Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Agsublika ken Jehova

 PASET 1

“Daydiay Napukaw Birokekto”

“Daydiay Napukaw Birokekto”

Madandanagan ti karnero. Bayat nga agar-arab iti karuotan, nayadayo kadagiti kakaduana agingga a saannan a makita ida ken uray ti pastor. Sumipngeten. Napukaw ti awan gawgawayna a karnero ket nakadanon iti lugar a pagdakdakiwasan dagiti narungsot nga animal. Idi kuan, adda nangngegna a pamiliar a timek. Timek dayta ti pastor nga agtartaray nga umasideg iti karnero. Sinakruy ti pastor ti karnero sana inyawid.

MAULIT-ULIT nga inyarig ni Jehova ti bagina iti kasta a pastor. Kas mabasatayo iti Biblia, impanamnamana kadatayo: “Siak . . . birokekto dagiti karnerok ken aywanak ida.”—Ezequiel 34:11, 12.

Dagiti Karnero nga Ipatpateg ni Jehova

Siasino dagiti karnero ni Jehova? Dagiti tattao a mangay-ayat ken agdaydayaw kenkuana. Kuna ti Biblia: “Agdayaw ken agruknoytayo; agparintumengtayo iti sanguanan ni Jehova a Nangaramid kadatayo. Ta isu ti Diostayo, ket datayo dagiti umili iti pagpaarabanna ken dagiti karnero ti imana.” (Salmo 95:6, 7) Kas iti literal a karnero nga agtultulnog iti pastorna, magagaran dagiti adipen ni Jehova nga agtulnog iti Pastorda. Awan kadi ti pagkamalianda? Adda. No dadduma mayarig dagiti adipen ti Dios kadagiti karnero a ‘naiwarawara,’ “napukaw,” ken “maiwawwawa.” (Ezequiel 34:12; Mateo 15:24; 1 Pedro 2:25)  Ngem uray no umadayo ti maysa, mangnamnama latta ni Jehova a makasublinto.

Mariknam kadi pay laeng a ni Jehova ti Pastormo? Kasano nga ipakpakita ita ni Jehova nga isu ket maysa a Pastor? Usigem ti tallo a pamay-an:

Ipapaayannatayo iti naespirituan a taraon. “Iti nasayaat a pagaraban pakanekto ida,” kuna ni Jehova. “Sadiay agiddadanto iti nasayaat a disso a pagyanan, ket iti nataba a pagaraban mangandanto.” (Ezequiel 34:14) Saan pay a pulos naglangan ni Jehova a mangipaay iti makapabileg ken nagduduma a naintiempuan a naespirituan a taraon. Adda kadi malagipmo nga artikulo, palawag, wenno video a sungbat ti kararagmo? Saan kadi a pammaneknek dayta a talaga nga ipatpategnaka ni Jehova?

Salsalakniban ken tultulongannatayo. Inkari ni Jehova: “Daydiay naiwara isublikto, ket daydiay nadunor patapatakto ket daydiay masaksakit papigsaekto.” (Ezequiel 34:16) Papigsaen ni Jehova dagidiay kasla saandan a kabaelan nga ibturan ti adu a problema. No nasaktan ti karnerona—nalabit gapu iti maysa a kabsat—patapatan wenno bedbedanna, kayatna a sawen tulonganna a mangiliwliwag iti dayta. Isublina met dagidiay nayaw-awan ken mabalin a maparparigatan gapu iti negatibo a rikna.

Ipatpategnatayo. “Ispalekto ida manipud kadagiti amin a lugar a nakaiwarawaraanda,” kuna ni Jehova. “Daydiay napukaw birokekto.” (Ezequiel 34:12, 16) Para ken Jehova, adda latta namnama ti napukaw a karnero. Ammona no adda mapukpukaw ket birokenna dayta. Maragsakan unay no mabirokanna ti karnero. (Mateo 18:12-14) Kinapudnona, ibilangna dagiti pudno nga agdaydayaw kenkuana kas ipatpategna a karnero. (Ezequiel 34:31) Maysaka kadagita a karnero.

Para ken Jehova, adda latta namnama ti napukaw a karnero. Maragsakan unay no mabirokanna dayta a karnero

Isublim Dagiti “Al-aldaw kas Idi Nabayagen a Tiempo”

Apay a birbiroken ken aw-awisennaka ni Jehova nga agsubli kenkuana? Kayatna ngamin nga agbalinka a naragsak. Inkarina nga arigna “addanto dagiti agbuyat a tudo ti bendision” kadagiti karnerona. (Ezequiel 34:26) Sigurado a tungpalenna dayta! Napaneknekamon dayta.

Lagipem dagiti kapadasam idi naam-ammom ni Jehova. Kas pagarigan, ania ti nariknam idi naammuam ti nagan ti Dios ken ti panggepna para kadagiti tattao? Malagipmo kadi no kasano karagsak ti makikadua kadagiti padam a Kristiano iti asamblea ken kombension? Idi adda nakasabaam nga interesado, saan kadi a nakaragragsakka a nagawid?

Mabalin a mariknam manen ti kasta a ragsak. “Isublinakami kenka, O Jehova,” inkararag dagiti nagkauna nga adipen ti Dios, “ket sidadaankamto nga agsubli. Iyegannakami iti baro nga al-aldaw kas idi nabayagen a tiempo.” (Un-unnoy 5:21) Sinungbatan ni Jehova dayta a kararag, ket nagsubli dagiti adipenna tapno agserbida kenkuana nga addaan iti napabaro a ragsak. (Nehemias 8:17) Kasta met laeng ti aramiden ni Jehova kenka.

Nupay kasta, saan a kaskarina ti agsubli ken Jehova. Usigem ti dadduma a karit iti panagsubli ken no kasano a mapagballigiam dagita.