Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 SANGALUBONGAN A PANANGASABA KEN PANANGISURO

Dagiti Pagilian ti America

Dagiti Pagilian ti America
  • PAGILIAN 57

  • POPULASION 980,780,095

  • AGIBUMBUNANNAG 4,034,693

  • PANANGYADAL ITI BIBLIA 4,339,285

Makigimgimong Dagiti Ubbing iti Pagamponan

Napan ni Angela a taga-Suriname iti pagamponan, wenno orphanage, iti asideg ti balayda. Maysa a di aktibo a kabsat a babai ti mangimanmanehar iti dayta isu a pinalubosanna ni Angela a mangasaba kadagiti ubbing. Kinasarita ni Angela ti 85 nga ubbing ken impabuyana dagiti video manipud iti jw.org. Kas resultana,  adu kadakuada ti narugianna nga iyadalan iti Biblia. Dua a payunir ti timmulong kenkuana ket saggagaysada ti iyadalan a grupo dagiti ubbing. Kinuna ti di aktibo a kabsat nga insurona dagiti ubbing kadagiti kanta iti maysa kadagiti pagkantaantayo ken ibasbasaanna ida kadagiti estoria ti Biblia iti rabii. Imbagana a kayatna ti makigimong, ngem dina mapanawan ti 85 nga ubbing iti pagamponan. Gapuna, nayurnos ti pannakigimong ti amin nga ubbing iti Kingdom Hall. Mapagpagna laeng ti Kingdom Hall manipud iti pagamponan isu a kinuyog ida dagiti kakabsat a mapan iti Kingdom Hall. Ita, regularen a makigimgimong ti kabsat ken ti 85 nga ubbing.

Tinulongan ni Gabriel ni Lolona

Paraguay: Kasarsarita ni Gabriel ni lolona

Idi agawidda manipud iti maysa a kombension idiay Paraguay, ti innem ti tawenna a ni Gabriel pinampanunotna ti kinapateg ti panangikasaba iti mensahe ti Pagarian. Nalagipna nga adda espesial a tao a kayatnanto a makadua idiay Paraiso—ni lolona. Ngem pulos a saan a naginteres ni lolona iti kinapudno ken busbusorenna ti asawana ken annakna a Saksi.

Iti isu met la nga aldaw, imbaga ni Gabriel kadagiti nagannakna a makisaritada kada lolo ken lolana idiay Argentina babaen ti video call. Inlawlawag ni Gabriel ken lolona no apay a nakapatpateg ti panagadal iti Biblia ken dinamagna, “Lolo, kayatmo ta agadalta iti Biblia?” Kinayat ni lolona. Imbaga ni Gabriel nga adalenda ti broshur nga Umimdengka iti Dios ket Agbiagka nga Agnanayon. Iti sumagmamano a bulan, inadalda a dua ti broshur. Gapu ta agpadada a marigatan nga agbasa, agpraktisda a nasaksakbay. Tunggal agadalda, isagana ni Gabriel ti leksionda ken ag-polo sa agkurbata.

 Kalpasanna, inkeddeng ti lolo ken lola ni Gabriel nga agbakasionda iti balay da Gabriel iti sumagmamano a lawas. Bayat ti ibibisitada, nakigimgimong ni lolona a kadua ti pamiliada. Idi nagawid da lolona idiay Argentina, intuloyna ti nakipagadal iti Biblia iti maysa a kabsat ket rimmang-ay agingga a kualipikadon nga agbalin a di bautisado nga agibumbunannag. Ita, agkaduan nga agkarkararag ti lolo ken lola ni Gabriel iti inaldaw. Agtultuloy met a rumangrang-ay ni Gabriel ken maysa metten a di bautisado nga agibumbunannag. Inyebkasen ni lolona a kayatnan nga isimbolo ti dedikasionna ken Jehova babaen ti panagpabautisar iti danum.

“Saan a Naiparna ti Ibibisitam”

Idiay Brazil, bayat ti panagibunong iti tract nga Agbiagto Kadi Manen Dagiti Natay?, nagtuktok ni Jennifer iti ridaw ti maysa a babai nga agal-alisto a pumanaw a mapan makipamumpon iti nasinged a gayyemna. Kinuna  ni Jennifer nga eksakto la unay ta ti itedna a tract ket maipapan iti namnama a pannakakitatayto manen kadagiti natayen nga ipatpategtayo iti biag. Nasdaaw ti babai iti paulo ti tract, ngem inawatna latta dayta. Idi naisaludsod no kayatna ti mangala iti kanayonan a tract para iti nagminatay a pamilia, immanamong ket nangala pay iti siam a tract.

Idi agangay, simmarungkar ni Jennifer ket kinuna ti babai: “Idi damo a nagkitata, naamirisko a saan a naiparna ti ibibisitam. Imbaonnaka ti Dios tapno mangted iti makaliwliwa a mensahe a kasapulak unay.” Naibunongna amin ti tract. Ti maysa a miembro ti pamilia a nangipaay iti serbisio ti pumpon imbasana a sipipigsa ti intero a linaon ti tract. Naapresiarda amin dayta ken pagyamyamananda ti babai gapu iti makaliwliwa a mensahe. Immanamong ti babai a mayadalan iti Biblia.

Panangasaba iti Tap-Tap

Tallo a Bethelite a mapan iti Haiti ti naglugan iti namaris ti kolorna a pampasahero a taxi a maaw-awagan iti tap-tap. Bayat ti dua ket kagudua nga oras a panagbiaheda, inkasabada kadagiti dadduma a pasahero ti namnama nga iyeg ti Pagarian. Nakaipaimada iti 50 a magasin ken 30 a tract. Ti maysa kadagiti Bethelite a ni Gurvitch imbasana iti padana a pasahero ti maysa a paset ti magasin nga Agriingkayo! Mangmangngeg dayta ti agtutubo a ni Pépé ket dagus a nakiraman iti saritaan. Kiniddawna a mayadalan iti Biblia, ket bayat ti panagsarsaritada, naammuan ni Gurvitch a ti lugar da Pépé ket teritoria gayam ti kongregasionda. Sipud idi damo a nakasabaan ni Pépé idi Enero 2014, dandani natabunuanna aminen a gimong ken asamblea. Iranranudnan dagiti kabbaro a patpatienna ken namnamaenna a maaprobaranton kas di bautisado nga agibumbunannag.