Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agsublika ken Jehova

 PASET 3

Nasaktan a Rikna—No Adda ‘Pakaigapuan ti Reklamotayo’

Nasaktan a Rikna—No Adda ‘Pakaigapuan ti Reklamotayo’

“Pinabasolnak ti maysa a kakongregasionko a sister a tinakawko ti kuartana. Naammuan dayta dagiti kakabsat, ket namati kenkuana ti dadduma. Idi agangay, imbagana kaniak nga adda nadamagna isu a napaneknekanna nga inosenteak. Nupay nagpadispensar, kasla saankonto latta a mapakawan gapu iti napasarak.”—Linda.

NAPADASAM kadin ti kas iti napasamak ken Linda, a nasaktan unay gapu iti inaramid ti maysa a kabsat? Makapaladingit ta ti dadduma a nakapadas iti kasta ket uray la naapektaran ti naespirituan nga aktibidadda. Kasta met kadi ti kasasaadmo?

Adda Kadi ‘Makaisina Kadatayo iti Ayat ti Dios’?

Mabalin a narigat ti mangpakawan no maysa a kabsat ti nangpasakit kadatayo. Namnamaentayo ngamin nga agiinnayat koma dagiti Kristiano. (Juan 13:34, 35) No adda di umiso nga inaramid kadatayo ti maysa a kabsat, mabalin a masaktan ken maupaytayo unay.—Salmo 55:12.

Ibaga ti Biblia a no dadduma, adda met ‘pakaigapuan ti reklamo’ dagiti Kristiano iti tunggal maysa. (Colosas 3:13) Ngem mabalin a marigatantayo no datayon ti maipasango iti kasta a situasion. Adda kadi makatulong kadatayo? Usigem ti tallo a prinsipio ti Biblia:

Ti nailangitan nga Amatayo ammona ti amin. Makitkita ni Jehova ti amin a mapaspasamak, agraman ti panagrigattayo gapu iti kinaawan hustisia. (Hebreo 4:13) Maysa pay, marikna ni Jehova ti pannakaparigattayo. (Isaias 63:9) Dina pulos ipalubos nga adda mangisina kadatayo iti ayatna. Dayta man ket “rigat wenno pannakatuok” wenno dadduma pay—uray ti maysa nga adipenna. (Roma 8:35, 38, 39) Ditay met koma ngarud ipalubos nga adda aniaman wenno asinoman a mangyadayo kadatayo ken Jehova.

Ti panangpakawan ket saan a panangpanuynoy. No pakawanentayo dagiti nakabasol kadatayo, dina kayat a sawen a tagtagilag-anen, ikalkalintegan, wenno pampanuynoyantayo dagiti inaramidda. Laglagipem a di pulos anamongan ni Jehova ti basol, ngem mangpakawan no adda pangibatayanna. (Salmo 103:12, 13; Habakuk 1:13) No iparegta ni Jehova a pakawanentayo ti sabsabali, kidkiddawenna a tuladentayo isuna. Saan nga “agtultuloy a maluksaw [ni Jehova] agingga iti tiempo a di nakedngan.”—Salmo 103:9; Mateo 6:14.

Pagimbagantayo no saantayo nga agipempen iti sakit ti nakem. Kasano? Panunotem daytoy: Pimmidutka iti bassit a bato sa pinetpetam a nakaunnat ti takiagmo. No apagbiit laeng a petpetam, nalabit dika marigatan. Ngem kasano no ibaybayagmo? Kabaelam ngata a petpetan iti sumagmamano a minuto? maysa nga oras? wenno napapaut pay? Sigurado a maktanganka! Siempre, saan a dimmagsen ti bato. Ngem bayat a bumaybayag nga iggemmo dayta, mariknam a kasla dumagdagsen. Kasta met laeng ti sakit ti nakem.  No baybay-antayo a pumaut ti guratayo—uray bassit laeng—ad-adda a masaktantayo. Gapuna, parparegtaennatayo ni Jehova a saan nga agipempen iti sakit ti nakem. Talaga a pagsayaatantayo dayta.—Proverbio 11:17.

Pagimbagantayo no saantayo nga agipempen iti sakit ti nakem

“Kasla ni Jehova ti Makisarsarita Kaniak”

Ania ti nakatulong ken Linda a saan nga agipempen iti sakit ti nakem iti kabsat a nangpasakit kenkuana? Ti maysa a nakatulong ket ti panangpampanunotna a naimbag kadagiti Nainkasuratan a rason no apay a mangpakawan. (Salmo 130:3, 4) Ad-adda a natignay ni Linda a mangpakawan gapu ta ammona a no mangpakawantayo, pakawanennatayo met ni Jehova. (Efeso 4:32–5:2) Gapu iti panangpampanunotna kadagita a teksto, naikunana: “Kasla ni Jehova ti makisarsarita kaniak.”

Idi agangay, saanen a nasakit ti nakem ni Linda. Pinakawanna ti kabsat ket nagbalinda a nasinged nga aggayyem. Intultuloy ni Linda ti agserbi ken Jehova. Masiguradom a kayatnaka met a tulongan ni Jehova a mangaramid iti kasta.