Mapan iti linaonna

Mapan iti listaan dagiti linaonna

Pioneer Service School iti asideg ti Zugdidi

 GEORGIA | 1998-2006

Dagiti Bendision iti “Mainugot a Panawen” ken iti “Nariribuk a Panawen.”—2 Tim. 4:2.

Dagiti Bendision iti “Mainugot a Panawen” ken iti “Nariribuk a Panawen.”—2 Tim. 4:2.

 MANIPUD iti maudi a paset ti 1990’s, dakkel ti ngimmatuan ti bilang dagiti agibumbunannag ken dagiti interesado idiay Georgia. Idi 1998, immabut iti 32,409 ti immatender iti Pananglaglagip iti ipapatay ni Kristo.

Ngem kabbaro pay laeng iti kinapudno ken bassit pay laeng ti kapadasan ti adu nga agibumbunannag, a pakairamanan dagiti panglakayen. Masapul a masanay ti kaaduan kadakuada iti nagduduma nga aspeto dagiti naespirituan nga aktibidad. Ngem kasano?

Nangipaay ti Organisasion ni Jehova iti Ad-adu a Tulong

Da Arno ken Sonja Tüngler, a naggraduar iti Gilead Extension School idiay Germany, ket naibaon idiay Georgia idi Marso 1998. Iti dayta met la a tawen, inaprobaran ti Bagi a Manarawidwid ti pannakailukat ti country office idiay Georgia, nga iwanwan ti sangay ti Russia.

Di nagbayag, nabukel ti Komite ti Pagilian ket daytan ti nangiwanwan iti trabaho a panangasaba. Idi nairehistron ti trabahotayo, direktan a makaipatulod kadagiti naibatay-Biblia a publikasion ti pagaammo idi kas sangay ti Germany. Kasta met, makagatangen dagiti kakabsat kadagiti lote a pakaibangonan dagiti Kingdom Hall ken pasilidad ti sangay.

Nangrugi ti Naespirituan a Pannakasanay

Adu a tawen a naiparit ti trabaho bayat ti turay ti Soviet, isu nga adu nga agibumbunannag ti saan a nakapangasaba iti binalaybalay. Insalaysay ni Arno Tüngler: “Kanayon a mangaskasaba iti lansangan ti kaaduan kadagiti  agibumbunannag, ngem saan nga amin ket naruam nga agbalaybalay ken agsarungkar kadagiti interesado.”

Da Arno ken Sonja Tüngler

Nangrugi a nagserbi ni Davit Devidze iti kaluklukat a country office idi Mayo 1999. Imbagana: “Nagadu ti masapul nga aramiden iti tay-ak ken iti Bethel. Adu ti mabasbasami nga instruksion ngem saanmi nga ammo no kasano nga aramiden. Isu a nagsursurokami kadagiti eksperiensiado a kakabsat nga imbaon ti Bagi a Manarawidwid.”

Nangrugi ti pannakasanay dagiti kakabsat idiay Georgia. Ngem kas iti gagangay a mapadpadasan dagiti immakar iti lugar a dakdakkel ti panagkasapulanna, saan laeng a dagiti masansanay ti mabembenepisiaran. (Prov. 27:17) Adu met ti nasursuro dagiti kakabsat kadagiti sinanayda.

Nagsayaat ti Kababalin Dagiti Kakabsat Idiay Georgia

Saan a malipatan da Arno ken Sonja ti naayat a panangasikaso kadakuada dagiti kakabsat idi simmangpetda idiay Georgia. Inaramid dagiti kakabsat ti amin a kabaelanda a nangtulong kada Arno ken Sonja tapno maruamda iti baro a teritoriada.

 Malaglagip ni Sonja ti kinaparaburda. Inyestoriana: “Adda agassawa a kaarrubami a kanayon a mangitultulod iti naimas a makan. Inkaduanakami ti maysa a sister a mangasaba, inyam-ammonakami iti baro a kongregasionmi, ken adu ti imbagana maipapan iti kultura ti Georgia. Adda met naanus a sister a nangisuro kadakami iti lengguahe a Georgian.”

Imbaga da Warren ken Leslie Shewfelt a taga-Canada a naibaon idiay Georgia idi 1999: “Nagustuanmi unay ken natukay ti riknami iti kinadungngo dagiti kakabsat a Georgian. Ibagbaga ken ipakpakita ti amin ti marikriknada ken ti ayatda iti maysa ken maysa, uray dagiti ubbing.”

Nagserbi dagiti kakabsat idiay Georgia iti country office a kadua dagiti eksperiensiado a misionero

Saan a nagpokus dagiti misionero kadagiti pakarigatan a nakaipasanguanda. Imbes ketdi, nagpokusda kadagiti nagsasayaat a kababalin dagiti Georgian. Kasta met, gapu iti kinapakumbaba ken naayat a panangtulong dagiti  misionero, nagustuan ida a dagus dagiti kakabsat idiay Georgia.

Inawat Dagiti Managbuteng iti Dios ti Kinapudno

Idi 1990’s, adu a nasingpet ti panagpuspusona a tattao ti nangawat iti kinapudno. Idi laeng 1998, adda 1,724 a nabautisaran. Apay a nagadu a Georgian ti naginteres iti kinapudno?

“Ti panagayat iti Dios ti maysa kadagiti sursuro a nabayagen nga ipatpateg dagiti Georgian, isu a no ikasabami kadakuada ti mensahe ti Biblia, talaga nga aginteresda,” inlawlawag ni Tamazi Biblaia, nga adu a tawen a nagserbi kas agdaldaliasat a manangaywan.

Imbaga ti maysa nga instruktor iti School for Kingdom Evangelizers a ni Davit Samkharadze: “No mangrugi nga agadal iti Biblia ti maysa, kaaduanna a padasen a pasardengen dagiti kabagian ken kaarrubana. Ngem intono kuan, kaaduan kadakuada ti makipagadal metten iti Biblia!”

Naisaknap ti mensahe maipapan iti Pagarian ket binalbaliwanna ti biag ti adu a tao. Idi Abril 1999, immabut iti 36,669 ti bilang dagiti immatender iti Memorial—ti kangatuan pay laeng idi a bilang a nairekord idiay Georgia.

“Adu Dagiti Bumusbusor”

Insurat ni apostol Pablo maipapan iti ministeriona idiay Efeso: “Naluktan kaniak ti maysa a dakkel a ruangan a mangiturong iti panagaramid, ngem adu dagiti bumusbusor.” (1 Cor. 16:9) Kasta a kasta ti situasion a nakaipasanguan dagiti Saksi idiay Georgia sumagmamano a bulan kalpasan ti nakallalagip a Memorial idi 1999.

Iti Agosto dayta a tawen, dagiti miembro ti maysa nga extremist a grupo ti Orthodox, nga indauluan ti naikkat a  padi a ni Vasili Mkalavishvili, nagprotestada idiay Tbilisi ken pinuoranda dagiti literaturatayo iti publiko. Dayta ti mitsa ti agsasaruno a pannakaidadanes a nagpaut iti uppat a tawen.

Nangrugi idi 1999, dagiti Saksi ni Jehova idiay Georgia ket nagbalin a puntiria dagiti protesta ken pannakaraut, ken pupuoran dagiti bumusbusor dagiti literaturada

Idi Oktubre 17, 1999, sumagmamano nga extremist iti relihion ti nangummong iti agarup 200 a tattao ket riniribukda ti gimong ti Gldani Congregation idiay Tbilisi. Kinabkabilda dagiti immatender babaen iti kayo a pang-or ken landok a krus ket nayospital ti dadduma a Saksi.

Makapaladingit ta saan a naaresto dagiti immatake, ken nagtultuloy ti pannakaidadanes dagiti Saksi. Adda dagiti opisial ti gobierno, a pakairamanan ni Presidente Shevardnadze, a nangkondenar kadagita a naranggas a panangatake, ngem saan met a naaksionan dagita. Kinapudnona, kaaduanna a sa laeng rumesponde dagiti polis no nabayagen a nalpas ti panangraut.

Inrugi met ni Guram Sharadze, a miembro ti parliamento ti Georgia, ti nakaro a panangpadpadakes kadagiti Saksi. Imbagana a delikado a tattao dagiti Saksi. Agparang a dagiti “mainugot a panawen,” wenno nasayaat a panawen, para iti pannakaikasaba ti naimbag a damag ket paset laengen ti napalabas.

Nagtignay ti Organisasion ni Jehova

Dagus nga impaay ti organisasion ni Jehova ti kasapulan dagiti Saksi idiay Georgia. Nakaawat dagiti kakabsat iti instruksion no ania ti aramidenda no marautda. Naipalagip met kadakuada dagiti rason no apay a maidadanes no dadduma dagiti pudno a Kristiano.—2 Tim. 3:12.

Kanayonanna, indepensa ti organisasion ni Jehova dagiti kakabsat iti korte. Imbaga ti maysa a brother a  nagserbi idi iti Legal Department iti sangay ti Georgia: “Bayat dayta nga uppat a tawen, nangyulikami iti nasurok a 800 a reklamo gapu kadagiti inaramid ti grupo ni Vasili Mkalavishvili. Nagpatulongkami kadagiti opisial ken kadagiti organisasion a mangilablaban iti kalintegan ti tao. Nangirugi ti sangalubongan a hedkuarter dagiti Saksi ni Jehova iti kampania a mangipakaammo iti publiko kadagiti pannakaraut dagiti kakabsattayo, ngem nagtultuloy latta ti pannakarautda.” *

^ par. 30 Para iti kanayonan nga impormasion maipapan iti pannakailaban dagiti kalintegantayo, kitaem ti Enero 22, 2002 nga Agriingkayo!, panid 18-24.