Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2016 Tinawen a Libro Dagiti Saksi ni Jehova

Tanzania: Umas-asideg dagiti aglabas kadagiti cart idiay Dar es Salaam

 DAGITI TAMPOK ITI NAPALABAS A TAWEN

Panangdanon Kadagiti Di Madandanon

Panangdanon Kadagiti Di Madandanon

TI PANANGASABA iti binalaybalay ti kangrunaan a pamay-an dagiti Saksi ni Jehova a mangipakaammo iti kinapudno iti Biblia, ngem nakaep-epektibo met ti panangusar kadagiti makaawis iti atension a lamisaan ken cart a pagidispleyan iti literatura. (Mat. 24:14) Datin nga agus-usar dagiti manangikaskasaba iti Pagarian kadagiti stand, lamisaan, ken kiosk, wenno booth, tapno makasabaan dagiti tattao kadagiti publiko a lugar. Naikkan pay dagiti kongregasion iti intero a lubong iti agarup 250,000 a cart a pagidispleyan iti literatura. Ania ti resultana?

Sipud idi nairugi ti special metropolitan public witnessing idiay Dar es Salaam, Tanzania idi 2014, ngannganin  700 a tattao ti nagkiddaw a mayadalan iti Biblia. Adun nga interesado ti makigimgimong ken mangikagkagumaan a suminged iti Dios. Iti uneg ti maysa a tawen, nasurok a 250,000 a literatura a naidispley kadagiti cart ti innala dagiti tattao a naggapu kadagiti pagilian iti Africa ken iti ballasiw-taaw.

Awan pay 2,000 ti bilang dagiti agibumbunannag idiay Solomon Islands. Naglawa ti teritoriada ta saklawenna ti nasurok a 300 nga isla. Dakkel ti maitultulong ti special metropolitan public witnessing iti panangiwaras iti bukel ti kinapudno sadiay. Iti kabesera a Honiara, nakaipaima dagiti kakabsat iti nasurok a 104,000 a magasin ken nasurok a 23,600 a broshur, a kaaduanna ket kadagiti tattao nga aggigian iti isla ken iti adayo a purok nga awan ti Saksi. Iti maysa laeng a malem, nakaipaimada iti 400 a kopia ti libro nga Ania a Talaga ti Isursuro ti Biblia? ken 60 a tattao ti nagkiddaw a mayadalan iti Biblia iti pagtaenganda.

Maysa nga agsapa, bayat nga iplasplastar ti agassawa a regular pioneer a da Michael ken Linda ti literature stand iti igid ti baybay ti Margarita Island, Venezuela, immasideg ti maysa a lalaki nga agnagan Aníbal ket inikkanda iti libro nga Isursuro ti Biblia. Imbagana a natay ti tatangna iti dayta a lugar pito a tawenen ti napalabas ket gapu iti dayta, na-depress ti nanangna. Kalpasan ti makalawas, nagsubli ni Aníbal ken imbagana kada Michael ken Linda nga anibersario ti ipapatay ni tatangna iti dayta nga aldaw. Inruarna ti selponna, tinawaganna ni nanangna, sa indawatna a liwliwaen ni Michael. Sipud idin, namin-adun a timmawag ti nanang ni Aníbal kada Michael ken Linda,  ket liniwliwada kadagiti teksto iti Biblia. Naminsan, inteks ti nanang ni Aníbal, “Nasaysayaat itan ti riknak gapu ta liniwliwadak ken tinulongandak tapno pumigsa ti pammatik.”

Addan nayurnos nga special metropolitan public witnessing iti 127 a lokasion iti 14 a siudad idiay United States. Iti umuna a pito a bulan ti 2015 a tawen serbisio, nairugi ti 8,445 a panagadal iti Biblia! Nakaep-epektibo met daytoy a pamay-an ti panangasaba iti panangtulong kadagiti di aktibo nga agsubli iti pudno a panagdayaw. Kas pagarigan, kitkitaen ti maysa a lalaki nga agnagan Terry ti maysa a lamisaan a nakaidispleyan dagiti literaturatayo idiay Los Angeles, California, isu nga inasitgan ti agassawa a Saksi ken dinamagda no napadasnan ti nagbasa kadagiti literaturatayo. Imbagana nga isu ket maysa a Saksi ni Jehova ngem uppat a tawenen a di aktibo. Imbasa ken inlawlawag ti agassawa ti kinuna ni Jehova iti Ezequiel 34:11: “Birokekto dagiti karnerok ken aywanak ida.” Imbagada ti maipapan iti website-tayo ken ti maipapan iti JW Broadcasting. Kabigatanna, nag-e-mail ni Terry ket imbagana a sakbay a nakitana ti lamisaan a nakaidispleyan dagiti literatura, nagpakaasi iti Dios a pakawanenna gapu ta saanen a makigimgimong. Dimmawat met iti tulong tapno ad-adda a suminged ken Jehova. “Ket idi kuan, siraragsak a kinablaawandak,” kinuna ni Terry. “Nangbasakayo iti makaparegta a teksto ken imbagayo ti masapul nga aramidek tapno makasubliak iti organisasion ni Apo Jehova. Sungbat dayta ti kararagko.”

Nayurnos ti special metropolitan public witnessing iti uppat a lokasion idiay Addis Ababa, Ethiopia. Iti uneg ti tallo a bulan, nakaipaima dagiti kakabsat iti 37,275 a publikasion, ken 629 ti nagkiddaw a masarungkaran. Maysa kadagiti adu nga immawat iti libro nga Isursuro ti Biblia  ket maysa a lakay a nageskuela idi iti seminario. Dagus a binasana ti libro. Adu ti saludsodna maipapan ken Jesus ken iti Pagarian ti Dios isu a nagsubli iti simmaruno nga aldaw tapno ammuenna ti sungbat dagiti saludsodna. Kabigatanna, immanamong a mayadalan iti Biblia, ket iti  ngudo ti lawas, nakigimongen. Regular itan a makigimgimong ken napartak ti panagrang-ayna.

Ethiopia: Dagiti literatura iti Amharic a nakadispley iti cart idiay Addis Ababa

Adda Judio a lalaki nga immasideg iti maysa a literature stand idiay Mexico ket dinamagna iti dua a brother no adda publikasionda maipapan iti ipapatay. Imbagada a naibusanda iti magasin maipapan iti ipapatay, ngem inikkanda iti publikasion a mangilawlawag iti mapasamak iti masanguanan. Iniggaman ti lalaki ti takiag ti kabsat ket kinunana: “Saanak nga interesado iti masanguanan. Agpakamatay ti kayatko.” Idi kuan, nagsangit ti lalaki. Dinamag dagiti kakabsat no apay. “Nabiit pay a natay ti anakko,” kinunana. Gapuna, impakitada ti kapitulo 7 ti libro nga Isursuro ti Biblia. Imbasada ti umuna a dua a parapo ti subtitulo a “No Matay ti Patpatgentayo,” kasta met ti ngudo ti kapitulo a mangilawlawag iti namnama dagiti natay. Natukay ti rikna ti lalaki isu nga iniggamanna manen ti takiag ti kabsat ket insaludsodna, “Agpayso?” Impasigurado dagiti kakabsat a talaga a tungpalen ni Jehova dayta a kari. “Ania ti aramidek tapno makitak manen ti anakko?” kinunana. Inyurnosda a sarungkaran ti lalaki iti balayna. Idi nakadanonda iti balay ti lalaki, agur-urayen ken magagaran nga agadal iti Biblia.

“Talaga a bembendisionan ni Jehova daytoy a programa!” kinuna ti maysa nga agdaldaliasat a manangaywan a timmulong a nangyurnos iti special metropolitan public witnessing idiay New York. “Dakkel ti naitulongna daytoy a pamay-an tapno makasabaan ti rinibu a tattao ken tapno mabirokan ti adu a di aktibo wenno nailaksid—dagiti ‘napukaw a karnero’—a matultulongan itan nga agsubli iti arban.”—Ezequiel 34:15, 16.