Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

Panangasaba iti paglakuan idiay Jakarta

 INDONESIA

Agtultuloy a Rumangrang-ay ti Trabaho

Agtultuloy a Rumangrang-ay ti Trabaho

Idi naammuan dagiti lider ti Kakristianuan a naikkan dagiti Saksi ni Jehova iti wayawaya iti panagdayaw, naladingitanda iti kasta unay. Nangangay iti seminar idiay Jakarta ti nasurok a 700 a lider ti pito a sekta ti Protestante tapno sugsoganda ti gobierno nga isublida ti pannakaiparit dagiti Saksi. Ngem impatangken ti gobierno ti desisionna.

In-inut a nagwaras iti intero a pagilian ti damag a saanen a maparitan dagiti Saksi. Nagsurat ti adu nga interesado iti sangay a dumawdawatda iti literatura wenno mayadalanda iti Biblia. Idi 2003, nasurok nga 42,000 ti immatender iti Memorial. Nasurok a doble dayta iti bilang dagiti agibumbunannag iti pagilian. Nganngani 10,000 ti immatender iti asamblea idiay Jakarta, a pakairamanan ti maysa a nangato nga opisial iti Department of Religious Affairs. Nagbilib ti opisial idi nakitana dagiti ubbing ken natataengan nga isursurotda iti Bibliada dagiti maibasbasa a teksto. Imbagana kadagiti kakabsat a siguraduenna a mailinteg dagiti saan a pudno nga impormasion a maipadpadamag maipapan kadagiti Saksi ni Jehova.

Gapu ta saanen a maiparit ti trabaho, makasublin dagiti misionero idiay Indonesia. Dagiti immuna a misionero a nakasubli ket da Josef ken Herawati Neuhardt * (taga-Solomon Islands), Esa ken Wilhelmina Tarhonen (taga-Taiwan), Rainer ken Felomena Teichmann (taga-Taiwan), ken Bill ken Nena Perrie (taga-Japan). Simmaruno a simmangpet dagiti misionero a kagradgraduar iti Gilead. Naibaonda idiay North Sumatra, Kalimantan, North Sulawesi, ken dadduma pay nga adayo a lugar.

“Maragragsakanak a tumultulong kadagiti estudiante tapno mapasayaatda ti abilidadda a mangisuro ken makisarita kadagiti tattao.”—Julianus Benig

 Idi 2005, nangangay ti sanga nga opisina kadagiti klase para iti dua a baro a teokratiko nga eskuelaan. Kinuna ti maysa kadagiti instruktor iti Ministerial Training School (maawagan itan iti School for Kingdom Evangelizers) a ni Julianus Benig, “Maragragsakanak a tumultulong kadagiti estudiante tapno mapasayaatda ti abilidadda a mangisuro ken makisarita kadagiti tattao ken tapno adu ti maaramidanda para iti organisasion.” Adu a nagraduar iti daytoy nga eskuelaan ti agserserbi itan kas special pioneer wenno manangaywan iti sirkito. Kaaduan a kakabsat a nageskuela iti umuna a klase ti School for Traveling Overseers * ket datin a nasanay idi maiparparit pay laeng ti trabaho. Tinulongan ida ti baro nga eskuelaan a mangibaklay iti responsabilidadda idi saanen a maiparit ti trabaho. Kinuna ni Ponco Pracoyo, a maysa kadagiti estudiante iti umuna a klase: “Tinulongannak ti eskuelaan nga agbalin a mas mannakipagrikna  ken mas responsable iti trabahok kas manangaywan iti sirkito. Talaga a makapabang-ar ken makaparegta dayta!”

Naibangon Dagiti Kasapulan a Kingdom Hall

Bayat ti 25 a tawen a pannakaiparit, kaaduan a kongregasion idiay Indonesia ti naggigimong kadagiti babassit a balay. Manmano laeng a kongregasion ti makaibangon iti Kingdom Hall, ken kasla imposible ti makaala iti building permit para iti baro a lugar a pagdaydayawan. Gapu ta nagpartak a dimmakkel ti adu a kongregasion, nangbukel ti sanga nga opisina iti Kingdom Hall Construction Desk (maawagan itan iti Local Design/Construction Department) tapno maibangon dagiti kasapulan a Kingdom Hall.

Ti Nias Island idiay North Sumatra ti maysa kadagiti kaunaan a nabenepisiaran iti daytoy a baro a programa a panagibangon. Kinuna ti maysa a kabsat a nabayagen a naikameng iti Gunungsitoli Congregation a ni Haogo’aro Gea: “Napalalo ti ragsakmi idi nangngegmi a maibangonankami iti baro a Kingdom Hall. Nangipatulod ti sanga nga opisina iti pito a construction volunteer a mangiwanwan iti proyekto. Nalpas a naibangon ti Kingdom Hall idi 2001.” Inyestoria ni Faonasökhi Laoli, a maysa a miembro ti local building committee: “Babassit a balay ti paggigimonganmi idi isu a nababa ti panagkita dagiti tattao kadagiti Saksi ni Jehova. Agarup 20 laeng idi ti makigimgimong, ngem idi naibangonmin ti Kingdom Hall, immabuten iti agarup 40. Iti uneg laeng ti 12 a bulan, ngimmato iti nasurok a 500 a porsiento ti makigimgimong. Ti lugar a pagdaydayawanmi ti kapintasan a patakder iti lugarmi, ken nangaton ti panagkita dagiti tattao kadagiti Saksi ni Jehova.”

Kingdom Hall idiay Bandung

Idi 2006, rinugian dagiti kakabsat idiay Bandung, West Java, ti mangbirok iti lote a pangipatakderanda iti kaunaan a Kingdom Hall iti siudad. Kinuna ti maysa a panglakayen a nagserbi iti building committee a ni Singap Panjaitan: “Dose a bulan a nagbirbirokkami iti nasayaat a lote. Ngem  sakbay nga ikkandakami dagiti autoridad iti building permit, masapul nga aprobaran ti uray 60 laeng a saan a Saksi nga aggigian iti asideg ti lote ti proyekto. Inaprobaran dayta ti 76 a tao, a pakairamanan ti maysa a naimpluensia a babai a bumusbusor idi damo. Idi nalpasen ti proyekto, inawismi dagiti kaarrubami ken ti mayor ti Bandung nga agpasiar iti Kingdom Hall. Kinuna ti mayor, ‘Daytoy a nadalus ken naurnos a lugar a pagdaydayawan ti masapul a tuladen ti amin a simbaan.’” Naidedikar daytoy dua ti kadsaaranna a Kingdom Hall idi 2010.

Manipud idi 2001, nasurok a 100 a Kingdom Hall ti naibangonen idiay Indonesia, ngem adu pay ti kasapulan.

^ par. 3 Masarakan iti Pebrero 2011 a ruar ti Agriingkayo! ti pakasaritaan ni Herawati Neuhardt.

^ par. 1 Maawagan itan iti School for Circuit Overseers and Their Wives.