Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

Israel: Panangusar iti tablet iti panangikasaba iti Pagarian ti Dios

 SANGALUBONGAN A PANANGASABA KEN PANANGISURO

Asia ken ti Middle East

Asia ken ti Middle East
  • PAGILIAN 49

  • POPULASION 4,409,131,383

  • AGIBUMBUNANNAG 718,716

  • PANANGYADAL ITI BIBLIA 766,364

Sangagasut nga Oras Para iti Sangagasut a Tawen

Iti maysa a pagilian iti Asia, maysa a sikat nga aktres ken model ti nagpayadal iti Biblia. Dagus nga inyaplikarna dagiti nasursurona ket imbellengna dagiti literatura nga adda koneksionna iti espiritismo ken dagiti rebulto ti Buddhist nga adda kenkuana.

Kasta unay ti panangkombinsir kenkuana ti maysa a nadekket a gayyemna, a kunana: “Isardengmo  pay laeng ti agadal iti Biblia uray tallo laeng a tawen ket agpokuska iti trabahom. Kalpasanna, ituloymonto manen.”

Insungbatna: “Nagur-urayak iti 24 a tawen tapno maam-ammok ni Apo Jehova. Apay koma nga itantanko pay iti tallo a tawen ti panangam-ammok kenkuana?”

Iti lawas ti panangiparangna iti umuna a pasetna iti Teokratiko nga Eskuelaan ti Panagministro, maysa a kompania ti pelikula ti nangkontak kenkuana. Imbagada nga ikkanda iti uppat a tawen a kontrata a dakkel ti bayadna basta awatenna ti aniaman a papel a maited kenkuana, ngem saanna nga inawat dayta. Idi Mayo 2014, nagbalin a di bautisado nga agibumbunannag, ken idi dandanin madanon ti bulan ti Agosto, implanona ti mangasaba iti 100 nga oras iti dayta a bulan. Idi napagsaludsodan no apay, kinunana, “Kayatko a selebraran ti 100 a tawen a panagturay ni Jesus babaen ti panangasabak iti maysa nga oras para iti tunggal tawen a panagturayna!” Naaramidna dayta. Idi Enero 2015, nabautisaran isuna, ken ita, maysan nga auxiliary pioneer.

Panangasaba Bayat a Nakabalud

Uppat a sister idiay Sri Lanka ti naglugan iti bus tapno mapan mangasaba iti di maas-asak a teritoria a Buddhist ti kaaduan a lumugar. Iti maikadua nga aldaw a panangasabada, immasideg ti maysa a monghe ken maysa a taxi driver ket pinagsasawanda dagiti kakabsat. Idi kuan, inaribungbongan ida ti agarup 30 a makapungpungtot a tattao. Simmangpet dagiti polis, impanda dagiti kakabsat iti presinto, ken imbaludda ida iti agpatpatnag, uray no awan ti darum kontra kadakuada. Naipanda iti selda nga ayan dagiti napeklan a kriminal. Nasakit ken bastos ti  panagsasao dagiti kriminal kadakuada. Nupay kasta, ti pannakaibaludda ti nanglukat iti gundaway tapno makaipaayda iti panangsaksi. Kinuna ti maysa a sister: “Naipanak iti selda nga ayan dagiti nakapatay, ngem naibagak kadakuada ti maipapan iti kinapudno. Nasdaawda no apay nga addaak sadiay, ken adu ti saludsodda maipapan iti patpatiek. Adda pay nagdamag kaniak, ‘Apay a nakaragragsakka?’”

Sri Lanka: Uppat a kakabsat a naglugan iti bus a mapan mangasaba iti di maas-asak a teritoria

Inawat ti Korte Suprema ti Sri Lanka ti inyulitayo a darum kontra kadagiti polis gapu iti panangsalungasingda iti kalintegan dagiti kakabsat idi imbaludda ida uray no awan ti pangibatayanda. Nakapila pay laeng ti kaso.

Panangtulong iti Maysa a Babai a Naidalit iti Pagiddaan

Ni Michiko, a payunir idiay Japan, ket adda iyad-adalanna a baket iti maysa nga ospital babaen iti sign language. Dinamagna kadagiti empleado no adda pay dagiti pasiente a mabalinna a kasarita. Idi agangay, naam-ammona ni Kazumi a maysa a pasiente a makangngeg ngem saan a makasao. Naidalit ni Kazumi iti pagiddaan kalpasan a naaksidente iti lugan idi agtawen iti 23, ken sipud idin, saanen a makatilmon iti makan wenno uray makainum. Adu ti saludsodna ket dagus nga immanamong a mayadalan iti Biblia.

Japan: Maragragsakan ni Kazumi a mangaramid kadagiti makaparegta a surat

No agsaludsod ni Michiko, itudo ni Kazumi ti sungbatna iti parapo wenno isuratna. Idi addan selpon ni Kazumi, binigat nga usigenda ken Michiko ti inaldaw a teksto. Uray no kimmapuy ti salun-atna, nagtultuloy a bimmileg ti espiritualidadna ket imbagana a kayatnan ti agbalin a Saksi ni Jehova. Idi agtawen iti 61, kalpasan ti 13 a tawen a  panagadalna iti Biblia, nagbalinen a di bautisado nga agibumbunannag ni Kazumi.

Gapu ta naidalit iti pagiddaan, nangaramid ti kongregasion iti urnos tapno mangngegan ni Kazumi dagiti gimong ken asamblea. Bayat ti gimong, ibasa ti nagduduma a sister dagiti insaganana a komento.

Mangar-aramid ni Kazumi kadagiti makaparegta a personal a surat para kadagiti agad-adal iti Biblia a makigimgimong. Kaskasabaanna dagiti empleado ti ospital ken dagiti mangbisbisita kenkuana. Ibagbagana kadakuada, “No agadalka iti Biblia, rumagsakka.”

Naammuan ti Maysa a Monghe ti Kinapudno

Iti maysa a pagilian iti Southeast Asia, maysa a sister ti napan iti optician iti maysa nga ospital ket adda monghe  a naam-ammona. Insaludsod ti sister kenkuana, “Kayatmo kadi a saankan a pulos agsakit ken agbiagka iti agnanayon iti napintas a lugar?” Nagmayat ti panagsaritada ket inikkan ti sister ti monghe iti broshur a Listen to God. Inted ti monghe ti numero ti teleponona, sa inted met dayta ti sister iti maysa a brother. Di nagbayag, kinontak ti brother ti monghe ket inawisna iti espesial a palawag. Nagustuan unay ti monghe ti gimong, aglalo ti panagkanta iti kanta ti Pagarian, ken naapresiarna unay ti naayat a panangabrasa kenkuana dagiti kakabsat.

Idi dinamag ti monghe no adda unibersidad wenno seminario dagiti Saksi, inlawlawag ti brother a mangyad-adaltayo iti Biblia ket dinamagna no kayatna ti makipagadal kenkuana. Iti simmaruno a lawas, naisaganan ti monghe ti kapitulo 1 ti libro nga Ania a Talaga ti Isursuro ti Biblia? Intultuloyna ti makipagadal, immatender kadagiti gimong, ken agkomkomento metten iti Panagadal iti Pagwanawanan.

Idi immatender ti monghe iti maysa nga asamblea sirkito, inawis ti pannakabagi ti sangay a bumisita iti Bethel. Iti simmaruno a lawas, nagbiahe ti monghe iti agarup 10 nga oras a napan iti Bethel, ket siaayat nga inawatda. Iti ngudo ti Pebrero 2015, nagikkat isuna a monghe ken intultuloyna ti makipagadal iti Biblia ken makiraman iti gimong.

Napukaw, Ngem Nabirokan

Nabiit pay a naibaon ti maysa nga agassawa a payunir iti makin-amianan a daya ti India. Adun a tawen a saan a maikaskasaba ti naimbag a damag sadiay. Nakasarak ti agassawa iti adu nga interesado isu a kayatda ti makabirok iti lugar a mabalin a paggimongan. Bayat a magmagnada a mapan mangyadal, adda nakitada a maibangbangon a patakder ket napanunotda ti agsaludsod  maipapan iti dayta ngem nagtultuloyda latta a nagna. Saanda pay a nakaadayo idi napanunotda ti agsubli. Iti likud ti patakder, adda baket a nakasaritada ket inyam-ammoda ti bagida kas Saksi ni Jehova. Naragsakan ti baket. “Maysaak met a Saksi ni Jehova,” kinunana, ken siraragsak a pinastrekna ida iti balayna. Impakitana kadakuada ti koleksionna a literatura manipud 1970’s ken 1980’s. Nakipagadal idi ti baket iti Biblia kadagiti payunir 30 a tawenen ti napalabas ken nakigimgimong uray no busbusoren ti asawana. Kombinsido a nabirokannan ti kinapudno ngem naisardeng ti panagadalna idi pimmanaw dagiti payunir iti lugarda. Simrek iti nadumaduma a  relihion ti amin nga annakna, ngem dina kayat ti sumrek iti aniaman kadagita.

India: Maysa nga interesado a baket a mangipakpakita iti koleksionna a literatura manipud 1970’s ken 1980’s

Iti laeng nabiit, pilpiliten isuna dagiti annakna a makimiembro iti Iglesia Katolika tapno maipaayanto iti serbisio ti pumpon dagiti Katoliko inton matay. Pinilit pay ti adingna nga itugot iti simbaan tapno agpamiembro, ngem idi addadan iti dalan, nagkaro ti trapik isu a nagawidda. Imbaga ti adingna nga agsublida kabigatanna, ngem nagsakit ti baket. Iti kamalman dayta met laeng nga aldaw, nabirokan ti agassawa ti interesado a baket! Ita, agad-adal manen ti baket iti Biblia, makigimgimong, ken parparegtaenna dagiti annak ken appokona a makipagadal met.