Mapan iti linaonna

Mapan iti listaan dagiti linaonna

 GEORGIA

Linagipda ti Naindaklan a Namarsua

Linagipda ti Naindaklan a Namarsua

Adu kadagiti kapadasan a naisalaysay kadagiti immuna a panid ti maipapan kadagiti agtutubo a ‘nanglagip iti Naindaklan a Namarsua kadagiti aldaw ti kinaagtutuboda.’ (Ecl. 12:1) Kinapudnona, agtawen iti 25 wenno ub-ubing pay ti kakatlo ti 3,197 a payunir idiay Georgia. Apay a naregta dagitoy nga agtutubo?

Adda sumagmamano a rason. Ti maysa a makagapu ket gagangay a nadekket ti relasion dagiti pamilia idiay Georgia. Naiturong ti brother a ni Konstantine ti lima nga annakna iti kinapudno. Imbagana: “Natignayak a mangawat iti kinapudno gapu ta nariknak ti ayat ni Jehova kas maysa nga Ama. Ket idi nagbalinak nga ama, kayatko nga agbalin a nadekket kaniak dagiti annakko.”

Tallo ti annak ni Malkhazi ket ikagkagumaanda ken baketna a pagbalinen a natibker ti relasion ti pamiliada. Kinunana: “Sagpaminsan nga ibagbagami kadagiti annakmi a panunotenda no ania ti maap-apresiarda kadakami ken kadagiti kakabsatda, ket iti panagdaydayaw ti pamiliami, paregtaenmi ida a mangibaga kadagiti napanunotda.  Kas resultana, nasursuroda a kitaen ti positibo a kababalin ti sabsabali ken nasursuroda ida nga apresiaren.”

“Talaga a Naragsak Itan ti Biagko!”

Tapno matulongan dagiti panglakayen dagiti nagannak iti panangsanayda kadagiti annakda, iramramanda dagiti annak kadagiti aktibidad ti kongregasion uray no ubbingda pay. Imbaga ni Nestori, a nabautisaran idi 11 ti tawenna: “Sipud idi ubingak, ik-ikkandakon dagiti panglakayen kadagiti nalaka a trabaho. Gapu iti dayta, nariknak a talaga a pasetak ti kongregasion.”

Dakkel met ti papel ti nasayaat nga ulidan ken suporta dagiti panglakayen. Inyestoria ni Koba a manong ni Nestori: “Saan a kas kadagiti kakabsatko, nakagulgulo ti biagko idi tin-edyerak. Adda naubing pay a panglakayen a nasayaat ti ulidanna a timmulong kaniak. Inkagumaannak a tarusan ken dinak inuk-ukom. Nagdakkel ti naaramidanna tapno makasubliak ken Jehova.”

 Agserserbi itan da Nestori ken Koba ken ti manangda a ni Mari iti adayo a teritoria. Imbaga ni Koba, “Talaga a naragsak itan ti biagko!”

“Mangngegko Koma a ti Annakko Agtultuloyda a Magna iti Kinapudno”

Tapno matulongan ti sanga nga opisina dagiti nagannak iti panangsanayda kadagiti annakda, iramramanda dagiti agtutubo a Kristiano kadagiti proyekto ti organisasion. Imbaga ti maysa a miembro ti Komite ti Sangay: “Ipatpategmi dagiti agtutubo, isu nga ikagkagumaanmi a suportaran ti panagporsegida a mangragpat kadagiti naespirituan a kalatda.”

Nakipagtrabaho dagiti kakabsat idiay Georgia kadagiti international servant idi maibangbangon ti Assembly Hall idiay Tbilisi

Dakkel ti epekto kadagiti agtutubo ti pannakipagtrabaho ken pannakikadkaduada kadagiti nataengan. Nakipagtrabaho idi ni Mamuka kadagiti international servant iti pannakaibangon ti Assembly Hall idiay Tbilisi. Imbagana: “Gapu kadagiti kasta a proyekto, adu ti nasursurok iti sabsabali. Saan laeng a maipapan iti trabaho ti nasursurok, nakasursuroak met maipapan kadagiti naespirituan a bambanag.”

Nagsayaat ti epekto kadagiti agtutubo idiay Georgia ti nadekket a relasionda iti pamiliada, ti pammaregta dagiti panglakayen, ken dagiti nasayaat nga ulidan. Marikna dagiti nagannakda ti kas iti narikna ni apostol Juan, a nangisurat: “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a banag, a mangngegko koma a ti annakko agtultuloyda a magna iti kinapudno.”—3 Juan 4.

Panagipatarus iti Dadduma Pay a Lengguahe

Idi 2013, kiniddaw ti Bagi a Manarawidwid iti amin a sangay nga adalenda a naimbag no kasapulan a maipatarus dagiti publikasion iti dadduma pay a lengguahe iti teritoriada.  Iti kasta, maidanon ti naimbag a damag iti ad-adu a tattao.

Kas resultana, inrugi ti sangay ti Georgia nga ipatarus ti dadduma a publikasion iti Svan ken Mingrelian. Dandani kapadpada dagita a lengguahe ti Georgian ket ibilbilang dagita ti dadduma kas dialekto.

Insurat dagiti naregta a payunir iti rehion ti Svaneti: “Talaga nga interesado dagiti Svan kadagiti naespirituan a bambanag ken ipatpategda unay ti Biblia. Uray dagidiay agpangadua nga umawat kadagiti publikasion idi damo immawatda met kadagiti publikasion a naipatarus iti bukodda a pagsasao.”

Natukay ti rikna dagiti agibumbunannag a Mingrelian idi nangrugida nga aggimong iti nakayanakanda a lengguahe. Imbaga ti agtutubo a lalaki a payunir a ni Giga:  “Kadagiti gimong, mayebkaskon ti kapanunotak iti bukodko a sasao. Saankon a kasapulan nga ipatarus iti panunotko dagiti sungbatko sakbay nga agkomentoak.”

Imbaga ni Zuri, a maysa a panglakayen iti Mingrelian a kongregasion idiay Tkaia: “Adun ti makatukay-puso a pasamak iti biagko. Adda dagiti naragsak ken adda met naliday, ngem saanak a nakalua kadagita. Ngem idi damo a kinantami iti gimong dagiti kanta ti Pagarian iti Mingrelian, saanmi a nagawidan ti agsangit.”

Nakallalagip a Pasamak iti Nabiit Pay a Tawtawen

Napasamak idi Sabado, Abril 6, 2013, ti maysa kadagiti nakallalagip nga okasion iti pakasaritaan dagiti Saksi idiay Georgia. Imparang ni David Splane, a miembro ti Bagi a Manarawidwid, ti palawag ti dedikasion para iti na-renovate ken napalawa a sanga nga opisina, Assembly Hall, ken  baro a pasilidad para iti teokratiko nga eskuelaan. Naragsakan dagiti kakabsat idiay Georgia a nangawat ken nangpadagus iti 338 a delegado a naggapu iti 24 a pagilian.

Iti simmaruno nga aldaw, nangipaay ni Brother Splane iti espesial a palawag a nabuya ti 15,200 a tattao babaen iti audio/video tie-in kadagiti kongregasion iti intero a pagilian. Daytoy ti kadakkelan nga internasional a teokratiko nga okasion a naangay idiay Georgia. Talaga a makatukay ti panagpipinnaregta ken ragsak dagiti kakabsat iti dayta nga okasion. Kinuna ti maysa nga agtutubo a brother, “Ammok itan no kasanonto karagsak ti biag idiay baro a lubong.”

Pannakaidedikar ti sanga nga opisina idiay Tbilisi, 2013

Talaga a bendision iti ili ni Jehova idiay Georgia ti Bible School for Christian Couples, a maawagan itan iti School for Kingdom Evangelizers. Sipud idi 2013, nasuroken a 200 nga estudiante ti naggraduar iti dayta. Gapu ta napalalo ti panagyaman dagiti naggraduar iti naawatda a pannakasanay, situtulokda nga agserbi iti sadinoman nga addaan panagkasapulan.

“Panangragpat Kadagiti Banag nga Adda iti Masanguanan”

Gapu iti panagporsegi dagiti natured a nagkauna nga agibumbunannag iti Pagarian, nagsaknap ti naimbag a damag iti intero a Georgia. Binendisionan ni Jehova ti panagayatda iti Dios ken iti padada a tao, kasta met ti panagsakripisio, pammati, tured, ken panangipamuspusanda.

Naragsak ti nasurok a 18,000 a kakabsat idiay Georgia a mangitultuloy iti trabaho nga inrugi dagiti nagkauna nga agibumbunannag ken tultulonganda ti sabsabali tapno mapadasanda a mismo ti bileg ti Sao ti Dios.—Fil. 3:13; 4:13.

Komite ti Sangay ti Georgia: Wayne Tomchuk, Levani Kopaliani, Joni Shalamberidze, Michael E. Jones