Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

 INDONESIA

Nagkauna a Pamay-an ti Panangasaba

Nagkauna a Pamay-an ti Panangasaba

Brodkas iti Radio

IDI 1933, inyurnos dagiti kakabsat a maibrodkas iti maysa nga estasion ti radio idiay Jakarta dagiti nairekord a lektiur ni Brother Rutherford iti Ingles. Naibasa met iti radio ti dadduma pay a lektiur iti Dutch babaen ti maysa a lalaki nga interesado iti kinapudno. Gapu kadagita, adu ti naginteres ken immadu ti literatura a naipaima dagiti kakabsat.

Idi naibrodkas ti napuersa a lektiur ni Brother Rutherford a “Ti Epekto ti Nasantuan a Tawen iti Talna ken Kinarang-ay,” nakapungtot dagiti panguluen dagiti Katoliko. * Babaen kadagiti aliporesda, indarumda ti mangsupsuplay iti nairekord a lektiur a ni Brother De Schumaker iti “panangpadakes, pananglais, ken panangbusor.” Inkagumaan nga indepensa ni Brother De Schumaker ti bagina, ngem namulta latta iti 25 a guilder * ken binayadanna ti nagasto iti korte. Naipadamag iti tallo a kangrunaan a diario ti pannakabistana, a nakaipaay iti ad-adda a panangsaksi.

 Ti Lightbearer

Idi Hulio 15, 1935, simmangpet ti barangay a Lightbearer idiay Jakarta kalpasan ti innem a bulan a panaglayagna para iti panangasaba manipud Sydney, Australia. Kukua daytoy ti Watch Tower Society ken 16 a metro ti kaatiddogna. Nakalugan iti dayta ti pito a nareregta a payunir, a determinado a mangikasaba  iti naimbag a damag iti intero nga Indonesia, Singapore, ken Malaysia.

Iti nasurok a dua a tawen, napan dagiti payunir a nakalugan iti Lightbearer kadagiti dadakkel ken babassit a pier iti intero nga Indonesia, ket adu a literatura a naibatay iti Biblia ti naipaima. Apagsangpet ti barangay kadagiti babassit a pier, “luktan metten dagiti tripulante ti transcription machine sada i-play ti maysa kadagiti lektiur ni J. F. Rutherford, ti presidente idi ti Watch Tower Society,” kinuna ni Jean Deschamp. “Nasdaaw dagiti Malay idi adda simmangpet a dakkel a barangay iti nasulinek a lugarda ken idi mangngegda ti napigsa a boses. Kasda la nakakita iti lugan a naggapu iti sabali a planeta.”

Gapu iti situtured a panangasaba dagiti kakabsat, nakapungtot dagiti lider ti relihion ket idi agangay, pinilitda dagiti autoridad a paritanda ti Lightbearer a sumrek iti adu a pier iti Indonesia. Idi Disiembre 1937, nagsublin ti Lightbearer idiay Australia. Dakkel ti naaramidan dagiti misionero idiay Indonesia gapu iti Lightbearer.

Dagiti tripulante ti Lightbearer

^ par. 2 Imbutaktak ti lektiur ni Brother Rutherford dagiti ulbod a sursuro ti Iglesia Katolika Romana ken dagiti dakes nga aramidna mainaig iti politika ken komersio.

^ par. 2 Katupag ti agarup ₱13,500 ita.