Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

 INDONESIA

Sanga nga Opisina iti Tangatang

Sanga nga Opisina iti Tangatang

Dagiti opisina iti maika-31 a kadsaaran

Idi 2008, immabut iti 21,699 ti kangatuan a bilang dagiti agibumbunannag idiay Indonesia. Naileten dagiti pasilidad iti sangay, ken gapu ta naibangon dagita bayat ti pannakaiparit, nalemmeng ti lokasionna. Talaga a kasapulan ti dakdakkel a sangay nga as-asideg iti Jakarta.

 Kalpasan ti agarup dua a tawen, adda ginatang dagiti kakabsat a naiduma unay iti dati a sangay—ti maika-31 a kadsaaran ti maysa a moderno a patakder nga 42 ti kadsaaranna iti asideg iti sentro ti Jakarta. Ginatangda met ti 12 a kadsaaran ti maysa a patakder iti asidegna, a pagyanan ti 80 a Bethelite wenno nasursurok pay. Gimmatangda pay iti lima ti kadsaaranna a patakder para kadagiti departamento ti Bethel Home.

Aggigian dagiti Bethelite kadagiti 12 a kadsaaran

Nagtinnulong ti maysa a grupo dagiti construction servant a naggapu iti nagduduma a pagilian ken dagiti kontraktor tapno baliwanda ti disenio dagiti opisina ken ti pagyanan dagiti Bethelite. “Maulit-ulit a tinulongannakami ni Apo Jehova kadagiti problema a nagrigat a solusionan,” kinuna ti construction overseer a ni Darren Berg. “Kas pagarigan, kayatmi idi ti mangikabil iti moderno a wastewater treatment plant, ngem saan a pamiliar dagiti autoridad iti dayta isu a saanda nga aprobaran. Ngem inyasideg ti maysa nga inheniero a kabsat ti problema iti maysa a nangato nga opisial. Dagus nga inaprobaranna ti kiddawmi nga imbagana nga agtalek iti rekomendasion ti kabsat.”

“Ditayon aglemlemmeng. Makitkitan dagiti tattao dagiti Saksi ni Jehova. Mabigbigdan a ditay pulos isardeng ti trabahotayo ditoy”

Naidedikar dagiti baro a pasilidad ti sangay idi Pebrero 14, 2015. Ni Anthony Morris III, a miembro ti Bagi a Manarawidwid, ti nagpalawag iti dedikasion. Kinuna ti maysa a miembro ti Komite ti Sangay a ni Vincent Witanto Ipikkusuma: “Addatayon iti nagbaknang a distrito nga ayan dagiti dadakkel a korporasion iti Indonesia. Ditayon aglemlemmeng. Makitkitan dagiti tattao dagiti Saksi ni Jehova. Mabigbigdan a ditay pulos isardeng ti trabahotayo ditoy.”

Komite ti Sangay, agpakannawan: Budi Sentosa Lim, Vincent Witanto Ipikkusuma, Lothar Mihank, Hideyuki Motoi

 “Agumaka a Mangasaba Ditoy!”

Iti nabiit pay a tawtawen, umad-adu a kakabsat manipud iti nadumaduma a pagilian ti umak-akar idiay Indonesia. “Dakkel ti maitultulong dagiti boluntario a naggapu iti sabali a pagilian kadagiti nasion a dakdakkel ti panagkasapulanna a kas iti ayanmi,” kinuna ni Lothar Mihank. “Tugottugotda dagiti kapadasanda, ti kinanataenganda iti naespirituan, ken ti regtada iti kongregasion a napananda. Tultulonganda met dagiti kakabsat tapno mas maapresiarda ti sangalubongan a panagkakabsat.” Ania ti nangtignay kadakuada nga umakar? Ania ti napasamak iti panagboluntarioda? Basaem ti dadduma kadagiti komentoda.

Boluntario Manipud iti Sabali a Pagilian

1. Janine ken Dan Moore

2. Mandy ken Stuart Williams

3. Casey ken Jason Gibbs

4. Mari (makinkannawan a sango) ken Takahiro Akiyama (makinkannawan a likud)

Inyestoria da Jason ken Casey Gibbs a taga-United States: “Kinitami iti Tinawen a Libro dagiti ratio ti agibumbunannag iti populasion ti pagilian ket naammuanmi a maysa ti Indonesia kadagiti addaan iti kangatuan a ratio iti intero a lubong. Imbaga kadakami ti dadduma a kakabsat nga agbolboluntario iti sabali a pagilian nga adu pay ti mabalin a matulongan iti Indonesia. Isu a timmawagkami iti sangay ti Indonesia, ket imbagada a mabalinmi ti agboluntario iti Bali. Mangrugrugi pay laeng idi iti Indonesia ti panangasaba kadagiti  makapagsao iti Ingles, isu a makatulongkami a dagus. Maysa laeng a tawen ti planomi idi nga agboluntario, ngem nakatallo a tawenkamin. Damo pay laeng a mangngeg ti kaaduan kadagiti makaskasabaanmi ti maipapan kadagiti Saksi ni Jehova. Nakamaymayat ti mangasaba ditoy!”

Kinuna da Stuart ken Mandy Williams, maysa a nataengan a pagassawaan a taga-Australia: “Kayatmi a makasabaan dagiti tattao a mawaw iti kinapudno, isu a nagdesisionkami nga umakar ditoy Indonesia. Ginasut nga ages-eskuela iti unibersidad iti Malang, East Java, nga Ingles ti pagsasaona, ti nakasabaanmi ket talaga nga interesadoda iti naimbag a damag. Magusgustuanda met ti website a jw.org! Nagragsak ti mangasaba ditoy.”

Inyestoria da Takahiro ken Mari Akiyama, a payunir idiay Yogyakarta iti isla ti Java: “Nataltalged ti riknami ditoy ngem idi addakami idiay Japan. Nasingpet ken nadayaw dagiti tattao. Adu ti interesado maipapan iti dadduma a relihion, aglalo dagiti agtutubo. Naminsan, idi nag-public witnessing-kami, nakaipaimakami iti agarup 2,600 a magasin iti lima laeng nga oras.”

Kinuna da Dan ken Janine Moore, maysa a pagassawaan a dandanin 60 ti tawenda: “Aribungbongandakami dagiti tattao no mangasabakami. Isemanmi ida ket umisemda met. Iti damo, agusiosoda sa intono kuan, aginteresda sa magagaranda. No adda ipakitami a teksto, kuna ti dadduma, ‘Mabalin nga isuratko?’ Masmasdaawda iti sirib ti Dios nga adda iti Biblia. Makatawenmin ditoy, ket pagbabbabawyanmi ta dimi insapsapa ti immay. Agbirbirokkami idi iti teritoria nga adu pay ti saan a nakangngeg iti maipapan ken Apo Jehova, ket nabirokanmin dayta!”

Idi 2009, simmangpet da Misja ken Kristina Beerens idiay Indonesia kas misionero ken agserserbida itan iti trabaho a panagdaliasat. Kinunada: “Talaga a dumngeg dagiti tattao iti ikaskasabatayo, uray iti Madura Island, East Java, a  maysa kadagiti lugar iti Indonesia nga ayan dagiti napeklan a Muslim. Isardeng dagiti tattao ti luganda tapno dumawatda kadagiti magasin. Kunada: ‘Muslimak, ngem maragragsakanak a mangbasbasa kadagitoy a magasin. Mabalin nga iyalaak met dagiti gagayyemko?’ Agumaka a mangasaba ditoy!”

Purawen ti Talon Maipaay iti Pannakaani

Agarup 60,000,000 ti populasion ti Indonesia idi simmangpet ni Frank Rice idiay Jakarta idi 1931. Ita, ngannganin 260,000,000 ti populasion ti Indonesia—ti maikapat a kadakkelan ti populasionna a pagilian iti intero a lubong.

Nagdakkel met ti immaduan ti bilang dagiti Saksi ni Jehova idiay Indonesia. Idi 1946, kalpasan ti Gubat Sangalubongan  II, adda laeng 10 a matalek nga agibumbunannag, ngem ita, addan nasurok a 26,000. Talaga a bembendisionan ni Jehova ti trabaho! Adda 55,864 nga immatender iti Memorial idi 2015, a mangipakita nga adu pay ti mayapon iti ili ni Jehova.

Kinuna ni Jesus: “Wen, dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” (Mat. 9:37, 38) Kasta ti ar-aramiden dagiti adipen ni Jehova idiay Indonesia. Determinadoda nga agtultuloy a mangikagumaan a tumulong iti pannakasantipikar ti naindaklan a nagan ni Jehova iti daytoy adu ti islana a pagilian.—Isa. 24:15.

Ammuem ti Ad-adu Pay

Kasano a Maisursurat ken Maipatpatarus Dagiti Literatura Dagiti Saksi ni Jehova?

Mangpatpataudkami kadagiti literatura iti nasurok a 750 a lengguahe. Apay nga ar-aramidenmi daytoy?