Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

Surat ti Bagi a Manarawidwid

Surat ti Bagi a Manarawidwid

Patgenmi a Kakabsat:

“Kankanayon nga agyamankami iti Dios no dakamatenmi ti maipapan kadakayo amin kadagiti kararagmi, ta di agressat a laglagipenmi ti matalek nga aramidyo ken ti naayat a panagbannogyo ken ti panagibturyo gapu iti namnamayo ken Apotayo a Jesu-Kristo iti sanguanan ti Dios ken Amatayo.” (1 Tes. 1:2, 3) Anian a nagpintas dagita a sasao a mangiladawan iti riknami kadakayo! Agyamyamankami ken Jehova gapu kadakayo ken kadagiti nagsayaat a maar-aramidanyo. Apay?

Iti napalabas a tawen, nagagetkayo a nangibanag kadagiti ‘matalek nga aramid’ ken ‘naayat a panagbannog’ mainaig kadagiti aktibidad ti Pagarian. Adu kadakayo ti nangpalawa iti ministeriona. Dadduma ket immakar tapno agserbi iti sabali a lugar, ken uray iti sabali a pagilian, nga addaan iti dakkel a panagkasapulan kadagiti ebanghelisador ti Pagarian. Dadduma ti nangpalawa iti ministerioda babaen ti panangasaba iti publiko. Adu ti natignay nga ag-auxiliary pioneer bayat ti panawen ti Memorial, bayat ti ibibisita ti manangaywan iti sirkito, wenno bayat ti espesial a kampania idi Agosto 2014. Nupay agduduma ti kasasaadyo, makitami nga amin-kararua ti panagtrabahoyo para ken Jehova, ket komendarandakayo. (Col. 3:23, 24) Pudno a maysa daytoy a rason nga agyamankami ken Jehova gapu iti “matalek nga aramidyo!”

Ap-apresiarenmi met unay ti “naayat a panagbannogyo” iti panagibangon kadagiti nadumaduma a teokratiko  a pasilidad iti intero a lubong. Naganat ti panagkasapulantayo kadagita a pasilidad gapu ta agtultuloy nga umad-adu ti bilang dagiti agdaydayaw ken Jehova. (Isa. 60:22) Panunotenyo laengen, ti kangatuan a bilang dagiti agibumbunannag iti napalabas a tawen ket 8,201,545, ken ti promedio a bilang ti panangyadal iti Biblia iti kada bulan ket 9,499,933. Kas resulta dayta nga iyaadu, adu a sanga nga opisina ti kasapulan a mapalawa wenno mapasayaat. Siempre, kayatna met a sawen a kasapulantayo ti ad-adu pay a Kingdom Hall! Kasta met, iti adu a paset ti daga, kasapulantayo dagiti remote translation office tapno makapagnaed ken makapagtrabaho dagiti agipatpatarus iti lugar a pakaus-usaran ti lengguaheda.

Ngarud, isaludsodtayo iti bagitayo, ‘Kasano a masuportarak ti pannakaibangon dagitoy a pasilidad?’ Dadduma kadatayo ti mabalin nga agboluntario iti trabaho a panagibangon. Ngem adda man paglaingantayo iti panagibangon wenno awan, pribilehiotayo amin ti mangipaay kadagiti napapateg a bambanagtayo kadagitoy kasapulan a proyekto. (Prov. 3:9, 10) Idi maibangbangon ti tabernakulo, natignay unay dagiti Israelita a mangted, nga uray la masapul a maipakaammo nga isardengdan ti agited. (Ex. 36:5-7) Awan duadua a matignay ti pusotayo ken magutugottayo gapu kadagita a pagarigan iti Kasuratan. Ti “naayat a panagbannogyo” kadagitoy a napateg a benneg ti sagrado a panagserbi ket maysa pay a rason nga agyamankami ken Jehova!

Addaantayo iti naisangsangayan a rason nga agrag-o bayat a makitkitatayo ti kinasungdo ken panagibtur dagiti kakabsattayo. Maysa a pagarigan ket dagiti ipatpategtayo a kakabsat idiay South Korea. Manipud 1950, naibalbalud dagiti agtutubo a kakabsat a lallaki iti dayta a pagilian iti nagduduma a kapaut gapu ta kayatda a taginayonen  ti neutral a takderda kas Kristiano. Adun a henerasion dagiti kakabsattayo ti nagibtur kadagitoy a pannakatrato ken saanda a simmuko. Mapabpabileg ti pammatitayo gapu iti panagibturda!

Idiay Eritrea, tallo a kakabsattayo ti nasuroken a 20 a tawen a nakabalud. Dadduma ti naibalud iti ab-ababa a tiempo a pakairamanan dagiti kakabsat a babbai ken dagiti annakda. Adu a panangikagumaan ti naaramid tapno mawayawayaanda, ngem awan pay ti nagballigi. Nupay kasta, saan a nagkompromiso dagiti kakabsattayo, no di ket sinalimetmetanda ti kinatarnawda iti laksid dagiti nakarigrigat a kasasaad. Saantayo koma a liplipatan nga iraman iti kararagtayo dagitoy a matalek a kakabsattayo.—Roma 1:8, 9.

Siempre, kaaduan kadakayo ti saan a naibalud gapu iti pammatiyo. Ngem adu ti agib-ibtur gapu iti panaglakay ken panagbaket, nakaro a sakit, ibubusor dagiti kakabagian wenno di manamati nga asawa, ken uray dagiti personal a pakarigatan a mabalin a dakayo laeng ti makaammo. Nupay kasta, itultuloyyo latta ti agserbi a matalek ken Jehova! (Sant. 1:12) Komendarandakayo. Ti kinamatalek ken panagibturyo ket sabali pay a rason nga agyamankami ken Jehova.

Wen, ti matalek nga aramidyo, ti naayat a panagbannogyo, ken ti panagibturyo ket agkakaimbag a rason tapno ‘agyamankami ken Jehova, ta isu naimbag.’ (Sal. 106:1) Ay-ayatendakayo amin, ket ikarkararagmi ken Jehova a papigsaen, tulongan, ken bendisionannakayo tapno makapagserbikayo kenkuana iti agnanayon.

Dagiti kakabsatyo,

Bagi a Manarawidwid Dagiti Saksi ni Jehova