Mapan iti linaonna

Mapan iti listaan dagiti linaonna

 GEORGIA

“Iti Dios Amin a Bambanag Mabalin”

Natela Grigoriadis

“Iti Dios Amin a Bambanag Mabalin”
  • NAYANAK 1960

  • NABAUTISARAN 1987

  • ABABA A PAKASARITAANNA Di nagbayag kalpasan ti bautismona, inusarna ti kapadasanna ken dagiti koneksionna kas purchasing manager tapno tumulong iti nalimed a panagimprenta.

KADAGITI gimongmi iti maudi a paset ti 1980’s, ti laeng mangidadaulo iti Panagadal iti Pagwanawanan ti addaan iti kopia ti magasin, ken gagangay a manomano ti pannakaisurat dayta. Insingasingko iti maysa a panglakayen a ni Brother Genadi Gudadze a padasenmi ti agimprenta iti bukodmi a kopia.

Datin nga agus-usar dagiti kakabsat iti inaramidda a mimeograph tapno makayimprentada iti sumagmamano a publikasion. Ngem tapno regular a makaaramidda kadagiti magasin, kasapulan ti nasaysayaat a mimeograph, makinilia, nalaing nga agmakinilia, ken suplay ti stencil paper. Nupay kasta, amin a mausar iti panagimprenta, uray ti papel, ket nakarehistro iti gobierno ken iggem dagiti autoridad.

Gapu iti trabahok, adda naam-ammok a lalaki a mabalin a makaala iti makinilia a saanen a maus-usar ken saanen nga iggem ti gobierno, isu a nakaalaak iti maysa. Paramakinilia ti trabaho ti adingko a babai ket matulongannakami. Nagaramid dagiti kakabsat iti baro a mimeograph ken nakabirokda  iti paggatangan iti stencil. Mayat ti taray dagiti bambanag, ket di nagbayag, nakayimprentakami iti kaunaan a kopia ti maysa a ruar Ti Pagwanawanan iti Georgian.

Ngem adda baro a problema. Maysa nga aldaw, imbaga kaniak ni Genadi, “Masapul nga agbiroktayo iti sabali a paggatangan ti stencil.” Nakakita ni Genadi iti adu nga stencil iti maysa nga opisina a kontrolado ti gobierno ngem saan a makagatang ta sipsiputan isuna dagiti polis. Kasanokami ngarud a makagatang? Inulit-ulitko nga imbaga, “Imposible dayta!” Ngem insungbat ni Genadi, “Saanmo nga ibagbaga nga ‘Imposible dayta.’ ‘Iti Dios amin a bambanag mabalin’!”—Mat. 19:26.

Iti simmaruno nga aldaw, pampanunotek ti imbagana bayat nga agnernerbiosak nga agturong iti dayta nga opisina. Inturongnak ni Jehova iti maysa a mannakigayyem a babai a paramakinilia nga immanamong a mangipasa iti kiddawko iti head ti opisina. Asawana gayam ti head! Di nagbayag, kanayonakon a gumatgatang sadiay iti stencil ket sipud idin, saankamin a nagproblema iti suplay.