Mapan iti linaonna

Mapan iti listaan dagiti linaonna

Macao

 SANGALUBONGAN A PANANGASABA KEN PANANGISURO

Asia ken ti Middle East

Asia ken ti Middle East
  • PAGILIAN 49

  • POPULASION 4,464,374,770

  • AGIBUMBUNANNAG 728,989

  • PANANGYADAL ITI BIBLIA 771,272

Maysa ti Nakasarita, Adu ti Natulongan

Iti Pilipinas, ur-urayen ni Jonathan ti maysa a doktor. Nadlaw ti receptionist a desente ti bado ni Jonathan isu a dinamagna no maysa isuna nga ahente ti insurance. Imbaga ni Jonathan nga isu ket maysa a Saksi ni Jehova ken adda Saksi a kinaduaanna nga agpaagas. Nagbilib ti receptionist a ni Laila ket imbagana  ken Jonathan a regular idi nga agbasbasa iti Pagwanawanan ti tatangna a nabiit pay a natay. Imbasa ni Jonathan ti Juan 5:28, 29 sa inikkanna iti tract nga Aniat’ Namnama Kadagiti Ing-ingungoten a Natayen?

Pilipinas: Kinasabaan ni Jonathan ti receptionist

Kadagiti simmaruno nga ipapan ni Jonathan iti ospital, inikkanna ni Laila iti ad-adu pay a publikasion ken inyam-ammona iti maysa a sister a mangyadal kenkuana. Di nagbayag, nakikadua metten iti panagadal ti amin  a kabbalayna—ti asawana, ti adingna a babai, ken ni nanangna.

Immasideg ken Laila ti kaarrubana a ni Rose ket dinamagna no apay a nagadu ti mapmapan iti apartmentna. Imbaga ni Laila a makipagad-adal isuna iti Biblia kadagiti Saksi ni Jehova. Kas resultana, nakipagadal met ni Rose, ket idi binisitana ti adingna a ni Abigail iti probinsia, naragsakan a nangyestoria iti maad-adalna. Naginteres ti adingna isu a nagpayadal iti Biblia. Nakipagadal met ti nanang ni Rose.

Nabautisaran ni Laila iti nabiit pay a rehional a kombension. Nabautisaran metten ni nanangna. Idi napan a tawen, nabautisaran ni Rose ken ti adingna. Regular metten a makigimgimong ti nanang ni Rose. Ken agtultuloy a makipagad-adal ti dadduma a kapamilia ni Laila. Resulta amin dagita ti maysa a pannakisarita iti ospital!

Panangusar iti Teknolohia a Mangdanon Kadagiti Umel

Rumangrang-ayen ti teritoria ti sign language idiay Sri Lanka. Idi 2015, awan pay 80 ti bilang ti adres dagiti umel a nairekord dagiti Saksi, ken naisurat laeng dagita kadagiti babassit a papel. Idi agangay, nabukel ti umuna a Sri Lankan Sign Language a kongregasion ken adda naaramid a rekord iti kompiuter a nakaikabilan ti agarup 420 a nagan ken adres nga addaan iti GPS coordinates. Agarup 80 a porsiento kadakuada ti nakontaken dagiti kakabsat, iti man personal, video chat, wenno teks. Imbaga ti maysa nga agassawa a misionero: “Maikkanmi itan iti teritoria dagiti umel nga agibumbunannag. Idi, dagiti laeng am-ammoda nga umel ti kaskasabaanda.”

 Nagyaman ti Maysa nga Opisial ti Gobierno

Naregta a makiramraman iti special metropolitan public witnessing dagiti kakabsat idiay Mongolia uray no umabut iti -30 degrees Celsius ti temperatura. Maysa nga opisial ti gobierno ti nangala kadagiti publikasion iti cart sa nangaramid iti surat ti panagyaman. Insuratna: “Maysaak a Budista. Ngem adun a pammati ti inad-adalko. Mamatiak ngamin a saan laeng a maymaysa a dalan ti masapul a surotentayo, masapul met a padasentayo ti dadduma. Idi nabasak ti dadduma a publikasionyo, napanunotko ti agsurat tapno iyebkasko ti panagyamanko. Ammok nga adu a panawen ken pigsa ti inusaryo tapno makaitedkayo kadagiti praktikal ken makatulong nga impormasion. Nasursurok kadagiti publikasionyo a masapul a basaentayo ti Biblia. Adda iti dayta ti kinapudno. Makatulong ti Biblia iti panagbiagtayo. Kayatko ti agyaman kadagiti nagaget nga agipatpatarus kadagiti publikasionyo iti Mongolian. Agyamanak met kadagidiay mangmangted kadagiti makatulong a publikasion uray nakapudpudot wenno nakalamlamiis ti tiempo.”

Mongolia: Panangasaba iti publiko uray nakalamlamiis ti tiempo

Nasungbatan ti Kararagna

Idiay Hong Kong, inasitgan ti payunir a ni Brett ti maysa a lalaki nga agtawen iti dandani 30 sa inikkanna iti tract nga Ania ti Sekreto ti Naragsak a Pamilia? Nakalua ti lalaki idi nakitana ti tract. Imbagana a dimmakkel isuna iti kinapudno, ngem pimmanaw idiay balayda idi agtawen iti 16 ket lima a tawen a naggigian iti kalsada. Naadikto met iti droga. Idi kuan, nakita isuna ti maysa a charity ket tinulonganda.

Inyestoriana pay a sakbay a kinasarita ti kabsat iti dayta nga agsapa, inkararagna, “No pudno ti relihionko idi  ubingak, pangngaasim, ikkannak iti seniales ita nga aldaw.” Imbagana a nasungbatan ti kararagna. Napanda a dua iti asideg a coffee shop ken pinagsaritaanda ti broshur nga Agsublika ken Jehova. Gapu ta agsublin ti lalaki idiay France iti karabiyanna, pinagsaritaanda no kasanoda a makontak ti maysa ken maysa. Idi agangay, nagsurat ti lalaki ken ni Brett. Imbagana: “Patgek a kabsat, sinungbatan ni Jehova dagiti kararagko. Mapanakto iti kaasitgan a Kingdom Hall inton Domingo.” Kinontakna dagiti Saksi idiay France ket nangrugi a makipagadal iti Biblia ken makigimong.