Mapan iti linaonna

Mapan iti listaan dagiti linaonna

Kombension dagiti Estudiante ti Biblia idiay Tacoma, Washington, U.S.A.

100 a Tawenen ti Napalabas—1917

100 a Tawenen ti Napalabas—1917

“NANGRUGI ti baro a tawen bayat ti nakaro a panaglalaban, gulo, ken panangibukbok iti dara,” kuna ti Enero 1, 1917 a The Watch Tower. Nagtultuloy latta idiay Europa ti Gubat Sangalubongan I, ti sangalubongan a panagpipinnatay a naawagan idi iti Dakkel a Gubat.

Uray no saan pay idi a naan-anay a maawatan dagiti Estudiante ti Biblia no ania ti ramanen ti panagbalin a neutral dagiti Kristiano, adu ti nangikarigatan a saan a makabasol iti dara. Kas pagarigan, idiay England, determinado ti 19 anyos a ni Stanley Willis nga agtalinaed a neutral. Sakbay a nabista  gapu iti takderna, insuratna: “Ibilangko a dakkel a pribilehio a mapalubosanak a mangipaay iti panangsaksi. Imbaga ti Koronel itay bigat a masapul nga isuotko ti uniporme ti militar, ket no saanko a kayat, mabistaak iti korte militar.”

Saan a nagkompromiso ni Stanley isu a nasentensiaan nga agtrabaho iti nadagsen iti pagbaludan. Ngem nagtalinaed latta a positibo. Kalpasan ti dua a bulan, insuratna: “Babaen ti ‘espiritu ti pannakabalin’ nga ipapaay ti Kinapudno, maibturan ti maysa . . . dagiti bambanag a narigat nga ibturan ti dadduma.” Inusarna a naimbag ti panawenna iti pagbaludan ket imbagana: “Maysa kadagiti kadakkelan a bendision a naawatko manipud kadagitoy nabiit pay a pakarigatan ket naaddaanak iti adu a naulimek a tiempo tapno agkararag, agmennamenna, ken agadal.”

Di nagbayag, impakaammo ti United States a makiramanda iti gubat. Idi Abril 2, 1917, kiniddaw ni Presidente Woodrow Wilson iti Kongreso ti United States ti pannakaideklara ti gubat kontra iti Germany. Kalpasan ti uppat nga aldaw, nakiraman ti United States iti gubat. Di nagbayag, nasubok ti neutral a takder dagiti Kristiano idiay United States.

Kasapulan unay ti adu a soldado isu nga impaulog ti United States ti Selective Service Act idi Mayo 1917, sa kalpasan ti makabulan, naipaulog met ti Espionage Act. Babaen ti Selective Service Act, mabalin nga ayaban ti gobierno ti rinibu a lallaki nga agsoldado, ken babaen ti Espionage Act, maibilang a kriminal ti maysa no saanna a kayat ti agsoldado. Di nagbayag, dagiti kabusor ti kinapudno inusarda dagitoy a linteg a mangidadanes iti natalna nga ili ni Jehova.—Sal. 94:20.

Saan a nasdaaw dagiti Estudiante ti Biblia no apay a nakagulgulo ti lubong ken adda gubat. Dinekdekadan nga ipakpakaammoda a naipadto iti Biblia dagita a pasamak. Nupay kasta, adu ti nakigtot idi adda timmaud a kontrobersia iti ili ni Jehova.

 Pannakasubok ken Pannakadalus

Di nagbayag kalpasan a natay ni Charles Taze Russell, nangrugi ti problema idiay United States. Kasano itan a maiwanwan ti trabaho dagiti adipen ni Jehova? Inrehistro ni Brother Russell ti Zion’s Watch Tower Tract Society kas maysa a korporasion idi 1884 ket isu ti presidente agingga a natay idi Oktubre 1916. Idi nangrugi a mangidaulo ni Joseph F. Rutherford, adda dagiti prominente a lallaki iti organisasion, a pakairamanan ti uppat a miembro ti board of directors, a nagtarigagay a maaddaan iti dakdakkel nga autoridad.

Saan a kayat dagitoy nga uppat ken ti dadduma pay a lallaki ti panangidaulo ni Brother Rutherford. Maysa kadagiti saanda a nagustuan ket ti nagbalin a desisionna mainaig ken Paul S. L. Johnson, a nagserbi kas maysa a pilgrim, wenno agdaldaliasat a manangaywan.

Sakbay a natay ni Brother Russell, inyurnosna a maibaon ni Johnson idiay England kas agdaldaliasat a pannakabagi ti organisasion. Naibaon ni Johnson sadiay tapno mangasaba, mangbisita kadagiti kongregasion, ken mangaramid iti report maipapan iti trabaho iti dayta a teritoria. Idi simmangpet idiay England idi Nobiembre 1916, naragsakan dagiti kakabsat nga immawat kenkuana. Makapaladingit ta gapu iti adu a pammadayaw, nagbalin a napannakkel ket pinanunotna nga isu ti rumbeng a sumukat ken Brother Russell.

Uray no awan autoridad ni Johnson, inikkatna ti dadduma a miembro ti Bethel idiay England a nangkontra kenkuana. Pinadasna pay a kontrolen ti kuarta ti organisasion iti banko idiay London. Gapu iti dayta, pinagsubli ni Brother Rutherford idiay United States.

Nagsubli ni Johnson idiay Brooklyn, ngem imbes nga agpakumbaba ken awatenna ti pannubngar, maulit-ulit a kinombinsirna ni Brother Rutherford a pagsublienna idiay England tapno maituloyna ti trabahona. Gapu ta saan a napasamak ti kayatna, pinadasna nga alaen ti simpatia ti board of directors ket uppat ti dimmasig kenkuana.

 Gapu ta pampanunoten ni Brother Rutherford a posible a padasen dagitoy a lallaki a kontrolen ti pondo ti organisasion idiay United States, kas iti inaramid idi ni Johnson idiay England, nagtignay tapno maikkatda iti board of directors. Sigun iti linteg, masapul a tinawen nga agbotos dagiti miembro ti korporasion tapno mapili dagiti agbalin a miembro ti board of directors. Nupay kasta, iti tinawen a miting ti korporasion idi Enero 6, 1917, tallo laeng a miembro ti board of directors ti nabotosan—ni Joseph F. Rutherford kas presidente, ni Andrew N. Pierson kas bise presidente, ken ni William E. Van Amburgh kas secretary-treasurer. Awan ti naaramid a panagbotos para iti uppat pay a posision iti board of directors. Ti uppat a bumusbusor nga agak-akem idi kadagita a posision ket napili kas miembro ti board of directors iti napalabas, ket impagarup ti dadduma a tungpal-biag a posisionda dayta. Ngem gapu ta saanda idi a naibotos iti tinawen a miting, saanda a legal a miembro ti board of directors! Isu nga idi Hulio 1917, inusar ni Brother Rutherford ti kalinteganna kas presidente ket nangdutok iti uppat a matalek a lallaki a mangakem kadagiti bakante a posision.

Kas iti ninamnama, nakapungtot ti uppat a naikkat a miembro ket nangaramidda iti kampania tapno maalada manen ti posisionda, ngem napaayda. Uray no dimmasig kadakuada ti dadduma nga Estudiante ti Biblia ket nangbukelda kadagiti organisasion, kaaduan kadagiti Estudiante ti Biblia ti nagtalinaed a matalek, ket saan a naala ti uppat a lallaki ti dati a posisionda kas miembro ti board of directors.

Panagrang-ay Uray Narigat ti Kasasaad

Kabayatanna, intultuloy ni Brother Rutherford ken dagiti matalek a kakabsat iti Bethel ti nagtrabaho para iti panagrang-ay dagiti bambanag mainaig iti Pagarian. Ti 69 a bilang ti agdaldaliasat a manangaywan, a naawagan idi iti pilgrim, ket nagbalin a 93. Ti 372 a bilang ti colporteur, wenno regular pioneer, ket nagbalin nga 461. Iti umuna a gundaway, adda  met dagiti nadutokan kas special colporteur, a kapadpada ti auxiliary pioneer ita. Immabut iti 100 ti bilang dagiti nareregta nga special colporteur iti dadduma a kongregasion.

Idi Hulio 17, 1917, nairuar ti libro a The Finished Mystery. Idi nagleppas ti tawen, naibus ti suplay ket 850,000 a kopia ti libro ti naipayimprenta iti kompania a nangyimprenta kadagiti publikasiontayo. *

Nakompleto idi 1917 ti panagbalbaliw ti urnos idiay Bethel nga inrugi ni Brother Russell idi 1916. Idi Disiembre 1917, inreport ti The Watch Tower: “Ti pannakabalbaliw ti urnos mainaig kadagiti agtrabtrabaho iti Bethel . . . ket nakompleton. Produktibo ken naannayasen ti trabaho kas iti maysa nga institusion a nasayaat ti pannakaimaneharna . . . Nabigbig dagiti agtrabtrabaho iti Bethel a maysa a pribilehio ti agtrabaho sadiay, saan ket a kalintegan.”

Idi Septiembre 1917, imbaga ti The Watch Tower: “Sipud idi Enero 1, binulan a nangatngato ti bilang [ti maipapayimprenta a publikasion] kompara kadagiti kaibatoganda a bulan idi 1916 . . . Nabileg daytoy nga ebidensia a bembendisionan ti Apo ti trabaho ditoy Brooklyn.”

Di Pay Nalpas ti Pannakasubok ken Pannakadalus

Naikkaten iti organisasion dagiti bumusbusor, ket ipakita ti resulta ti botos dagiti kongregasion, a nairuar iti The Watch Tower, a kaaduan a kakabsat ti mangsupsuporta ken Brother Rutherford ken kadagiti matalek a lallaki iti Bethel. Ngem saan pay a nalpas ti pannakasubok dagitoy a matalek a lallaki. Nupay nasayaat ti panangrugi ti 1918, dayta met ti rugi ti kasipngetan a panawen iti pakasaritaan ti ili ti Dios ita.

^ par. 18 Agingga idi 1920, dagiti komersial a pagimprentaan ti mangyim-imprenta kadagiti publikasiontayo.