Mapan iti linaonna

Mapan iti listaan dagiti linaonna

 GEORGIA

Kunak no Awanen ti Kurang iti Biagko

Madona Kankia

Kunak no Awanen ti Kurang iti Biagko
  • NAYANAK 1962

  • NABAUTISARAN 1990

  • ABABA A PAKASARITAANNA Dati a miembro ti Partido Komunista ti Georgia. Adu ti natulonganna a mangammo iti kinapudno. Idi 2015, naggraduar iti kaunaan a klase ti School for Kingdom Evangelizers idiay Tbilisi.

IDI naammuak ti kinapudno idi 1989, maysaak a prominente a miembro ti Partido Komunista iti ilimi a Senaki, ken miembroak met ti Supreme Soviet ti Georgia, a katupag ti parliamento ita. Planomi met idin ti agkasar iti nobiok, isu a kunak no awanen ti kurang iti biagko.

Immula dagiti nagannakko iti pusok ti panagayat iti Dios. Isu a mamatiak iti Dios uray no maysaak a Komunista. Idi nakipagadalak iti Biblia, nasungbatan ti amin a saludsodko, isu a nagdesisionak a mangidedikar iti biagko ken Jehova. Ngem saan a naragsakan ti pamiliak iti desisionko, uray dagiti gagayyemko, dagiti katrabahuak, ken ti nobiok.

Inlaksiddak dagiti kapamiliak ta binaliwak ti relihionko. Nabigbigko met a maikontra dagiti patpatiek iti trabahok iti politika. Isu a pimmanawak idiay balay, insinak ti nobiok,  ken immikkatak iti trabahok, kasta met iti Partido Komunista ken iti Supreme Soviet. Kalpasan a nabautisaranak, kimmaro ti panangbusor dagiti gagayyemko ken kapamiliak. Adu ti makaam-ammo kaniak iti lugarmi isu a gimmulo ti situasion idi nagbalinak a Saksi. Gapuna, immakarak iti siudad ti Kutaisi ket dagus a nagpayunirak.

No damagen dagiti tattao no naragsakak ta saanko nga insuko ti pammatik uray no adu ti rigat a napasarak, dagus nga ibagak a nakaragragsakak. Uray saan a naawatan dagiti nagannakko ti desisionko, agyamyamanak ta insurodak a mangayat iti Dios ken iti sabsabali. Dakkel ti naitulongna dayta kaniak.