Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

 INDONESIA

Ti Bibelkring

Ti Bibelkring

ITI maudi a paset ti 1930’s, nabukel ti maysa a baro a narelihiosuan a grupo a naawagan iti Bibelkring (nagan iti Dutch a kaipapananna, “grupo dagiti estudiante ti Biblia”) iti aglawlaw ti Lake Toba idiay North Sumatra. Nabukel dayta a grupo idi nakaawat ti sumagmamano a maestro iti literatura manipud iti payunir, a mabalin a ni Eric Ewins, a nangaskasaba iti Lake Toba idi 1936. Gapu iti nabasa dagiti maestro, pinanawanda ti Batak Protestant Church ket nangbukelda kadagiti grupo iti panagadal iti Biblia iti pagtaengan. Dimmakkel ken nagwaras dagita a grupo ket immabut iti ginasgasut ti miembroda. *

Ni Dame Simbolon, a dati a miembro ti Bibelkring, ket kapammatiantayo itan

Gapu kadagiti nabasada iti literatura, naammuan dagiti nagkauna a Bibelkring ti sumagmamano a kinapudno iti Biblia. “Saanda a nagsaludo iti bandera ken saanda met a sinelebraran ti Krismas ken birthday. Adda pay dagiti nangasaba iti binalaybalay,” kinuna ni Dame Simbolon, dati a miembro a nangawat iti kinapudno idi 1972. Ngem gapu ta awan ti suporta ti organisasion ti Dios, di nagbayag, sinurotda ti bukodda a kapanunotan. “Naiparit kadagiti babbai ti ag-makeup, agisuot iti alahas ken moderno a bado, wenno uray agsapatos,” kinuna ni Limeria Nadapdap, maysa pay a dati a miembro ngem kapammatiantayo itan. “Maiparit pay kadagiti miembro ti mangala iti national ID, a namagpungtot iti gobierno.”

Idi agangay, nabingaybingay dagiti miembro ti Bibelkring iti babassit a grupo ket in-inut a bimmassit ti bilangda. Idi nagsubli dagiti payunir iti Lake Toba, adu a dati a miembro ti Bibelkring ti immawat iti kinapudno.

^ par. 1 Sigun iti dadduma a reperensia, natantia nga immabut iti rinibu ti miembro ti Bibelkring.