Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

England: Dagiti kakabsat a naayat a mangab-abrasa kadagiti delegado iti internasional a kombension

 SANGALUBONGAN A PANANGASABA KEN PANANGISURO

Europa

Europa
  • PAGILIAN 47

  • POPULASION 743,421,605

  • AGIBUMBUNANNAG 1,614,244

  • PANANGYADAL ITI BIBLIA 842,091

Panagkamali a Nagresulta iti Panangyadal iti Biblia

Ti internasional a kombension idiay London, England, ket makaparagsak nga okasion para kadagiti Saksi sadiay ken kadagiti bumisbisita a delegado. Napan da Andrew ken Elizabeth iti maysa a hotel idiay London tapno abrasaenda dagiti delegado manipud iti sabali a pagilian. Adda nakita ni Elizabeth iti reception area a babai a desente ti badona ket impagarupna a maysa a delegado, isu  nga inarakupna iti nairut. Nakigtot ti babai, isu a nagpadispensar ni Elizabeth. “Pasensiakan,” kinunana. “Kunak ngamin no maysaka a delegado!”

“Delegado iti ania?” insaludsod ti babai.

Intudo ni Elizabeth ti karatula iti reception desk a mangkablaaw kadagiti Saksi ni Jehova ket naragsakan iti reaksion ti babai. Kinunana, “Naragsakak ta ibilbilangnak kas Saksi!”

Iti saritaanda, naammuan ni Elizabeth a Vivien ti nagan ti babai, dati a taga-Nigeria, ken agassideg ti paggigiananda. Immanamong ni Vivien nga agpayadal iti Biblia ken kayatna a makikadua met dagiti annakna. Napan da Andrew ken Elizabeth iti balay da Vivien ket isuna met ti nangarakup kadakuada iti nairut. Nagsayaat ti epektona ken Vivien ti naiparparna a panagam-ammoda iti sentro ti London. Idi impakita da Andrew ken Elizabeth ti libro nga Isursuro ti Biblia, nasorpresada idi imbaga ni Vivien nga adda kastan a librona ken ibasbasana dayta iti uppat nga annakna. Idi imbaga da Andrew a dayta a libro ti maus-usar iti panagadal iti Biblia, kinuna ni Vivien, “Rugiantay ngaruden!”

Surat ti Maysa a Kabsat a Roma

Idi Nobiembre 2014, nabukel ti umuna a Romany a kongregasion idiay Slovakia. Iti nabiit pay nga asamblea sirkito, 21 a Romany ti pagsasaona ti nabautisaran. Naggapuda amin iti maymaysa a purok. Adda 495 nga immatender iti Memorial iti Romany a kongregasion. Insurat ti maysa a brother a nabiit pay a nabautisaran:

Slovakia: Dua a Saksi a mangaskasaba iti maysa a babai a Roma

“Maysaak a Roma a taga-Žehra, Slovakia. Iti lugarmi, nababa ti panagkita ti adu a puraw kadakami, nga  ibilbilangdakami kas Gypsy, ken para kadakuada, narugit, ulbod, ken agtatakawkami. Kayatko idi ti sumrek iti simbaan ngem kinuna ti paraaywan a saanak a mabalin a sumrek ket pinapanawnak. Gapu kadagiti kasta a kapadasak, marurodak kadagiti puraw. Naminsan, inawisdak dagiti Saksi ni Jehova iti Kingdom Hall. Napanak ngem ammok a madismayaak manen. Nasdaawak ta sakbay pay a nakastrekak iti Kingdom Hall, inalamanonak ti maysa a puraw a lalaki ken naayat ti panangkablaawna. Saanko a naipamaysa ti agdengngeg iti palawag ta pampanunotek no apay a nakasingsingpetda kaniak.

“Saanak a nakaturog iti karabiyanna ta pampanunotek ti napasamak iti Kingdom Hall. Isu nga immatenderak manen ta kayatko a maammuan no pudpudno met laeng ti kinaimbagda kaniak. Ngem iti dayta a pannakigimongko, nasaysayaat manen ti panangtratoda kaniak, a kaslaak nabayagen a gayyemda. Sipud idin, kanayonakon a makigimgimong, ken idi agangay, nabautisaranak. Idi bautisadoakon, saan a nagbaliw ti panangtratoda kaniak, ken ipakpakitada latta a napategak kadakuada. No dadduma, mangipasangoda pay iti makan a naim-imas ngem iti gagangay a kankanenda! Maragsakanak unay ta addaak iti daytoy nga organisasion, ken ni Apo Jehova ti Dios a kayatko a pagserbian iti agnanayon.”

Nasungbatan ti Kararag a Makapangasaba

Nakalugan ti maysa a sister a ni Aysel iti bus a naggapu iti ili ti Ganja a mapan iti Baku idiay Azerbaijan. Inkararagna ken Jehova nga adda koma makasaritana maipapan iti Biblia bayat ti biahe. Uray no addan pagtugawan ni Aysel, impilit ti maysa a babai nga agtugaw ni Aysel iti abayna. Nakisarita ni Aysel iti babai ket naiturongna ti saritaan iti Biblia. Imbaga ti babai nga ay-ayatenna ni Jesus ken kayatna nga ad-adda a maam-ammo isuna. Inted ti  babai ti numero ti teleponona ket inted met ni Aysel ti numerona sa implanoda ti agkita manen. Kiniddaw ti babai ken Aysel a no mabalin, mangitugotto iti Biblia.

Idi nagsubli ni Aysel iti Ganja, binisitana ti interesado a babai iti pagtrabtrabahuanna. Imbaga ti babai nga adda “prayer book” nga inaldaw a basbasaenna. Nasorpresa ni Aysel idi naammuanna a ti ibagbagana a “prayer book” ket bokleta met gayam a Panangsukimat iti Kasuratan iti Inaldaw iti 2013! Nairugi ti panangyadal iti Biblia, ket maragsakan ni Aysel ta inikkan ni Jehova iti tured a mangasaba iti di pormal.

Surat ti Panagyaman ti Maysa a Balud

Naggapu idiay Spain daytoy a surat:

“Umuna iti amin, kayatko ti agyaman kadakayo iti panagreggetyo a mangidanon iti mensahe ti Biblia iti amin a kita ti tattao.

“Sangapulo ket lima a tawenen ti napalabas idi damo a nakasaritak dagiti Saksi ni Jehova idiay Tiranë, Albania. Nasdaawak ta naitured idi ti maysa a Saksi ti makisarita kadakami uray no sangapulokami nga agtutubo a miembro ti gang. Awan ti makaitured a makisarita kadakami, ngem kinasaritanakami dayta a kabsat uray no adda armasmi. Impakaammona ti maipapan iti Biblia. Nagbilibak unay iti kinaturedna.

“Uppat a tawenen ti napalabas, adda Saksi a bimmisita kaniak iti pagbaludan ditoy Spain ket dinamagna no kayatko ti mayadalan iti Biblia. Nagpayadalak, ket sipud idin, dakkel ti nagbalbaliwak. Saanakon a naranggas ken nauyong, ken tawtawenen ti napalabas sipud idi naudi a nakilabanak. Gapu ta naam-ammokon ni Apo Jehova, addan direksion ti biagko. Ikagkagumaak ti saanen a makiriri, ken nasurok a makatawenakon a di bautisado nga agibumbunannag.

 “Dose a tawenen a nakabaludak, ngem iti napalabas nga uppat a tawen, nakaragragsakak ken natalna ti panunotko. Ita pay laeng a nariknak ti kasta. Inaldaw a pagyamyamanak dayta ken Apo Jehova.

“Sumagmamanon a lawas ti napalabas, nagbuyaak kadagiti video iti jw.org. Natukay ti riknak idi nabuyak ti maipapan iti maysa a brother a naibalud idiay United States. Saanak a nalaka nga agsangsangit, ngem idi nabuyak dagiti inaramidna a panagbalbaliw, diak nagawidan ti agsangit.

“Agtultuloy koma a bendisionan ni Apo Jehova ti panagreggetyo a tumulong iti amin a kita ti tattao babaen ti panangipatarusyo iti naimbag a damag iti adu a lengguahe ken iti panangbisitayo kadakami nga adda iti pagbaludan.

“Agyamanak unay.”

“Natalna Met Laengen ti Panunotko”

“Saanak idi a naragsak ken awan direksion ti biagko. Kayatko ti maaddaan iti talna ti panunot ngem kasla  naatap dayta kaniak,” kinuna ni Felicity, nga agtawen iti 68 a taga-Sweden. Gapu ta saan a kontento iti patpatienna kas maysa a Katoliko, inusigna ti sursuro ti nagduduma a relihion agingga a nakiramramanen iti panagkulam ken panagpadles, wenno panangammo iti masanguanan babaen ti espiritismo.

Gapu ta awan direksion ti biagna, nakaro ti lidayna ket napanunotna payen ti agpakamatay. “Agar-arubos ti luak idi immawagak a sipipigsa iti Dios, nga indawatko nga ibagana no ania ti kayatna nga aramidek. Kalpasan ti dua a lawas, adda nagtuktok iti balayko. Nakaisem nga insaludsod ti maysa nga agtutubo a lalaki no kayatko ti dumngeg iti Sao ti Dios. Naibagak iti bagik, ‘Apo, saan a daytoy ti kidkiddawek—saan a dagiti Saksi ni Jehova!’”

Nupay kayatna koma idi nga irikep ti ruangan, nagdengngeg latta ken immanamong a mayadalan iti Biblia babaen iti libro nga Isursuro ti Biblia. “Nailawlawag kaniak ti Biblia iti baro nga anggulo,” kinunana. Nabautisaran ni Felicity iti maysa a rehional a kombension idiay Sweden idi 2014. Kinunana: “Daytoy ti tinartarigagayak iti intero a panagbiagko. Natalna met laengen ti panunotko.”