Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

Russia: Panangikasaba iti naimbag a damag idiay Moscow

 DAGITI TAMPOK ITI NAPALABAS A TAWEN

Legal Report

Legal Report

Legal a Pannakairehistro

Saanen a kasapulan nga agparehistro dagiti Saksi ni Jehova tapno maaramidda dagiti aktibidad ti relihionda. Ngem agparparehistrotayo tapno makagatang wenno makaabangtayo iti lugar a paggimongan ken tapno mapalubosantayo a mangiserrek kadagiti literaturatayo iti pagilian.

  • Idi 2004, pinasardeng dagiti korte iti Russia ti legal a korporasion nga us-usaren dagiti Saksi ni Jehova idiay Moscow. Kas resultana, kimmaro ti pannakabusor dagiti kakabsattayo sadiay. Rirriribuken ida dagiti polis ken mararaut ti dadduma kadakuada bayat a mangaskasabada. Kinanselar pay dagiti makinkukua kadagiti lugar a paggigimonganda ti kontrata ti panagabangda isu nga awanen ti paggimongan dagiti kakabsat. Iti maysa a desision nga impaulog ti European Court of Human Rights (ECHR) idi 2010, napaneknekan a sinalungasing ti Russia ti kalintegan dagiti Saksi  ni Jehova idiay Moscow ket naibilin a maisubli ti legal a korporasionda. Maragsakankami a mangireport nga idi Mayo 27, 2015, inrehistro ti Moscow Department of the Russian Federation Ministry of Justice ti baro a Local Religious Organization dagiti Saksi ni Jehova idiay Moscow.

Panagbayad iti Buis

Kaaduanna, dagiti legal a korporasion nga us-usaren dagiti Saksi ni Jehova iti intero a lubong ket saan a mabuisan, kas iti kaaduan a narelihiosuan nga organisasion ken charity. Ngem adda dagiti gundaway a pagbayaden latta ti gobierno dagiti legal a korporasiontayo iti buis.

  • Impatangken ti gobierno ti Sweden a ti Bethel ket maysa a negosio a dagiti Bethelite ti “empleadona” imbes a maysa a narelihiosuan a komunidad dagiti special full-time minister. Gapu iti dayta, inkalikagum ti estado nga agbayad ti Bethel ken dagiti Bethelite iti pinullo a ribu a euro kas buis. Tapno masolbar daytoy nga isyu, nangaramid dagiti kakabsat idiay Sweden iti petision kadagiti korte ti pagilian ken nangipasada iti innem nga aplikasion iti ECHR.

Neutralidad ken Panagkedked nga Agsoldado Maigapu iti Konsiensia

Tungtungpalen ti ili ni Jehova ti bilin ti Biblia a ‘pitpitenda dagiti kampilanda a pagbalinen a subsob ti arado’ ken saanda a ‘sursuruen ti pannakigubat.’ (Isa. 2:4) Neutralda latta uray no saan a mangipaay ti dadduma a gobierno iti alternatibo a serbisio para kadagiti sibilian.

  • Saan a bigbigen ti agdama a linteg ti South Korea ti kalintegan ti maysa nga agkedked nga agsoldado maigapu iti konsiensia. Iti napalabas nga 60 a tawen, nasurok a 18,000 a kakabsat a lallaki ti naibalud gapu ta dida kayat ti agsoldado. Nganngani tunggal Saksi iti pagilian ket addaan iti gayyem wenno kapamilia a nakabalud wenno napadasanna ti naibalud. Idi 2004 ken 2011, nagdesision ti Constitutional Court ti South Korea a ti kasta a pannakaibalud ket maitunos iti konstitusion. Ngem idi Hulio 2015, inusig manen ti Korte ti isyu. Ikarkararag dagiti Saksi ni Jehova iti intero  a lubong a masolusionan koman daytoy a nabayagen nga isyu tapno saanen a maibalud dagiti agtutubo a kakabsat a lallaki idiay South Korea gapu iti pammatida.

  • Idiay Eritrea, nasurok a 21 a tawenen a nakabalud ti tallo a Saksi ni Jehova a da Paulos Eyassu, Negede Teklemariam, ken Isaac Mogos gapu iti panagkedkedda nga agsoldado. Awan pay ti pormal a kaso a naidatag kontra kadakuada ken dida pay naikkan iti gundaway a mangidepensa iti bagida iti korte. Malaksid kadakuada, adda pay nasurok a 50 a kakabsat a lallaki ken babbai nga agtaltalinaed a matalek uray no naulpit ti pannakatratoda ken nagrigat ti kasasaadda iti pagbaludan. Agtalekkami a denggen ni Jehova ti panagsennaay dagiti naibalud gapu iti pammatida, ken tulonganna ida.—Sal. 79:11.

  • Idi Agosto 2014, bayat a maisagsagana dagiti soldado idiay Ukraine para iti gubat, napaayaban ni Vitaliy Shalaiko tapno agsoldado. Nagkedked ta saan nga ipalubos ti konsiensiana, ngem imbagana a situtulok a mangaramid iti alternatibo a serbisio para kadagiti sibilian. Gapu iti dayta, naidarum ni Brother Shalaiko, ngem nagdesision ti korte nga isu ket inosente. Idi nayapelar ti kaso iti nangatngato a korte, saan a nabalbaliwan ti desision ta sigun iti korte, saan a rason ti seguridad ti Estado tapno malimitaran ti kalintegan  dagiti umili, kasta met a “saan a rason ti seguridad ti pagilian tapno saanen a mabigbig ti kalintegan ti maysa nga agkedked nga agsoldado maigapu iti konsiensia.” Idi Hunio 23, 2015, nayapelar manen ti kaso iti High Specialized Court of Ukraine for Civil and Criminal Cases. Pinaboran dayta a Korte ti desision ti dua a nababbaba a korte. Gapuna, napatalgedan nga uray no agpegpeggad ti kinatalged ti pagilian, mabigbig latta ti kalintegan dagiti umili nga agkedked nga agsoldado maigapu iti konsiensia ken mapalubosanda a mangaramid iti alternatibo a serbisio.

Ukraine: Maragragsakan ni Vitaliy Shalaiko a makiraman iti ministerio

Kinuna ni Brother Shalaiko maipapan iti positibo a resulta ti kaso: “Napabilegak iti Jeremias 1:19. Nakasaganaak idi iti aniaman nga agbalin a resulta ti kaso—ti kapatgan ket agmatalekak ken Jehova. Ammok a dinak pulos baybay-an ken pabilgennak tapno makapagtalinaedak a matalek. Ngem diak pulos ninamnama a kastoy ti agbalin a resulta ti kaso. Naabsueltoak iti tallo a korte. Ken bayat ti pannakabistak, nariknak ti suporta dagiti kakabsat. Diak pulos narikna a nabaybay-anak.”

Neutralidad ken Nasionalistiko a Seremonia

Dagiti nasionalistiko a seremonia ket maysa pay a pakasubokan ti neutralidad dagiti Kristiano. Dagiti agtutubo ti kaaduanna a mabalin a maimpluensiaan a mangikompromiso iti kinamatalekda ken Jehova ta mabalin a piliten ida dagiti opisial ti eskuelaan nga agkanta iti national anthem wenno agsaludo iti bandera.

  • Idiay Karongi, a distrito ti Rwanda, inakusaran dagiti opisial ti eskuelaan ti sumagmamano nga estudiante a Saksi nga awan kano ti respetoda iti national anthem ta dida kayat a kantaen dayta. Naikkat dagiti estudiante iti eskuelaan ken naibaludda pay. Idi Nobiembre 28, 2014, inabsuelto ti Intermediate Court ti Karongi dagiti estudiante ken nagdesision ti Korte a saan a maibilang a kinaawan respeto ti saanda a panangkanta iti national anthem. Iti dadduma pay a pagilian iti Africa, kas iti Cameroon, the Democratic Republic of Congo, Equatorial Guinea, ken Malawi, maipaspasango dagiti agtutubo a Saksi iti kasta met laeng nga isyu, ken dadduma kadakuada ti naikkat met iti eskuelaan. Ikagkagumaan dagiti kakabsattayo kadagitoy a pagilian nga ilawlawag kadagiti  opisial ti gobierno ken kadagiti opisial ti eskuelaan ti neutral a takder dagiti Saksi ni Jehova.

  • Idi Disiembre 2013, saan nga inted ti maysa a pangpubliko nga eskuelaan idiay Lepaera, Honduras, ti high school diploma ti dua nga estudiante a Saksi gapu ta dida kayat a kantaen ti national anthem ken dida agsaludo iti bandera. Tapno masolbar daytoy, nakimiting ti dua nga abogado a Saksi ni Jehova iti pannakabagi ti Ministry of Education. Imbagada ti nagbalin a desision ti dadduma a pagilian kadagiti kasta a kaso a mangsuporta iti takder dagiti estudiante a Saksi. Nasingpet ti opisial ket immanamong a mangaramid dagiti estudiante ken dagiti nagannakda iti dokumento maipapan iti dayta ken ipasada iti legal director ti Secretariat of Education ti Honduras. Kalpasan a nausig ti naipasa a reklamo, nangipaulog ti legal director iti opisial a bilin idi Hulio 29, 2014, a mangibagbaga a ti edukasion ket “masapul a maipaay [iti amin] iti kagimongan nga awan aniaman a panangidumduma” ken imbilinna a maited ti diploma dagiti estudiante a Saksi.

Panangbusor ti Gobierno

Iti tunggal nasion, kas Saksi ni Jehova, tungtungpalentayo ti bilin ni Jesus nga ikasabatayo ti naimbag a damag ti Pagarian iti sabsabali, agtataripnongtayo a kadua dagiti kapammatiantayo, ken regular nga adalentayo ti Sao ti Dios. Tungtungpalentayo met ti bilin  ti Biblia nga itukittayo dagiti linteg ni Jehova iti puso dagiti annaktayo ken ‘umadayotayo iti dara.’ (Ara. 15:20; Deut. 6:5-7) No dadduma, busorendatayo ti gobierno gapu ta mabalin a saanda a maawatan no apay nga agtultulnogtayo kadagita a bilin.

  • Iti maysa a kaso idiay Florida, U.S.A., nagdesision ti maysa a hues a ti maysa nga ina a saan a Saksi ket isu laeng ti maikkan iti kalintegan a mangisuro kadagiti tallo nga annakna iti maipapan iti relihion. Ti ama, a maysa a Saksi, ket naparitan a mangisuro iti aniaman a maikontra iti sursuro ti Katoliko. Nagapelar ti ama, ket idi Agosto 18, 2014, binaliktad ti nangatngato a korte ti desision ti nababbaba a korte. Naibatay dayta a desision iti maulit-ulit a desision ti nangatngato a korte mainaig kadagiti umasping a kaso. Sigun iti korte, no ti maysa kadagiti nagsina nga agassawa, nga awan iti poderna ti anakna, ket kayatna a suruan ti anakna maipapan iti relihion, saan a malimitaran dayta a kalinteganna no la ket ta awan ti nalawag a pangibatayan a pagdaksan dayta ti ubing.

    Gapu iti desision ti korte, saanen a malimitaran ti kalintegan dagiti ubbing nga umawat kadagiti instruksion ken panangiwanwan ni Jehova a Dios. Nasayaat ti panagrang-ayda iti naespirituan ta makikadkaduada kadagiti kakabsat iti kongregasion. Kinuna ti ama: “Gapu iti daytoy a situasion, ad-adda a bimmileg ti pammatik. Iti napalpalabas, nasubok ti pammatik ngem tinulongannak ni Apo Jehova nga agtalinaed a matalek! Ammok a no pilientayo ti agserbi ken Jehova, ekspektarentayon a maidadanestayo.”

  • Ni Sister Efigenia Semente a taga-Namibia ket tallo ti annakna. Naipasango isuna iti narigat a situasion a nangsubok iti kinamatalekna. Bayat nga adda iti ospital, nagkomplikasion ti panagpasikalna iti maikatlo nga anakna, ket nakaala ti dadduma nga empleado ti ospital ken dagiti saan a Saksi a kapamiliana iti pammalubos ti korte a mapuersa a mayalisonan iti dara. Ngem saan a naaramid ti kayatda gapu ta determinado ni Sister Semente a saan nga agpayalison iti dara. Inlabanna iti korte ti kalinteganna a mangpili iti pamay-an ti pannakaagasna. Idi Hunio 24, 2015, pinaboran ti Korte Suprema ti Namibia ti takder ni Sister Semente. Kinuna ti Korte a “ti kalintegan ti maysa a mangikeddeng iti maaramid  wenno saan a maaramid iti bagina, maysa man a nagannak wenno saan, ket saan a pulos a mabalbaliwan wenno maikkat ti asinoman.” Kinuna ni Sister Semente: “Talaga a nariknami ti tulong ni Apo Jehova. Nagmayat ti agbalin a paset daytoy a panagkakabsat. Talaga nga ipatpategnakami ni Jehova.”

  • Maragragsakan dagiti Saksi idiay Switzerland a makiraman iti panangasaba iti publiko kadagiti dadakkel a siudad. Nupay kasta, nangipaulog ti siudad ti Geneva iti bilin a mangiparit iti panangusar iti “stand a direkta wenno saan a direkta a mangiwaras iti impormasion maipapan iti relihion iti publiko.” Nangipasa dagiti Saksi iti reklamo iti korte, nga inyunay-unayda a ti panangiparit iti panangusar iti stand tapno agiwaras iti impormasion maipapan iti relihion ket “maikontra la unay iti wayawaya ti relihion ken wayawaya ti opinion.” Pinaboran ti korte dagiti Saksi, ket sipud idin, agtintinnulongen dagiti Saksi ken dagiti autoridad a mangpili iti maitutop a lokasion ken oras para iti panangasaba iti publiko babaen ti stand.

  • Ad-adda nga inkagumaan dagiti opisial ti gobierno idiay Azerbaijan a pasardengen ti aktibidad dagiti Saksi ni Jehova. Regular a papaayaban ti Ministry of National Security dagiti Saksi tapno  mapagsaludsodan. Mapmapan met daytoy nga ahensia kadagiti balay dagiti Saksi tapno agbirok kadagiti literatura nga iparparit ti gobierno a sumrek iti pagilian. Nakigtot ti dadduma a pagilian idi imbalud dagiti agtrabtrabaho iti daytoy nga ahensia ti dua a Saksi a da Irina Zakharchenko ken Valida Jabrayilova idi Pebrero 2015 gapu laeng iti panangasabada. Nupay maladingitantayo iti kasta a saan a nasayaat a pannakatrato, maragsakantayo ta naregta ken natured latta dagiti kakabsat idiay Azerbaijan a mangikaskasaba iti “naimbag a damag ti pagarian” iti sabsabali.—Mat. 24:14.

  • Idiay Russia, agtultuloy a busbusoren ti gobierno ti aktibidad dagiti Saksi ni Jehova. Iti agdama, 80 a publikasion dagiti Saksi ni Jehova ti indeklara ti Russian Federation kas “extremist.” Kaipapanan daytoy nga illegal ti maaddaan wenno mangiwaras iti aniaman kadagitoy a publikasion, kas iti Ti Librok Dagiti Estoria ti Biblia. Idi Disiembre 2014, indeklara pay ti Russian Federation Supreme Court a ti website-tayo a jw.org ket “extremist.” Saanen a maluktan ti website iti intero a Russia, ken maibilang nga illegal ti panangyendorso iti dayta. Sipud idi Marso 2015, saanen nga ipalubos dagiti opisial iti customs a sumrek iti pagilian dagiti literatura dagiti Saksi, a pakairamanan dagiti Biblia ken literatura a nasukimaten ken imbilang idin dagiti korte ti Russia a saan nga “extremist.”

Agtultuloy ti panangilaban dagiti Saksi iti kalinteganda iti siudad ti Taganrog. Inakusaran dagiti autoridad sadiay ti 16 a kakabsat iti “krimen” a panangorganisar ken panagatender kadagiti narelihiosuan a gimong. Iti siudad ti Samara, nakaala dagiti autoridad iti pammalubos ti korte a mangpasardeng iti legal a korporasiontayo ta maibilang kano dayta nga “extremist.” Iti laksid dagitoy a pakarigatan, determinado dagiti kakabsattayo idiay Russia a mangipaay iti “Dios ti bambanag ti Dios,” ken saan a sumuko kadagita nga ibubusor.—Mat. 22:21.