Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

Burundi: Ni Nolla a mangipakpakita iti kopia Ti Pagwanawanan iti dua a lallaki a dimmawat iti beggang

 SANGALUBONGAN A PANANGASABA KEN PANANGISURO

Africa

Africa
  • PAGILIAN 58

  • POPULASION 1,082,464,150

  • AGIBUMBUNANNAG 1,453,694

  • PANANGYADAL ITI BIBLIA 3,688,959

Panangasaba iti Motorsiklo

Benin: Us-usaren ni Désiré ti audio player iti pangpasahero a motorsiklona tapno maikasabana ti naimbag a damag kadagiti pasaherona

Magusgustuan dagiti tattao kadagiti siudad iti makin-abagatan a paset ti Benin ti aglugan iti pangpasahero a motorsiklo nga aw-awaganda iti zem. Ni Désiré, a maysa nga auxiliary pioneer, kinabitanna ti motorsiklona iti audio player ken dua a loudspeaker a nakatutok iti pagtugawan ti pasahero. Agiple-play ni Désiré kadagiti nairekord a publikasion ken drama iti Biblia. Kaaduanna a no adda aglugan, apagbiit laeng, agdengdengngegen  a naimbag. Maimasan ti adu ti agdengngeg isu nga inton makadanondan iti destinasionda, ibaybayagda wenno saanda pay ketdin a kayat ti bumaba agingga a saan a malpas ti rekording. Kinuna ni Désiré: “Siempre, kayatko nga agbayad ken bumabadan tapno makabirokak iti sabali a pasahero, ngem ammok a napatpateg ti pannakangngegda iti naimbag a damag ngem iti panagbirokko iti kuarta. Makaipaimaak pay no kua iti adu a literatura.”

Porsegido nga Ubing

Innem ti tawen ni Nolla ken aggigian iti katurturodan ti Burundi a kadua ti pamiliana. Naminsan, aglutlutoda iti paglutuan nga uging idi immasideg ti dua a lalaki nga agtrabtrabaho iti kaabayda a balay ket dimmawatda iti beggang nga usarenda a pagpasged. Ni Nolla, a saan pay nga ages-eskuela, ti agbambantay iti paglutuan idi immasideg dagiti lallaki. Impalubosna a mangalada iti beggang. Di nagbayag, nalabsan ni Nolla dagiti lallaki ket nakitana a pinagsindida ti beggang iti sigarilio. Nagmadi ti riknana, ket kinunana, “No ammok laeng a pagsindiyo ti beggang iti sigarilio, dikay koma inik-ikkan.” Idi kuan, nalagipna nga adda nakitana a magasin iti Kingdom Hall nga addaan iti ladawan ti sigarilio. Nagtartaray a napan iti Kingdom Hall ket nangala iti dua a kopia ti Hunio 1, 2014, a ruar ti Pagwanawanan, a maipapan iti panagsigarilio ti linaonna. Nagsubli ni Nolla kadagiti lallaki ket intedna dagiti magasin ken imbagana a basaenda a dagus. Idi agangay, nakitana manen ida ket inikkanna ida iti imbitasion para iti rehional a kombension. Nagsiddaaw dagiti lallaki iti panagporsegi ti ubing isu nga immatenderda iti  kombension iti dua nga aldaw. Bayat ti pangngaldaw iti kombension, nakita ida ni Nolla ket inawisna ida a mangan a kadua ti pamiliana. Nagustuan dagiti lallaki ti nakita ken nangngegda iti kombension isu a nagpayadalda iti Biblia.

Panangasaba Kadagiti Pagbaludan

Ikaskasaba dagiti panglakayen idiay Liberia ti mensahe ti Pagarian kadagiti nadumaduma a pagbaludan. Kinuna ni Yves, a maysa nga special pioneer iti kabesera a Monrovia: “Idi Marso, tallo a balud ti nakualipikar kas di bautisado nga agibumbunannag isu nga innemen ti agibumbunannag iti Monrovia Central Prison.” Kasanoda a mangasaba? “Agkikitada iti kada Mierkoles ken Sabado tapno mangasaba,” inlawlawag ni Yves. “Kalpasanna, mapalubosanda a mapan kadagiti selda tapno ipakaammoda kadagiti padada a balud ti namnama manipud iti Biblia.” Mayad-adalanen iti Biblia ti adu a balud ken umat-atenderdan kadagiti gimong a maar-aramid iti pagbaludan. Nagpalawag iti dayta a pagbaludan ti maysa a pannakabagi ti sangay ket 79 a balud ti immatender. Regular met a maikonkondukta dagiti klase iti panagadal iti Biblia iti innem a sabali pay a pagbaludan ket addan nagbalbaliwan dagiti balud.

“Kasapulanmi Unay ti Tulong”

Kasta la unay ti panangikagumaan dagiti kakabsat a tumulong kadagiti interesado iti adayo a lugar nga umatender iti Memorial. Kas pagarigan, dagiti immuna a naggigian iti makin-abagatan a paset ti Africa ket dagiti San, a maaw-awagan met iti Bushmen. Simple laeng idi ti panagbiagda ken agakar-akarda iti pagyanan tapno aganup ken agbirok iti  makan. Iti Memorial idi 2015, inyurnos ni Glenn, maysa nga special pioneer iti makin-amianan a paset ti Namibia, a maselebraran ti Memorial iti maysa a nasulinek a purok dagiti San, a 270 a kilometro iti daya ti Rundu. Dayta ti maikadua a pannakaselebrar ti Memorial iti dayta a lugar. Kadagita a dua nga okasion, impalubos dagiti autoridad iti purok nga usaren dagiti Saksi ni Jehova ti korte nga awan bayadanda. Adda 232 nga immatender uray napigsa ti tudo sakbay ken bayat ti Memorial. Ti lengguahe dagiti Bushmen iti dayta a lugar ket Khwe—lengguahe nga adu ti nalitik nga unina. Naipatarus iti Khwe ti Ingles a palawag. Gapu ta awan ti Biblia a Khwe, nausar ti projector a mangipabuya kadagiti dekolor nga slide tapno mailawlawag dagiti teksto a kas iti Isaias 35:5, 6. Adda sumagmamano nga iyad-adalan ni Glenn iti dayta a lugar. Kinunana: “Iti napalabas a dua a tawen, binulan a bumisbisitaak ditoy. Agyanak iti tent iti sumagmamano nga aldaw. Nabuntog ti panagrang-ay gapu iti lengguahe ken kinaadayona. Kasapulanmi unay ti tulong. Idi nakisaritaak kadagiti autoridad maipapan iti Memorial ita a tawen, indawat ti maysa a miembro ti komite a mangidadaulo iti komunidad a mangibangonkami iti lugar a pagdaydayawan ditoy. Imbagana a mangted ti komite iti daga a pagipatakderan ken ibangonda ti patakder iti bukodda a gasto! Ti laeng aramidenmin ket mangibaon iti ‘pastor’ wenno uray mangsanay laeng iti maysa kadakuada nga agbalin a pastor!”

Namibia: Dua nga agibumbunannag a maragragsakan a mangipakpakaammo iti naimbag a damag iti babai a Himba