, adda latta gundawayna nga agserbi manen iti Dios ken agsubli iti ayatna.”

Ammuem ti Ad-adu Pay

Kasanoka a Magunggonaan iti Kinamanangpakawan ni Jehova?

Makasursurotayo iti pannakilangen ni Jehova kadagiti managbasol idi un-unana a sidadaan a mamakawan.

Dios a “Sisasagana a Mamakawan”

No malagip ti Dios ti amin a bambanag, kasano a mamakawan ken manglipat?