Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

Maigiddan dagiti asamblea kadagiti seremonia iti kasar

 INDONESIA

Saanda a Binaybay-an ti Panagtataripnongda

Saanda a Binaybay-an ti Panagtataripnongda

Uray no naipariten ti trabaho, kaaduan a kongregasion ti naggigimong latta kadagiti balay. Ngem tapno awan ti makadlaw, adu a kongregasion ti saan a nagkanta kadagiti kanta ti Pagarian. Rinaut dagiti autoridad ti dadduma kadagiti naggigimonganda, ngem kalmado latta dagiti kakabsat.

Kaaduanna a dagiti asamblea ket igiddan dagiti kakabsat kadagiti kasar wenno reunion ti pamilia. Kinuna ni Tagor Hutasoit: “Agparehistro dagiti agkasar ken mangalada iti police permit tapno mapalubosanda a mangangay iti dakkel a kasar. No madama ti kasar, agtugaw dagiti nobio ken nobia, dagiti nagannak, dagiti abay, ken dadduma pay, iti entablado bayat nga iparang dagiti kakabsat dagiti palawag a naibatay iti Biblia.”

Iti maysa nga asamblea, kinasarita ti maysa a polis ni Tagor nga is-isuda.

“Dua wenno tallo laeng nga oras ti kaaduan a kasar. Apay a no dakayo ket agmalmalem?” insaludsod ti polis.

“Adu ti problema dagiti dadduma nga agkasar isu a kasapulanda ti adu a makatulong a balakad manipud iti Sao ti Dios,” insungbat ni Tagor.

“Sabagay,” intung-ed ti polis.

 Inggiddanda iti adu a kasar ti dadduma a paset ti 1983 a “Panagkaykaysa iti Pagarian” a Kombension Distrito iti dakkel nga sports stadium idiay Jakarta. Nganngani 4,000 a kakabsat ken interesado ti immatender, ken 125 ti sililimed a nabautisaran sakbay ti programa. Idi saan unayen a nakaro ti pannakaiparit, nangangay dagiti kakabsat kadagiti daddadakkel a kombension, a maysa kadagita ket nasurok a 15,000 ti immatender.

 Panangibangon iti Sanga nga Opisina Bayat ti Pannakaiparit

Idi 1980’s ken 1990’s, namin-adu nga indawat ti sanga nga opisina iti gobierno nga ikkatendan ti pannakaiparit kadagiti Saksi ni Jehova. Dagiti kakabsat iti sabali a pagilian nagsuratda met iti gobierno ti Indonesia ken kadagiti embahadorda tapno saludsodenda no apay a maparparitan dagiti Saksi idiay Indonesia. Pabor ti adu nga opisial a maikkaten ti pannakaiparit, ngem maulit-ulit a kinontra ti impluensiado a Directorate General of Christian Community Guidance dagiti panangikagumaanda.

Idi 1990, nagdesision dagiti kakabsat a baka mabalin nga agibangonda iti baro a sanga nga opisina iti nalemmeng a lugar. Iti dayta met la a tawen, inaprobaran ti Bagi a Manarawidwid ti pannakagatang ti lote nga asideg iti Bogor, maysa a bassit a siudad nga adda iti agarup 40 a kilometro iti abagatan ti Jakarta. Ngem bassit laeng kadagiti lumugar a kakabsat ti addaan iti paglaingan (skill) iti panagibangon. Kasanoda ngarud a makaibangon?

Timmulong dagiti kakabsat manipud iti nadumaduma a pagilian tapno makaibangonda. Inaramid ti Brooklyn Construction Office ken ti Regional Engineering Office idiay Australia dagiti plano dagiti patakder. Iti uneg ti dua a tawen a pannakaaramid ti proyekto, timmulong ti agarup 100 a boluntario manipud iti sabali a pagilian nga addaan kadagiti kasapulan a paglaingan.

Kinuna ni Hosea Mansur, maysa nga Indonesian a kabsat a makisarsarita kadagiti nagduduma nga opisial: “Idi nakita dagiti opisial a Muslim ti initial-ko nga H.M. iti hard hat-ko, pinanunotda a ti H ket ‘Hājjī,’ a nangato a titulo dagiti mapmapan idiay Mecca, isu a resrespetuendak unay. Gapu iti dayta, saanak a narigatan a mangorganisar iti trabaho.”

Naibangon daytoy a sanga nga opisina bayat ti pannakaiparit

 Idi Hulio 19, 1996, naidedikar ti baro a sanga nga opisina. Ni John Barr, a miembro ti Bagi a Manarawidwid, ti nangiparang iti palawag ti dedikasion. Adda 285 nga immatender a pakairamanan ti 118 a Bethelite, special pioneer, ken dagiti agdama ken dati a misionero manipud iti nagduduma a pagilian ken ti 59 a miembro ti pamilia ti Bethel iti Indonesia. Iti simmaruno a dua nga aldaw kalpasan ti dedikasion, naangay ti “Mensahero ti Nadiosan a Talna” a Kombension Distrito idiay Jakarta nga inatenderan ti 8,793 a delegado.

Insalakan ni Jehova ti Ilina

Idi 1998, nagikkat ti nabayagen a Presidente iti Indonesia a ni Soeharto (Suharto), isu a masuktanen ti turay.  Gapuna, ad-adda pay a nagporsegi dagiti kakabsat a mangilaban iti pannakaikkat ti pannakaiparit ti trabaho dagiti Saksi.

Idi napan ti Indonesian Secretary of State, a ni Mr. Djohan Effendi, idiay New York idi 2001, nagpasiar idiay Brooklyn Bethel ken nakasaritana ti tallo a miembro ti Bagi a Manarawidwid. Nagbilib iti nakitana, ken naibagana a nasayaat ti reputasion dagiti Saksi ni Jehova iti intero a lubong. Pabor ni Mr. Effendi a maikkat ti pannakaiparit ti trabaho, ngem imbagana a nakadepende ti desision iti attorney general ti Indonesia a ni Mr. Marzuki Darusman.

Pabor met ti attorney general a maikkaten ti pannakaiparit ti trabaho, ngem itantantan dagiti bumusbusor nga opisial iti departamentona ti pannakaipatungpal dayta ta ekspektarenda a dandanin masuktan isuna. Kamaudiananna, idi Hunio 1, 2001, napaayaban ni Tagor Hutasoit iti opisina ti attorney general. “Agarup 25 a tawenen ti napalabas, iti dayta met la nga opisina, nayawat kaniak ti dokumento a mangibagbaga a maipariten ti trabaho dagiti Saksi ni Jehova,” kinuna ni Tagor. “Ngem iti daytoy nga aldaw, nga isu met ti maudin nga aldaw a panagtrabaho ti attorney general, inyawatna kaniak ti dokumento a mangibagbaga a maipalubosen ti trabaho.”

Idi Marso 22, 2002, inrehistron ti Department of Religious Affairs ti organisasion dagiti Saksi ni Jehova iti Indonesia. Kinuna ti director-general iti dayta a departamento kadagiti pannakabagi ti sangay: “Daytoy a dokumento ti pannakairehistro ket saannakayo nga ikkan iti wayawaya iti panagdayaw. Aggapu iti Dios dayta a wayawaya. Ibagbaga daytoy a dokumento a bigbigenen ti gobierno ti relihionyo. Addaankayon kadagiti kalintegan a kas iti dadduma a relihion, ken nakasagana ti gobierno a tumulong kadakayo.”