Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

Canada: Komunidad dagiti Inuit idiay Kangirsuk iti makin-amianan a Quebec

 DAGITI TAMPOK ITI NAPALABAS A TAWEN

Damdamag—Iti Intero a Lubong

Damdamag—Iti Intero a Lubong

Panangasaba iti Amin nga Aggigian Idiay Canada

Naipatarusen ti video nga Apay nga Adalem ti Biblia? iti walo a katutubo a lengguahe iti Canada tapno makasabaan ti amin a tattao iti teritoria ti sangay. Bayat ti sangapulo nga aldaw a panangasaba idiay Nunavik Arctic idi Oktubre 2014, naipabuya dayta a video iti lengguahe nga Inuktitut iti dandani amin a balay iti 14 a komunidad, nga addaan iti nasurok a 12,000 a residente.

Nagbilib ti Manedyer

Idi Septiembre 2014, naangay ti maysa nga internasional a kombension iti Sangam World Cup Stadium idiay  Seoul, South Korea. Naragsakan ti nasurok a 56,000 nga immatender. Inyebkas ti manedyer ti apresasionna iti nasayaat a kababalin ken kooperasion dagiti Saksi bayat ti kombension. Kinunana: “Nagsayaat ti kababalin ti amin. Nagbilibak ta nalalaingda pay nga agdalus iti stadium ngem kadagiti nasanay a paradalusmi. Kasta koma met dagiti trabahadormi. No kayattayo a husto ti pamay-antayo nga agserbi iti Dios, masapul nga agbalintayo a kas kadagiti Saksi ni Jehova.”

South Korea: Ti internasional a kombension idiay Seoul idi 2014

‘Sinanaynakami ni Jehova’

Idi Mayo 2012, saan nga inaprobaran ti gobierno ti Sweden ti aplikasion dagiti Saksi ni Jehova a maikkanda iti pinansial a benepisio a kas iti naited iti dadduma a narelihiosuan  nga organisasion. Inaprobaran ti Bagi a Manarawidwid ti desision a mayapelar dayta iti Supreme Administrative Court ti pagilian.

Inkeddeng ti Korte a denggen nga umuna ti kaso sakbay a mangaramidda iti desision. Nagmiting ti sumagmamano a brother a naggapu iti nadumaduma a pagilian tapno pagsasaritaanda no kasano a sungbatan dagiti mabalin a maisaludsod iti korte. Naaramid ti practice session iti maysa a Kingdom Hall idiay Stockholm.

Bayat ti practice session, naguni ti doorbell. Linuktan ti maysa a kabsat ti ridaw, ket inyam-ammo ti dua a balasitang, nga agtawen iti 13 ken 14, ti bagida. Imbagada nga adda dagiti kayatda nga isaludsod maipapan kadagiti Saksi ni Jehova. Inyestoria ti kabsat, “Kayatko koma nga ibaga nga agsublidanto laengen ta adda napateg a banag nga as-asikasuenmi ken awan ti panawenmi para iti sabali a banag.”

Ngem nakisarita latta ti kabsat. Adu ti insaludsod dagiti babbalasitang, a dadduma ket maipapan kadagiti isyu ti kagimongan ken panagbotos. Kalpasanna, immunegen ti kabsat ket insalaysayna kadagiti kakaduana dagiti saludsod dagiti babbalasitang ken no kasanona a sinungbatan.

Kabigatanna, nasorpresa dagiti kakabsat ta adu kadagiti saludsod ti Korte ti kapadpada dagiti insaludsod dagiti babbalasitang. Kinuna ti kabsat a mangireprepresentar iti organisasion: “Agnerbiosak koma ta addaak idi iti sango dagiti mararaem nga abogado ti pagilian, ngem kalmadoak latta. Nariknak nga adda ni Apo Jehova iti sibaymi ta sinanaynakamin sakbay pay dayta nga aldaw.”

Pabor kadatayo ti desision ti Korte, ket naisubli ti kaso iti gobierno ti Sweden tapno sukatanda ti desisionda.

 Bagas nga Indonar ni Ken

Taga-Haiti ti innem ti tawenna a ni Ken. Idi naammuanna a dandanin maibangonan ti kongregasionda iti baro a Kingdom Hall, naragsakan ket nangaramid iti sekreto a contribution box sa indulinna iti kuartona. Imbes a gastuenna ti balonna nga it-ited dagiti nagannakna, itintinnagna dayta iti inaramidna a contribution box. Agtultuloy a kasta ti inaramidna agingga a simmangpet ti grupo nga agibangon iti Kingdom Hall. Intedna kadakuada ti sekreto a kahonna, nga umanay ti kargana a paggatang iti dakkel a supot ti bagas. Adu nga aldaw a dayta ti nailuto para iti pangngaldaw dagiti agibangbangon.

Bilin ti Heneral

Iti napalabas a tawen, adu a bulan a kasapulan a mangala dagiti kakabsat iti espesial a permiso tapno makastrekda kadagiti lugar idiay Sierra Leone a nakuarentinas gapu iti panagwaras ti Ebola virus. Kas pagarigan, tapno makastrek dagiti manangaywan iti sirkito ken dagiti mangitultulod kadagiti surat ken literaturatayo kadagita a lugar, masapul a mangalada kadagiti badge ken permit ti lugan. Masapul nga agitugot dagiti miembro ti Disaster Relief Committee iti sabon, thermometer, ken makan. Nakaskasdaaw ta kanayon a makaala dagiti kakabsat iti permiso.

Adda maysa a makaparegta a kapadasan. Nangipasa dagiti kakabsat iti aplikasion para iti 34 a badge ken 11 a permit ti lugan, ngem kasapulan a makisaritada iti maysa a heneral tapno maaprobaran ti aplikasionda. Dua a brother manipud iti sanga nga opisina ti nakisarita iti heneral iti aldaw a namnamaenda a maaladan dagiti badge ken permit. Ngem saan metten a mabirokan ti aplikasionda. Naibaga kadakuada a birokenda ti aplikasionda kadagiti nabunton nga aplikasion, ngem dida nabirokan. Idi kuan, imbaga ti heneral iti sekretariana nga iserranan  ti opisinana ket awanen ti maasikaso nga aplikasion iti sumaruno a dua a lawas. Sipapasnek a nagkararag iti naulimek dagiti kakabsat nga indawatda a tulongan ida ni Jehova. Kalpasanna, kimmita kadakuada ti heneral ket dinamagna, “Mano a badge ken permit ti kasapulanyo?” Idi imbagada no mano, napatakder ti heneral iti tugawna ket imbugkawna, “Nagadu dayta, a!”

Inlawlawag dagiti kakabsat ti maipapan iti trabahotayo ken no kasano a makatulong dagiti relief supplies iti agdama a krisis mainaig iti Ebola virus. Nagpanunot ti heneral, kimmita iti sekretariana, ket kinunana, “Itedmo ti amin a kasapulanda.”

Guinea ken Sierra Leone: Iti amin a Kingdom Hall, adda naaramid nga urnos a panangbuggo iti ima